Read Wancho Naga Isaia 41 Bible Online

Isaia 41 - Wancho Naga bible

Isaia 41

¹Zang-e thüile: “Danglax ilaxle ku kax to apalax, hünzom tsailo nokbu! Hünzom zangwün khwa to apüi ang achwonlax; hünzom ang zangwün angkya onox koxüi. Chem supuix ija zün angkya hanpakma tomle asoxhax.

²“Handünchi tokhange anaole hüikya ija a owa, chix alele chito chixe wüi anaokya a? Wanghom-wanghombu hia onok onokbu to lüt angkya chix ang janzüi owae kox? Ibu a haxkhix-labu tukuxle chix changlo fang ma nguak. Chix sanhap tuntho to hwom a tsaxsabu ningle pikle pao.

³Chixe achuale ilaxle thomzünkya chitüile zik, hax to ngaxchu chilyetkya hia lyetkya nyi bama momle pi!

⁴Ija ile chang ang tomkya a owahex? Pukax ile achang angkya owa mong ma ajang tsuak? Ku, JOWANPA, a pongwang tokhange wüi ikhama tüikya, ilaxle ku, JOWANPA, kua oshuk kople ikhama ngoüi.

⁵“Kue chem mokpuix tsailo tokya noke ngaxchu ngündaoa; ibu a abüt-aban ilaxle zale abün. Ikhoma hwom pangwüi asox ilaxle ngui.

⁶Zingpabue fong ilaxle tata ang mong achen.

⁷Pün zingpa-e hun jao mix ang thüi: ‘Müidaoa!’ Khünak owae chapa nünfuile thuple jaopuix ibue ibu janlak füi takle amongkyabu ang mong achen. Hwome thüi: ‘müihule’ — ilaxle ija chapa hwome janlakbu füi takle among.

⁸“Ikoxlechu hünzom, Israel nok ku dabu, hünzom a kue zünle kopkya khünakbu changle, ku zuikhui Abraham su-sa hwom a.

⁹Kue hünzom haxtua-zangnam tokya apüipu; kue hünzom ochu tokya nyakle apüipu ilaxle hünzom ang thüipu, ‘Hünzom a ku dapabu changle.’ Kue hünzom chilaxle chiawüt, ikoxle zünle mix koppu.

¹⁰Ojao taxza — Ku a hünzom füi tüile! Ku a hünzom Zang — hünzom a chem ma chu taxabüt! Kue hünzom tsak-zongle zingüi ilaxle asunüi; kue hünzom kho-awaüi ilaxle hünzom khosünüi.

¹¹“Opang hünzom füi mongtsik-mongmale tüipuix ibue hwom to lütkya thünzak kopüi. Hünzom füi azankyabu a zi angkya ataküi

¹²ilaxle chaxwannu thün angkya jao samle paoüi.

¹³Ku a JOWANPA hünzom Zang changpu; kue hünzom ang janzüi koxlaxle thüipu: ‘Ojao taxza; kue hünzom to asunüi.’”

¹⁴JOWANPAe thüile: “Israel, hidaole wüi tamchu sho-naikyabu changle, ikoxlechu taxza; kue hünzom to fongüi. Ku, Israel nok otsao Zang, ku tix changle hünzom khosünkya a.

¹⁵Kue hünzom a tsaxnakkya oling-olak ang achangüi, owa anaxkya hia ozün füikya a. Hünzome haxnu to nakle akhixüi ilaxle ibu pangwüi amaüi; haxhuabu a haxbu ang achangle nakle asumüi.

¹⁶Hünzome ibu zangwin to chapüi; zangwine ibu jeple pik paoüi; ilaxle hwom a zangcheie chiakle awütüi. Ifüima ku a hünzom Zang chang koxle hünzom ang mongmüiüi; hünzome ku, Israel nok otsao Zang achuaküi.

¹⁷“Chemtue ku khünakbue mwot tüipongma ti lomle changüihex, chemtue tilane hwom dingdua zanle changüihex, ipongma ku, JOWANPAe, hwom zangjop to lanüi; Ku, Israel nok Zang-e hwom otuechu danle müntox.

¹⁸Haxkozan haxhuabu tokhange kue shuajen jen ang tomüi ilaxle haxsha to tümik fuakle ti jen ang tomüi. Kue sak-hax a ti atungle ngokya nui ang achangüi ilaxle haxkozan tümik fuakle tijen nui ang achangüi.

¹⁹Kue sak-hax to sedar pünbu nyem ang tomüi, ilaxle akasia, martul hia olip ibu pün nyem ang tomüi. Haxkozan shonak-lingnu ang achangüi, ikhato pain junipar hia saipres ibu pün nyemüi.

²⁰Khünaknue ibu ngünle laxüi ilaxle awanüi ija a, JOWANPA, kue mokkya changle le. Hwome tsingle lax angkya hato hüiüi ilaxle ija a Israel nok otsao Zang-e mokkya changpule.”

²¹JOWANPA, Israel nok wanghom, chixe ija akax angkya tüile: “Hünzom mixnok baozangbu, hünzom zangwün apüilax. Hünzom ma tüikya atsi-alakya zangwün sümüikya apüihüi!

²²Ikhama nguilax ilaxle chempang changüihex ija ajelax, ile chang koxle ija ile ngaikya zuma kwome awanüi. Khwalo ma ledaokya zangwün akhixle wünlaxkox, ilaxle kwom hama ija chem hanpak-hex apuale fahüi.

²³Füichi ma chempang koplax ngopuix kwom hama wünhüi — ikoxle tix hünzom a baozangbu changale kwome tsingüi! kwom zakya hia chabüt-lasünle naxchang ang; tütali müikya moklax chichangba tütali thama apüilax;

²⁴Hünzom tamchu hünzome mokkya tütachu chichang; hünzom to shwom-tole changkyabu a nushix dongkyabu changle!

²⁵“Kue handün chito ngokya khünak tuita zünle kopdaoa; Shuakuxchi makhange sing ang kue chix apüiüi. Chixe haxthom to nakpupule apün-awangkyabu to naküi, tikjaomix-e haxthom to nakpupu lea.

²⁶Kwome nang a otsingtsing wüi thüikya zongma Ija ile changüile hünzom khama owae ajeüi, hünzom khama tuitaechu ija bama kaxfa tuita chiakax; nange zangwünkya owaechu chiatat!

²⁷ku, JOWANPA, tix changpu ija kaxho Zaion hama wünle fakya mix a; Ija kax akax ang kue Jerusalem to kaxhomix tuita akat, Hünzom khünakbu nguile ngole! Hwom a hom to nguile ngole!

²⁸Chemtue kua baozangbu khato hule anopuix, hwomkha angkya owaechu chemchu akax angkya chitüi; kue atüikya kax to hwom opupuechu lan ang chitho.

²⁹Baozang ibu a laxli müntüi; hwome chemchu mok ang müntho — chapa ibu a tsak-zong chemchu chitüikya changle.”