Read Wancho Naga Isaia 40 Bible Online

Isaia 40 - Wancho Naga bible

Isaia 40

¹Zang-e akax: “Ku khünaknu mong asomkox, hwom mong asomkox!

²Jerusalem angkya khünakbu ang mong achenkox. Hwome okuilole jao sikngün apongdaoa ilaxle athaxpi hwom ochaxbu thailak tüidaoale thüikox. Kue hwom to hwom ochaxbu khoma okhonguile sikangündaoa.”

³Kaxzing tuitae akhongle, “Khünak chingokya haxtok to JOWANPA hanpakma lomtang achwonkox! Sak-hax to kem Zang hanpak ang lom atsaole zingkox!

⁴Haxbang pangnusa awang kox; haxnu pangwüi ajitkox. Haxkhobu a haxsha ang achangüi, ilaxle ofün chimüikya nok fün müile zingüi.

⁵Ifüima JOWANPA fuazang ngaile ahoüi, ilaxle ija khünaknüsa noke wüi ngünüi. Ija a JOWANPA chix jaoe tsaokya kax changle.”

⁶Kaxzing tuitae akhongle: “Kaxho Müikya apuk-kox.” Kue atüi: “Kue chem kaxho apuküi?” “Khünak nüjen pangwüi hingzang lailai; hwom tsün a fao maipua tsün tukux wüi loüi.

⁷Hingzangbu zile paoüi ilaxle maipuabu hüile paoüi, JOWANPA zangwine hwom to jepkya zuma a. Hingzang thatankya tukux ngaxchu khünaknu tha müntan.

⁸Changle, hingzang zanle paole ilaxle maipua hüile paole, ikoxle Zang kax a othuithuima ngoüi.”

⁹Jerusalem, haxnu tsuakya kho to donglax ilaxle kaxho müikya apuklax! Akhongle nyakkox, Zaion; kaxho müikya apuk-kox! Ojao taxza ikoxle apuk-kox. Judah angkya tinglongbu hama apuakox Zang nguile ngole le a!

¹⁰JOWANPA Khüthak Zang a tsak-zong füi apün ang nguingole, chixe sünle kopkya khünakbu chix füi tomle laxlaxle a.

¹¹Chunnyetpa tuita ningle chixe chix chunbu to humele changüi; chixe chun hosabu jongta khama afoxüi ilaxle ibu chix chak-hüi ma paiüi; chixe chun honu hwom zaxhun ma zunüi.

¹²Chak ma puix laxle owawae molo tinu thüt ang tho ang cha chichangba fak tin laxle owawae zangding thüt ang tho ang cha? Wansa tuita ma owawae chaxwan tok angkya hax kople thom tho ang cha chichangba tuak ma haxnu hia haxhuabu thüt ang tho ang cha?

¹³Chem mok angkya hex ija owawae JOWANPA füi akaxtsuak ang chami? Chix hama anwot-ano angkya chichangba zün angkya owa thoüi?

¹⁴Zang-e owa füi mongzangwünle changüi awanle kop angkya hia tsingle lax angkya tamchu chemle mokle ashuk-azaüi hex lea?

¹⁵JOWANPA zongto chaxwannu nok a chemchu münchang, ti thwot tuita tukux ngaxchu münchang; tsailo tokya shuazobu a haxbu ningle chazangle.

¹⁶Lebanon faonu ma tüikya müi pangwüi Zang ang tö kox angkya okho münngui ilaxle ikha ma tüikya pünbu a ima lax ang tak ang okho münngui

¹⁷Chaxwannu nok a chix zongto chemtha chu münchang.

¹⁸Zang a owa füi tomta apyenüi? Chix iningle tüile le nange chemle akhix-akhanüi?

¹⁹Chix a zingpabue zingkya chapa ningle chichang, ija janjao mixe hun füi chwople zing ilaxle ija khop dingma athongle dan.

²⁰Khünak opange khop hia hun füi zing ang chitho laxpuix sumle chipao angkya pün füi zingle. Chixe zingpa tuita lomle ataküi nguakle chipao angkya chapa zing ang a.

²¹Nange müntsing hexnyi? Nang hama kaiwüi mawün hexmi? Chaxwannu chemle owang wangpuix nange ma atat hexmi?

²²Ija a zingle alaikya mix a chaxwannu thak to zangding kai to thungle tüikya mixe zingpu; fangchi tokya khünak a tsükhi-tsiksa pongle ngün. Chixe zangdingkho a dom pünkya ningle pün, ngo angkya hanpakma zingkya nyihom ningle.

²³Chixe tüle tsak-zongle tüikya apün-awangkyabu athom ilaxle hwom chem angchu chichangle ahik.

²⁴Za ngale ibu küi, za ngale thwom, müt-mütle tsaxsa tula otsing ju ang tom. Chemtue JOWANPAe zangwin ahüipuix, ibu a zanle zi ilaxle tsaxfa ningle pikle pao.

²⁵Otsao Zang a owa füi apyenüi? Chix lailaikya owawa tamtüi chami?

²⁶Zangdingkho to angakle huhu! Hünzome ngünkya lyettsibu owae zing? Owae ibu süpahibu ningle azuile tüipuix, chixe ibu obi tüipuix awanle ilaxle pangnusa ang mün ma nyakle! Chix tsak-zong a tüle chongle — ibu khama tuita chu münmax-münsam!

²⁷Israel, jangchangba nange chem ang kaxthup-ngaotünle JOWANPAe hünzom sikngün müntik chichangba olom ma chichangkya sikngün apongkya to münhule le thüipu?

²⁸Hünzome müntsing hia? Hünzom ma atat hia? JOWANPA a oshuk chitüikya Zang changle; zangfang abakle chixe zingle alaipu. Chix a otuechu münna-münjua. Chix tutex owaechu müntsing tho.

²⁹Otsak-ozong chitüikyabu ang chixe tsak-zong koxle.

³⁰Tsongtan chazün-sünzün ngaxchu shonaile; tsünzünbu ngaxchu zaktho-lehale maxle.

³¹Ikoxlechu opangsa JOWANPA to mongong thompuix ibue hwom ang janzüi tüile ngokya awanle laxle. Hwom a lawangbu ningle ozang füi piüi; hwom ziküi ikoxle china-chijuaüi; hwom ahamüi ikoxlechu chisho-chinaiüi.