Read Wancho Naga Isaia 31 Bible Online

Isaia 31 - Wancho Naga bible

Isaia 31

¹Ijip nok to fonghüile kakyabu a maxdaoa! Hwome Ijip nok ma tüikya süpahi tsak-zong — man, man-kanlin, hia cha makhange azankya süpahi, iningkyabu to ongle. Ikoxle hwome Israel nok otsao Zang, JOWANPA to a mün-ong chichangba chix ma asun angkya bama tikshole münchang.

²Chixe chem mokngopuix chixe awanle! Chixe thama ahüi. Chichangchizangkya khünakbu hia hwom kho-awakyabu to sikangün angkya hanpakma chixe chix mwot mokle.

³Ijip nok a baozangbu chichang — hwom chuwüi khünak. Hwom manbu a zangkho tokya tsak-zong füi tüikya chichang. Chemtue JOWANPAe moküihex, chongkya onok ngaxchu abünüi, ilaxle zong chitüikya onokbue fongkya chem angchu chichangüi. Okhi pangnyi wüi amütüi.

⁴JOWANPAe ku füi akax: “Chunnyetmixbue tütatukux akhong-akha lechu naxchang, chixe kopdaokya müi süt athole mailang zale münpao; ija lailaile, JOWANPA Khüthak Zang, kue Zaion Haxnukho-awa angkya ku abax ang owaechu müntho.

⁵Osa tuitae ozop kha angkya hosa kho-awa ang ozop zui akhople pile ngokya ningle, ija ningle JOWANPA Khüthak Zang, kue Jerusalem kho-awaüi ilaxle ija ziakople thomüi.”

⁶JOWANPAe thüile: “Israel khünaknu, hünzome ku zongto ochax lyendaoa ilaxle ku füi alünle ajongle. Ikoxle athax, ku hato anongle chat-hüi!

⁷Khop hia hun makhange zingkya chapabu tswonle awüt angkya hünzom pangnusa hato hanpak tuita hüile ngole.

⁸Asiria a zanhok ma amütdaoüi, ikoxle khünak tsak-zong makhange münchang. Asiria nok a zantho to paoüi, ilaxle hwom naosünbu a zanda ang achangüi.

⁹Hwom chongwangpa a chabüt-lasünle zikle paoüi, ilaxle chix nguakax wangkhobu a hwom zankat nyiluak to apüi awütle toxle abütüi.” JOWANPAe akaxdaoa — JOWANPA owa to Jerusalem ma shwompuix ilaxle töbu kox ang owa wün ikhama atsople changpuix.