Read Wancho Naga Isaia 29 Bible Online

Isaia 29 - Wancho Naga bible

Isaia 29

¹Zang tö-tsap, Jerusalem a, maxdaoa! Dawid-e pomzaile ngokya tingnu a maxdaoa! Pangpwon fongsüt füi zanglao tuita füima anyi le, nguipue paopue le naxchang kox,

²ifüima “Zang tö-tsap”, le nyakkya tingnu hato Zang-e thama naxapüikox. Ikhato sopkya hia mangsopkya tüiüi, ilaxle tingnu abakle wünkhut füi joxle tuita tö-tsap lailaile changüi.

³Zang-e ija tingnu to singüi, ija akhople kopüi, ilaxle ija tsuiüi.

⁴Jerusalem a tuita haxshix chasa haxmong tokhange akax ang azongle ngokya, haxkha tokhange baozing-baozua atat ang kopkya ningle changüi.

⁵Jerusalem, nang to singkya mixnok pangwüi haxkhi-labu ningle pikle paoüi, ilaxle ija büt kopkya hwom süpahibu a tsaxfa ningle pikle paoüi. Allele tamchu sukhachinale ngopongkhae

⁶JOWANPA Khüthak Zang-e zangchei-zangwat hia bütix sikya füi nang khosünle kopüi. Chixe zangchei chongkya hia wünnu ahüiüi;

⁷ifüima Zang tö-tsap tingnu to single ngokya chaxwannu nok, hwom chang-pax hia khyep-dibu: pangwüinu: zangnak ma wünmang chito ngünle laxkya tuita ningle amütüi.

⁸Jerusalem to sing ang asoxle tüikya chaxwannu nok a, wünmang chito fongsaxle ngün ikoxle woknole zikya mixsün tuita ningle, chichangba wünmang chito ti lingle ngün ikoxle dingdua zuazoxle zolaxle tilan maxngokya mixsün tuita ningle.

⁹Aham ngokox ilaxle ongat ma ngokox! Aham ngokox ilaxle mik apwomle ngokox! Ju ngax chiling homtoxle tokle ngokox! Ofun tuita chiling homtoxle shu-shüile ngokox!

¹⁰JOWANPAe nang a mik angux ang tomdaoa, mikngüt müile jip ang achwonle ngolax. Ajebu a khünaknu mik ang changsepa, ikoxle Zang-e hwom mik ma zimdaoa.

¹¹Ajebu mikngün ohün pangwüi hünzom ang tsingang chitomle pyenle thomüi; ija a single thomdaokya laitün tuita ningle changüi. Nange ija e-ang mankya mix owawa hato pao ilaxle nang ang ele ahohüile jangtom, ija single thomdaokya chang koxle chixe münthole lanüi.

¹²Nange ija e-ang chimankya mix hato pao ilaxle nang ang ele ahohüile jangtom, chixe ija chemle e-üihex müntik le lanüi.

¹³Jowanpa-e thüile: “Ibu khünake ku to shwomle le wüntüia, ikoxle hwom kaxfa ma lax angkya chemchu müntüi, ilaxle hwom kün-mong chu ojongjong towüi. Hwom zanglom a chemchu münchang ikoxle hwome mong ma kople thomkya khünake zingle alaikya wanlom hia mokle hüikya olom lanlan.

¹⁴Ikhoma kue hwom to texle chilekya sikngün füi tam füima tamle chabüt-lasün ang tomüi. Opangsa jepa changpule ngopuix ibu ongat ang achangüi, ilaxle hwom tsingtsang chem angchu chichangüi.”

¹⁵Ma mwottho JOWANPA pomtho ma pyen ang azongkyabu a maxdaoa! Hwome hwom mwot huxsa ma mokle ilaxle ija hwome mokle ngokya mwot owaechu münngün chichangba müntsingle thütle.

¹⁶Hwome pangnusa asongle thokle. Tikjaomix hia komhax hokhi opupu achongkya hex? Chemchem chakzing mwotkat-e zingpupa ang: “Ku nange zingkya münchang” chichangba “Nange chem mokle ngopuix ija nange müntsing”, le thüitsuak ang chami?

¹⁷Wanwün kax ta tüikya ningle, alüile chingo homtoxle shonak-lingnu a manzai haxtok ang achangüi ilaxle manzai haxtok a shonak-lingnu ang achangüi.

¹⁸Chemtue ija nyix nguile hüipuix, naba mixbue lai akhongle ekya atat ang kopüi, ilaxle mikpwompabu, opang zangnak fang to ngole hüikya hex, hwom ma mik zamüi ilaxle ngün ang kopüi.

¹⁹JOWANPA Israel nok Zang-e koxkya ma, chitüi-chinang hia pui-naile tüikya khünakbue tamchatle mongmüi angkya ataküi.

²⁰Ija a mix to afangle thomkya hia Zang tha ajaokya oshuk ang achangüi. Ochax khünak pangwüi amütüi.

²¹Zangwün makhange mix tha ajaokyabu, mütkopmixbu kho awakyabu, ilaxle chithaikya mix ang sukya kaxfün chifale abax thomkyabu, ibu Zang-e amaüi.

²²Idaile JOWANPA, Israel nok Zang, owae thamabu chak tokya Abraham khosünle koppuix, chixe thüile: “Ku khünaknu, chingchingchichale athaxpi hünzom awütle münthomüi, ilaxle athaxpi hünzom thünza zakkop laxle huishole ngo ang müntom

²³Chemtue hünzome kue hünzom ang koxkya hünzom naosombu ngünüihex, izuma hünzome ku a Israel nok otsao Zang changle le ngünüi. Hünzome ku achuakachenle changüi ilaxle ku ma abütle ajongüi.

²⁴Ongat khünakbue tikle lax angkya awanle hüiüi, üntoxle opang othuithuima jualanle ngopuix ibue anwot-anokya to mongmüiüi.”