Read Wancho Naga Isaia 47 Bible Online

Isaia 47 - Wancho Naga bible

Isaia 47

¹JOWANPAe thüi: “Babilon, nang tüntongkho tokya juün, ilaxle haxkha to haxbu khato ngoün. Hanpak tuita ma nang naochasa ningle tüikya, tingtakle machangkya tingnu tuita ningle a, ikoxle athax nang puinaile hia tsaothale tüchitüi! Athax nang a da tuita changle!

²Saxthut longkhao anguixkox! An thukox! Nang thün-khung nyi sikdao ilaxle nang nyilo sikdao! Shuata angkya hanpakma nang nyi laolax!

³Khünaknue nang a ohua ma ngünüi; hwome nang puinaile tamchu zakkople ngünüi. Olüix kue khomüi, ilaxle ku owaechu münabaxüi.”

⁴Israel nok otsao Zang-e kem dan-e— chix mün a JOWANPA Khüthak Zang.

⁵JOWANPAe Babilon nok ang thüi: “Dangjajakya hia zangnak fangto ngolax; hwome athax nang ang zangfang wangchanu le münnyakpu

⁶Ku a ku khünaknu füi mongtsikle ngokya; kue hwom to ku kux chichangkya ningle hwon: kue hwom a nang tsak-zong chak to kox, ilaxle nange hwom hato chingcha ojao chiaho; zunu-zupabu to ngaxchu nange ziamale hwon.

⁷Nange nang a othuithuima wangchanu ang ngoüile thüt, ilaxle ibu mongkha to zule chilax chichangba ibu oshuk chemle shuüi chiajang.

⁸“Ija to apalax, nang mongmüi angkya oli to künkya mix, nang a nang to owae chemthüithoüile thütkya mix. Nange nang a Zang füi tomwüile akax tsuak — nang lailaikya owachu müntüile akax. Nange nang a thanu tuita ang achangüile otuechu chithüt chichangba nang su-sabu max-zile samkya thama apongüile chithüt.

⁹Ikoxle noxtakya bama, nyixtakya fang ma wüi, ibu pangwüi changle hüiüi. Nang ma tüle khun-hing twonle ngokoxle chu, nange nang kakopa hia naosom hwom amüt-asamüi.

¹⁰“Nang ochax ma nang to chemthüiüile nange thüt; nang owaechu ngün ang münthoüile nange thüt. Nang je hia hwome nang lomchei to zunle pao, ilaxle nange nang füi akax, ‘Ku a Zang changle — ku lailaikya mama owachu müntüi.’

¹¹Thama nang to shingle nguiüi, ilaxle nang khun-hing chemechu abaxle azak ang chithoüi. Allele nang hato thama angkya hüiüi — nange wünmang chito ngaxchu chingünkya thama a!

¹²Nang chajik-muashem mwot pangwüi dantox dao; nange ibu nang naosom pong tokhange wüi twonle hüipu. Ibue nang to hidaole fongkya ningle changdao koxlax; changle nange nang zanpabu chabüt-lasün ang thole changdao koxlax.

¹³Nange ipongpong hwon-nwot jaono kople ngokox ngaxchu zong chitüi. Nang tsingpa manpabue nguilaxle nang kho naxsün koxmi — lyettsibu hanpakma olom tole ngokyabue a, zangdingkho tokya odang-odang ahan ang thokyabue a ilaxle lyetjang foto ibu nang hama wünle ngokyabue a Chem changle hüi angkya tüipuix.

¹⁴“Hwom a tsaxsa athople thomkya ningle changüi, ilaxle wün füi hwom zokle ashunüi! Hwome hwom ngaxchu khosünle chang ang münthopu — wünle a hwom thangma namhuanu ang changüi, hwom tsangtsa alomle hang angkya hanpakma muakya wün chitüile.

¹⁵Nang zongto müikya mok angkya hwom mwot ija wüi — hünzom tsün-nana tsaitik-kaxshole ngokya tsingpa ibue tsuakle fa angkya a. Hwome pangnusae nang dantoxüi ilaxle hwom lom to paoüi, ilaxle nang azün ang owachu danle chitoxüi.”