Read Wancho Naga Isaia 42 Bible Online

Isaia 42 - Wancho Naga bible

Isaia 42

¹JOWANPAe thüi: “Ku dapa ikhama tüile, kue tsak-zong koxkya mix a — kue kamle kopkya mix, owa füi ku mongmüile ngopuix. Kue chix ku Chasa füi awangIe koxle, ilaxle chixe pangnu nok ang wüi sukya kaxfün faüi.

²Chix mün-akhong chichangba kaxzing mün-alai chichangba tingjang lomnu to khongkhongkhale münchang.

³Ahüile ngokya acha tuita chixe münapak chichangba zuma wünchuale ngokya wüntik münamüt. Chixe pangnusa hato okuilole ngokya sukya kaxfün apüile.

⁴Chix ang chahix-monghixkya müntüiüi; chixe chaxwannu ma sukya kaxfün apüiüi. Tsailo noke chix hwon-nwot bama tanle ngole.”

⁵Zang-e zangdingkho zingle alai ilaxle ija sha; chixe chaxwantok hia ima ngole tüikya pangwüi aza-apuale kox; ikhama tüikya khünaknu pangwüi ang chixe khüzün hia zakdün kox. Ilaxle athax JOWANPA Khüthak Zang-e chix dapa ang thüi:

⁶“Ku, JOWANPAe, nang nyakdaoa ilaxle tsak-zong koxdaoa ija a chaxwannu ma sukya kaxfün tsuak angkya hanpakma. Nang makhange kue khünak noknusa füi tsaotsütle; nang makhange kue chaxwannu nok hato zangngai apüiüi.

⁷Nange mike chingünkyabu ang mik daple kox angkya changpu ilaxle zangnak fangto kun khato ngokyabu alai angkya changpu.

⁸“Hünzom Zang a JOWANPA ku tix changpu. Owa baozangechu ku fuazang ahanle lax ang müntho; kue chapabu ang ku to shwom-tokya khama wom ang müntom.

⁹Kue ajele akaxkya kax athax changle ngaidaoa. Athax kue nang hama muakya jali wünfang ibu changle mangaiba wüia.”

¹⁰JOWANPA ang tsaizün tuita ngaokox; chix achuakle ngaokox, chaxwannu pangnu! Chix achuak kox, hünzom tinu mongto khua ma ahamkyabu; chix achuak kox, tinu mong tokya zünmoknüsae! Ngao kox, ikhato ngole tüikya tsailo nokbue!

¹¹Sak-hax hia ima tüikya tinglongbue Zang achuak kox; Kedar angkya khünakbue chix achuak kox! Sela tingnu ma ngole tüikya khünaknue haxnukhobu tokhange mongmüi to akhong kox!

¹²Tsailo nok to ngole tüikyabu JOWANPA ang achuakkya hia fuazangkya laxkox!

¹³JOWANPAa naomüipa tuita ningle azan ang kale; zanhok ma apong ang chix achwonle tamchu mongtsule tüile. Chixe tinglyetle, ilaxle zan-o zan-ole akhongle; chix zanpabu hato chixe chix tsak-zong ahole.

¹⁴Zang-e thüile: “Okuilole ku dangle ngodaoa; kue ku khünaknu kax to chilax. Ikoxlechu athax mok angkya hanpak nguile hüidaoa; Sheko mixnu nao ngün ang awao pupule ku akhongpu.

¹⁵Kue haxhua hia haxnubu amütüi ilaxle hingzang hia pün-zuabu zanle zi ang tomüi. Kue shuajenbu a sak-haxsha ang achangüi ilaxle tüküibu zan ang tomüi.

¹⁶“Kue ku khünak miksutbu lom azuiüi hwom a lomnu makhange otuechu ma-aham. Kue hwom zangnak ang zangngai ang achangüi ilaxle hwom tunthoma tsoxtsütkya lomnu ajitjuile zingüi. Ibu a ku kaxtsaobu changpu, ilaxle ibu otuechu chichang homle le ang müntom.

¹⁷Opange chapabu to mongongle tüilaxpuix, opange omuabu ang baozangbu le nyakle ngolaxpuix, ibu a zakkople thünkhux-thajao ang tomüi.”

¹⁸JOWANPAe thüi: “Apalax, hünzom naba mixbu! Soxle hulax, hünzom mik apwomkyabu!

¹⁹Ku dapa to kaile mik apwomkya mix tüicha, ku mwot-tsan mix to kaile nabakya mix a?

²⁰Israel, hünzome müimamale ngünle laxdaoa, ikoxle ijae nang zongto chem chang? Atat angkya hanpakma nang ma na tüipu, ikoxle hünzome chemtom tata atatle lax?”

²¹JOWANPA a khosünle kopsele mongtsukya Zang changpu, ikhoma chixe chix wanlombu hia chix hwon-nwot ding to nwonle, ilaxle chix khünaknue chix achuak-achenle namchangbae le texle.

²²Ikoxle athax chix khünaknu a pünpakle amadaoa; hwom a jankun khato shole thomdaoa ilaxle kun khato shole khomle thomdaoa. Hwom tuina tsuidaoa ilaxle amadaoa, hwom khose ang ngui angkya mix owachu chitoxle.

²³Owawae ija to apa ang chami? Athax makhange nange mongkoxle apa ang chami?

²⁴Tsüile pao angkya khünakbu chak to Israel nok owae dan? Ija a, owa zongto keme achax ngopuix, JOWANPA chix jaojao changle! Kem chixe chemle naxngole texpuix ija ningle chingo chichangba chixe koxkya hwom-nwot kax ma laxle chitüi.

²⁵Ikhoma chixe kem to chix mongtsik po ang tom ilaxle azankya ma ziama lejao sikngün ang tom. Israel pangnu khato chix mongtsik a wün lailaile chua, ikoxle chempang changngopuix keme otuechu chiawan; ija makhange keme chemchu tsingle chikop.