Read Wancho Naga Isaia 21 Bible Online

Isaia 21 - Wancho Naga bible

Isaia 21

¹Ija a Babilon nok ba angkya kaxho changpu. Sak-hax akaile shangflo anguixle hüikya ningle, za-adünkya haxtok tokhange thama hüiüi.

²Mongtsik füi sikangünkyabu, dyen ngokya hia olithu angkya thama, ibu ku mikza ma kue ngündaoa. Elam nok süpahibu, singkox! Medi nok süpahibu, donglaxle tingnubu kopkox! Babilon makhange ahüikya thangnak pangwüi Zang-e ashuk ang tomdaoa.

³Kue ngünkya mikngün-ohüne ku chabüt-lasün ang tamchu okak ang achangle; ija okak a sheko tuita nao ngün ang kakpupule changle.

⁴Ku ang kho-anguixle, ilaxle ku zalaxle abün ngole. Kue hanhomle otu ngünhaxle sungle ngo, ikoxle ijae ku hato chabüt-lasün boma chemchu chiapüi.

⁵Mikngünohün ma fongsüt achwonkya ngün; mixwünbu thung angkya hanpakma hwome dom nom. Hwome sax-lingle chang. Allele khong kaxho hüi: “Süpahi tüichongbu! Hünzom dibu achwonlax!”

⁶Ifüima Jowanpa-e ku ang thüi: “Paokox ilaxle zanhumix tuita dankox, ilaxle chixe ngünkyakya kaxwün wang angkya akaxkox.

⁷Chixe khünak mankho ma nguikyabu jangngün, ijachu anyi-nyi pong, ilaxle khünakbu mantsak hia ut ibu khoma ngalaxle hüile ngokya jangtüi, chixe ibu to müile hukop angkya changpu.”

⁸Zanhumixe nyakle thüi: “Alixachong, ku a zangnak zangngaile ku zanhunui ma zanhule ajong ngokya changpu.”

⁹Allele hwom nguile ngole! Mankho ma khünakbu, ijachu mixhuak anyipong. Zanhumixe ija kax kox: “Babilon a nguakdaoa! Hwome shwomle ngokya chapabu pangwüi hax ma chiak daoa.”

¹⁰Ku khünaknu Israelbu, hünzom a wonglai tsax ningle zütdaoa, ikoxlechu athax kue hünzom hato JOWANPA, Israel nok Zang makhange kue atatle laxkya kaxho müikya tsingang koxpu.

¹¹Ija a Edom ba angkya kaxho changle. Owawae ku Edom makhange nyakle thüi: “Zanhumix, zangnak chemtukux kaile leüihex? Ku hama wünhüi ija chemtukux chwonle ashuküihex.”

¹²Kue lan: “Zangngai tu nguile ngole, ikoxle zangnak a anaolechu hüi angkya changle. Nang tamtikse jangtsu, tamchat laxle tiklax.”

¹³Ija a Arabia ba angkya kaxho tuita changle. Hünzom Dedan angkya khünakbu, opang kux müizyem Arabia nok angkya sak-hax fao to athongle tüipuix,

¹⁴hünzom hato tilan dukdukle hüikya khünakbu ang ling angkya ti laxkox. Hünzom Tema haxtok ma ngokya khünakbu, pünpaobu ang sax angkya süt laxkox.

¹⁵Khünakbu a hwom lang ang achwonle tüikya changlobu thoto, hwom to hap ang achwonle tüikya sanhapbu thoto, zanhok thama pangnu thoto paole ngole.

¹⁶Ifüima Jowanpa-e ku füi akax: “Zanglao tuita ashukkya füi tomle Kedar jat-libu zaxzangle tüikya ashuküi.

¹⁷Hapnu twonkyabu a Kedar nok ma naomüibu changle, ikoxle hwom khama ota hidaole wüi toxüi. Ku, JOWANPA Israel nok Zang-e ija akaxdaoa.”