Read Wancho Naga Isaia 32 Bible Online

Isaia 32 - Wancho Naga bible

Isaia 32

¹Hulax! Wanghom tuitae pangnu lom ma sule apünüi, ilaxle onok lompabue sukya kaxfün füi tingjit-nok-awaüi.

²Hwom pangwüi zangchei-zangwat thoto khangkhom angkya pom ningle changüi. Hwom a sak-hax to jenkya shuajen ningle changüi, kohwon fato longnu tuita nuk angkya zangkhung ningle.

³Khünaknue lomkya to pongza angkya hanpakma hwom mik hia na daple thomüi.

⁴Hwom chiadukya nox müntüiüi, ikoxle hwom chem tsingpuix ija tix moküi tamchu zex-wünle changüi.

⁵Ongat mix achuak-achen angkya chichangba tselop mix sukya ang lax angkya owa mong tochu münthütüi.

⁶Angae ongat zangwünüi ilaxle ochax mwot mok angkya ajangüi. Chixe chem mokpuix tamchu chixe chem wünpuix ibu a JOWANPA ajao-ahaikya changpu, ilaxle chixe woknuak khünak otuechu müntux ilaxle tilan mix ang ti alingle münchangtox.

⁷Ongat-ongüi khünak a ochax khünak changle ilaxle ochax mwot mokle; chixe atsele zangwünkya füi chitüi-chinang khünak tha ama angkya olom zingle ilaxle ibu ang hwom süntswon kop ang chitomle tsyenle.

⁸Ikoxlechu achuak-koxle sule tüikya khünake mwot sule mokle ilaxle chem supuix ija bama shingmongle ajongle.

⁹Hünzom shekobu opang ma mongtextex ma ngolaxpuix, khosam-nasüi chemchu chitüile a, kue akaxkya to apahüi.

¹⁰Athax hünzom a mongtex ma shale chu ngokoxlax, ikoxlechu ngaizang itu shene hünzom a khosam ma ngoüi chemthüikoxle nange athün angkya hanpakma grep ziak ojao müntüi angkya changle.

¹¹Hünzom a ma mongtextex ma ngole hüidao, khosam-nasüi chemchu chitüile; ikoxle athax, zale abünpu! Hünzom nyi-za sikle awütlax ilaxle wok-hit nyi füi wok hitlax.

¹²Mongmaxkya füi ma khaxtok to alüile chietlax chemthüikoxle haxzao füikya haxtok hia grep haxtok pangwüi amadaoa,

¹³ilaxle hux pün hia kongbüi zubu ku khünaknu haxtok ma nyemle ngole. Hünzom mongmüi atungle ngokya hom-hax pangwüi tamchu khüzüne awangle tüikya tingnu tuita hanpakma.

¹⁴Chongwang homlo ngaxchu wüi dantoxüi ilaxle pongwün tingnu owüiole awüt-toxüi. Hom-hax hia zanhunui chempange hwom khosünle thomkyahex ibu pangwüi othuithui hanpak ang amaüi. Fao mantsakbu ikhato ahamüi, ilaxle chunbue ikhato fumtsütle saxüi.

¹⁵Ikoxle Zang-e tamchatle kem hato chix chasa ajoüi. Awütle thomkya haxtok haxzao füikya haxtok ang changüi, ilaxle haxtok ma tüle-tüle puamünüi.

¹⁶Haxtok ma pangnu khato otsao hia sukya olom ma tsuakle hüiüi.

¹⁷Chemthüikoxle pangnusae wüi chem supuix ija tix moküi, ilaxle othuithui hanpak ang tumüi mongsom hia chalomkya tüile ngoüi.

¹⁸Zang khünakbu a khosam angkya müntüiüi, hwom homhax mongsom hia ziakop ma ngoüi.

¹⁹(Ikoxlechu faokhato jun dütüi, ilaxle tingnu a thuple ashixüi.)

²⁰Manzai hanpakma ti okhonguile tüi tamchu mantsak hia maihu-osu hanpakma pangkhato wüi fumchui müile tüikya khoma noknusa ang mongmüikya tüiüi.