Read Wancho Naga Isaia 45 Bible Online

Isaia 45 - Wancho Naga bible

Isaia 45

¹JOWANPAe Sairas a wanghompa ang kam! Chixe ku a chaxwannu nok tingtak tsuak angkya hanpak ma kam; chixe chix a wanghom tsak-zong züpak da angkya hanpakma ahüi; JOWANPAe chix hanpakma tingnubu pan dapüi. JOWANPAe Sairas ang akaxle:

²“Kujaoe nang hanpakma lomtang achwonüi, haxhua hia haxnubu ajitle zingle. Kue tu-jan makhange zingkya zün pünüi ilaxle ibu angkya jantombu thuple akhixüi.

³Kue nang ang tuina zangnak hia otsao nui tokya faüi; ifüima nange ku a JOWANPA changpule awanüi, ilaxle Israel nok Zang-e nang a mün ma nyakle.

⁴Kue nang ku da Israel nok to fong ang kampu, kue zünle kopkya khünaknu. Kue nang ang tüle chongkya achuak-achenkya koxdaoa, hünzome ku awanle kop angkya wüi.

⁵“Ku a JOWANPA changpu; mama baozang owachu müntüi. Kue nang ang nange laxse tsak-zong koxüi, nange ku owahex chitsing koxlechu.

⁶Chaxwannu tüchikao makhange atakao alople nang a JOWANPA changle ilaxle mama baozang owachu müntüile pangnusae tsingle naxkoplax ang kue ija mokpu.

⁷Zangnak hia zangngai pangnyi wüi kue zingpu; mohiman hia thama pangnyi wüi kue apüipu. Ku, JOWANPAe, ibu pangwüi mokpu.

⁸Zangdingkho tokhange zangwat ningle kue lütkya ahüipu; ija pongle kop ang chaxwannu kadapüi ilaxle mongtex pan-dankya hia sukya kaxfün puale laiüi. Ku, JOWANPAe, ija ile chang ang tomüi.”

⁹Komhaxe ija tikjaomix füi alakya tüi ang chami, mamabu pangnu füi talailaile tikkux tuitae a? Komhaxe jaopupa ma chixe chem mokpule atüichami? Komhaxe ija jaopupa ang ojao münman le kaxthup-ngaotün ang chami?

¹⁰Owawae “Hünkhie ku ile büthüikoxle zingpu?”, le atüi ang tho ang chami?

¹¹JOWANPA, Israel nok otsao Zang, owae füichi hanpak zing ang thopuix, chixe thüile: “Hünzome kusu-kusa hwom hanpakma atüi angkya chichangba kue chempang mok angkya hex ija bama apuafa angkya olom müntüi!

¹²Chaxwannu zingle alaikya a ku changpu ilaxle khünaknu ikhama ngo angwot ang zingkya changpu. Ku tsak-zong makhange kue zangding shapu; Kue lyetnu, zanghan, hia lyettsibu pangwüi ziakople thompu.

¹³Sairas ang ile mok angkya mong kue atwoppu ku mongtex mwot tsuak ang tamchu jali otia ma thom ang. Chix lekya lomtang pangwüi kue tangthole zingüi. Chixe ku tingnu Jerusalem chatle azünle zingüi, ilaxle kople thomkya ku khünaknu danüi. Ija mok angkya hanpakma owaechu chix münshak chichangba zuizun münkox.” JOWANPA Khüthak Zang-e akaxdaoa.

¹⁴JOWANPAe Israel nok füi akax, “Ijip hia Etheopia angkya tuina hünzom kux ang changüi, ilaxle Seba angkya tomchong hualo khünakbu a hünzom dabu ang ngoüi; janbüi füi hwome hünzom mantole changüi. Hwome hünzom chitong ma akhuxlaxle ngaiüi, ‘Zang a hünzom füi tüile — Zang a chix tix changpu.

¹⁵Israel nok Jowanpa, owae chix khünaknu khosünle koppuix, chix a azwonle ngokya Zang changpu.

¹⁶Opange chapabu zingle changpuix hwom pangwüie thünzak kopüi; hwom pangwüi ema chilaxle awütüi.

¹⁷Ikoxle Israel a JOWANPA khosünle, ilaxle she-e lütkya jento ngoüi; she khünaknu a otuechu chie-chisele müntoxüi.’”

¹⁸JOWANPAe zangdingkhobu zing — Zang a chix tix changpu! Chaxwannu a chixe zing ilaxle alai — chixe ija othuithui hanpak ang zing. Chixe ija khünak chingole awüt tox ang zingkya chichang, ikoxle khünaknu ngo angkya kha ang zing. “Ku a JOWANPA changpule chixe thüipu, ilaxle zang mama owa müntüi.

¹⁹Kue huxsa ma zang chiwün chichangba ku mongtex pyenle chithom. Kue Israel khünaknu ang khünak chingokya haxtok to ku lomlaxle chithüi. Ku a JOWANPA changle, ilaxle kue kaxtsing zang wünpu; Chem supuix ija kue awanle fapu.”

²⁰JOWANPAe thüi: “pangnusa asox hüi, chaxwannu nok angkya khünakbu, wangting max pongma azangle tüikyabu pangwüi; hünzom a thwonle ano ang koxlax! Khünaknu opange hwom kux pün chapabu füi tüipuix opange hwom azün ang chitho angkya baozangbu to shwomle ngopuix — khünaknu opange chemchu chitik-chiwanle tüipuix!

²¹Ngui laxle khwa ma hünzom tsetwon-zangwün apüilax; hwome tata ma tikshole naxlaxkox. Chempangle changüihex ija kaiwüi owae ajele thom? Chix khünaknu khosünkya Zang, ija JOWANPA ku münchang hexmi? Iboma mama baozang owachu müntüi.

²²“Athaxpi ku hato mong chatlax ilaxle khosünle koplax, zangjang angkya khünaknu! Zang tuita wüi tüikya ija a ku.

²³Ku kaxtsao a otsingtsing changpu, ilaxle ija alüix angkya münchang. Ikhoma ku chemle tüipuix ile kue tsaosaxpu; Noknusa wüi ku hato nguiüi ilaxle akhuxüi ilaxle ku kax ma laxle ngo angkya tsaosaxüi.

²⁴“Ku makhange tix wüi lütkya hia janzüi kopüile hwome thüile; ikoxlechu ku thua anule tüikya pangwüi e-sekya chitüile toxüi.

²⁵Ku, JOWANPAe, Jakop su-sa hwom pangwüi khosünüi, ilaxle hwome ku achuak-achenle changüi.