Read Wancho Naga Isaia 3 Bible Online

Isaia 3 - Wancho Naga bible

Isaia 3

¹Athax JOWANPA Khüthak Zang-e, Jerusalem hia Judah, khünaknue mongongle tüikya pangnuli tamchu pangwüi tswonle awüt angkya tu nguile hüi. Chixe hwom sütling hia ti-ja,

²hwom naomüibu hia süpahibu, kaxfünpa hia ajebu, hwom o-nan hia pünpa-chongwang,

³hwom süpahibu hia nguakax-wangkhobu, hwom tingpa-nokpabu hia pangnu chajik-muashem olom twonle ngokyabu, ibu pangwüi chixe apao angkya changle.

⁴JOWANPAe khünaknu a matsongkya naosombu ang apün ang tom angkya changle.

⁵Hwome tata to adale changüi. Naolibue tüichong mixmüibu chathua zale chitüiüi, ilaxle laxli chitüikya khünakbue ma thakma akhokyabu to e-sele chitüiüi.

⁶Saxthom ma womkya khünakbu ma lompa zünlaxle: “Nang ma ning nyiwun thüingaxchu tüile, idaile sikngün pongma kwom lompa ang achanghüile thüi angkya hanpak hüile ngole.”

⁷Ikoxlechu chixe lanüi: “Ku münchangpu! Kue hünzom to fong ang münthopu. Ku ang sütchu müntüi, changtwon-nyiwun chemchu müntüi. Ku a hünzom lompa ang taxzing!”

⁸Changle, Jerusalem a maxdaoa! Judah a nguakle ngole! Hwome akaxkax tamchu amokmok pangwüi JOWANPA zongto omama wüi; hwome ngaithole Zang adale.

⁹Hwome Zang ang oma thüikya hwom hato wüi alüile chatüi. Sodom nok lailaile hwome ngaithole ochax lyenle. Hwom a maxdaoa, ilaxle ija hwome hwom hato alüile apüilaxpu.

¹⁰Otsao khünakbu a mongmüiüi ilaxle hwom zongto jalinu müile hüiüi. Hwome chem hanpakma mokdaopuix ija bama hwom mongmüi ang thoüi.

¹¹Ikoxlechu ochax khünakbu a maxdaoa; hwome mix to chemle hwondaopuix ija athax hwom to hwonüi.

¹²Ngun thalexkyabue ku khünakbu to ada, ilaxle hwom thashe tüikyabue hwom dyen. Ku khünakbu, hünzom lompabue hünzom a othai to zunle ngole, ikhoma chat angkya lom ojahex hünzome müntik.

¹³JOWANPA a chix kaxfün tsetwon ang achwonle ngole; chix a chix khünakbu kaxfün ang achwonle ngole.

¹⁴Onok tüichong mixmüibu hia lompabu a JOWANPAe kaxfün hato apüi ngole, Chixe hwom ma ile kaxhux fele: “Grep haxtok hünzome amapu, ilaxle hünzom homkha a mixshix-zasabu kux pale laxkyae awangle tüile.

¹⁵Ku khünakbu to nutle akhix angkya hia hwom müt hwom shun to jem angkya hünzom ma sukya chemchu müntüi. Ija a, JOWANPA Khüthak Zang kue akaxdaoa.”

¹⁶JOWANPAe thüi: “Hulax, Jerusalem angkya shekobu chemtukux mongngamle tüipuix! Hwome nakuabu ding to laxlaxle ahamle. Hwom a othuithuima kalombu ang achangle ngo. Hwome zingle-zingle chikap muapong tswonle, ilaxle hwom suakto angkya tu-thuak ajik-ajep ang tomle.

¹⁷Ikoxlechu kue hwom to sikangünüi: kue hwom khang ongüi ilaxle hwom a khangkobu ang achangle dantoxüi.”

¹⁸Hanpak nyixta nguingole, chemtue JOWANPAe Jerusalem shekobu angkya: hwom chakzong tu-thuak ma laxlaxle tüikya tu-thuak, khang ma sünkya khüsün, dingkux angkya likwünbu,

¹⁹ilaxle hwome ma thokya züwitbu, ibu pangwüi pao angkya hanpak a. Hwom angkya khangkho nyibu chixe paoüi

²⁰ilaxle khüsünbu; hwom suakto hia kebu ma thokya chajik-muashem hingbu;

²¹hwom chakkhi hia nakuabu ma langkya khoptüt-bingbünbu;

²²müikya-müikya hwom zapua, nyilo, nyiwun hia nyitsongsabu;

²³hwom ahokya nyiwunbu, thünfwot nyi hia hwom jaknyibu, ilaxle awaxle hia ashaile awunkya hwom khangkho nyibu, ibu pangwüi pao angkya hanpak a.

²⁴Ongan müikya twonhaxkux lüima, hwom onom-osya ang changüi; müikya züpakbu laxtülüi ma pak zu awitüi; kho-wan müile changhaxkux ma, hwom khangko ang changüi; nyi-za lüima, hwome nyikhwon laxüi; hwom sünmüi a zakkop ang changüi!

²⁵Tingnu angkya khünakbu, changle, tüle tsak-zongle tüikya khünak ngaxchu, zanhok ma max ang tomüi.

²⁶Tingnu panbu a mangtsakya hia sopkyae awangle tüiüi, ilaxle tingnu jaojao sheko mixnu tuita ohua ma haxkha to thungle ngokya ningle tüiüi.