Read Wancho Naga Isaia 34 Bible Online

Isaia 34 - Wancho Naga bible

Isaia 34

¹Oman, onok-onok tokya khünaknubu! Akhople asoxlax ilaxle apalax. Zangfang pangnu tamchu ima ngokya pangnusa ikhato ngui üntoxle apakoplax.

²JOWANPA ang chaxwannu nok hia hwom süpahibu füi mongmale. Chixe hwom max angkya hanpakma ahaile changdaoa.

³Hwom mangbu a münakhünüi, ikoxle ikhato thüile shanle tamchu sumle pao ang tomüi; ilaxle haxhuabu a aji füi khile changüi.

⁴Lyetnu, zanghan, ilaxle lyettsibu a haxbu ang achangle akhixüi. Zangding a dom atünkya ningle atünle awütüi, ilaxle lyettsibu a grep chak hia fupsa chakbu dütkya ningle dütmaxüi.

⁵JOWANPAe chix changlo zangkangting to achwonle tüile, athax ijae Edom to thupüi; ibu khünakbu a amüt angkya wüile ahaidaokyabu changle.

⁶Chix changlo a, tö kox ang lang pongkya chun aji hia ozao lailaile hwom aji hia ozao füi awangle tüiüi. JOWANPAe chix tö a Bozrah tingnu ma koxüi; chixe ija a Edom haxtok ma tö koxle müi langkya khama achongkya ang achangüi.

⁷Fao maihupong hia huzanpongsabu ningle khünaknu nguaküi, ilaxle chaxwantok a aji hia ozaoe awangle changüi.

⁸Ija a JOWANPAe Zaion khosünle kopüi ilaxle she zanpabu to jannong alüile chang angkya hanpak changle.

⁹Edom angkya shuajenbu a nakkya nüiti ang achangle paoüi, ilaxle hax a khat ang achang paoüi. Ija onok abakle müinak ningle shunle paoüi.

¹⁰Ija a zangnak zangngaile chuale ngoüi, ilaxle ija makhange jento wünkhut laile ngoüi. Tsün-tsün to ija haxtok a awütle thomkya haxtok ang ngoüi, ilaxle imakhange athax owachu chiahamüi.

¹¹Okhux hia okunbue ija haxtok awangüi. Ija a tamchatlechu JOWANPAe haxkozan ang achangüi, ija a chaxwannu zingüi thoto wüi tüingokya ningle changüi.

¹²Ija haxtok to apün ang wanghom chitüiüi, ilaxle lompabu tuita chu chitüile changüi.

¹³Chongwang homlo hia long katuk füi swonle tüikya tingnu pangkha to hux hia kongbüibu nyemle changüi, ilaxle ikhato hijan hia shwonbu ngoüi.

¹⁴Ikhato faomüibu ahamle ngoüi, ilaxle baobue tata anyak-alomle changüi. Zangnak ma pwonkya bao ngo angkya onui lomle ikhato nguiüi.

¹⁵Okhuxbue ikhato ozop zingüi, o-tibu lütüi, hosabu joüi, ilaxle ibu to humele changüi. Tuita füima tuitale okunbu ikhato asoxüi.

¹⁶Zünmokbu bama zakya JOWANPA laipex ma lomlax ilaxle ijae chemle akaxpuix e-lax. Ibu ozün zünmokbu tuita chu chitüile müntox, ilaxle tuita chu hanshem chilax homtoxle münngo. Ija ile chang angkya JOWANPAe kaxtom koxle changdaoa; ibu pangwüi tomle chix jaoe apüiüi.

¹⁷Hwom bama haxtok ahanle kox angkya a JOWANPA ilaxle hwom pangwüi ang süntom kox angkya changle. Tsün-tok to-tsünle ibu ikhama ngoüi, ilaxle ija haxtok a jento hwom kux ang ngoüi.