Read Wancho Naga Isaia 48 Bible Online

Isaia 48 - Wancho Naga bible

Isaia 48

¹Ija to apalax, Israel khünaknu, hünzom Judah su-sa hwom: Hünzome JOWANPA mün ma tsaosax ilaxle Israel nok Zang to shwompule akax — ikoxle hünzome akaxkya kax hünzom ojao chimok.

²Ikoxlechu hünzome mongngam füi hünzom a otsao tingnu nokpu changpu ilaxle hünzom Israel nok Zang to mongongpu, chix mün a JOWANPA Khüthak Zang changpule akax.

³JOWANPAe Israel nok ang thüi: “Chemle chang angkya hex ija kue kai wüi aje thomdaoa; ilaxle ija kue allele chang ang tom.

⁴Kue awan ngopu hünzome a kheba chithüikya khünakbu changpule ahoüi, jan lailaile tsak-khokle tamchu khop lailaile bikbexle.

⁵Ikhoma kue hünzom füichi hanpak kaitanto wüi ajele thomdaoa, tütali machangba wüi ile changüihex-ole ngaile, hünzome ibu hünzom chapabu hia muabu mwot changpule chithüt angkya hanpakma abaxtsuak daopu.

⁶“Kue chempang akax daopuix ibu athax changle hüile; hünzomechu ku kax otsing tomtata wüile lax angkya hato hüipu. Athax kue hünzom hama jali hozün changle hüi angkyabu akaxfang, kue hünzom hato ngaile ma ahokya jalibu a.

⁷Athax tix kue ibu ile chang ang tompu; iningle ami thochi machu machangtox. Ija changdao koxba, hünzome ibu pangwüi bama awanle ngopule thüitsuakse.

⁸Kue awan ngopu hünzom to mongong angkya jao müntüi, hünzom a apüipüile tüikyabu le awan ngopu. Ikhoma hünzome ija chemtuechu atat ang chikoppu, chemthüikoxle hünzom na ma ija kax tuita chu chiwang.

⁹“Khünaknue ku mün achuakle chang angkya hanpakma, kue ku mongtsik adule tanpu; kue ija abax thompu ilaxle hünzom ama ang müntom.

¹⁰Wünchua sikngün ma kue hünzom to thwontsingle anodaoa, wünkha to zokle khop to wanle anokya ningle. Ikoxle kue hünzom a laxli chemchu müntüile atakle.

¹¹Kue chem mokpuix ija a ku hanpakma mokpu — kue ku mün ahaile chang ang müntom chichangba owawa füi ku fuazang ahanle lax ang müntom ija a ku tata kux changüi.”

¹²JOWANPAe thüi: “Ku kax to apalax, Israel, kue nyakle kopkya khünakbu! Ku a Zang changle, owang, oshuk, tuita wüi tüikya Zang!

¹³Chaxwannu chifün a ku chak makhange zingpu ilaxle zangding shale danpu. Chemtue kue ding hia nyaküihex, hwom ku hato akhangle hüile.

¹⁴“Asoxle ilaxle apalax, hünzom pange wüi! Baozang owaechu füichi hanpak wün ang müntho kue zünle kopkya khünakbue Babilon nok to sing ang thoüile a; chixe kue chem texpuix ija moküi.

¹⁵Chix füi zangwünkya tamchu chix nyakkya a ku changpu; chix lom kue azuipu ilaxle tho-lünle chang ang tompu.

¹⁶“Athax ku hato soxlax ilaxle ku kax apalax. Pongwang tokhange wüi kue ngaithole akaxdaoa, ilaxle jento ku kax changle ngai ang tomdaoa.” (Athax JOWANPA Khüthak Zang-e chix tsak-zong koxle ilaxle ku tsanle apaole.)

¹⁷Israel nok otsao Zang, JOWANPA owae nang khosünle koppuix, chixe thüile: “Ku a JOWANPA hünzom Zang, hünzom füi amüi angkya hanpakma anwot-ano sele tsukya mix ilaxle hünzom lese lom male ang lom apuale fakya mix.

¹⁸“Hünzome ku kaxtombu kax ma laxle jangchang! Hünzom hanpakma mohiman a thokle-thokle jense chemtuechu chizopkya shuasa jajen ningle a! Hünzome zan to lütkya tüise tinu kax to tichap hüikya ningle a.

¹⁹Hünzom su-sa hwom a sak-tsang bütale tüiüi, ilaxle kue ibu otuechu chiama angkya zingle tsuakse.”

²⁰Babilon angkya paolax, mongtex ma paolax! Kaxho müikya mongmüile apukkox, “JOWANPAe chix da Israel sündaoa!”, le pangnue tsingang laxkox.

²¹Chemtue JOWANPAe chix khünaknu khamkya hia zuazoxkya sak-hax akaile lepongma, hwom tilan maxle sikngünkya chitüi. Hwom hanpakma chixe ti long tuita angkya fuakle lai ang tom; chixe longnu afi, ilaxle ikha angkya ti fuakle lai.

²²“Ochax khünakbu hanpakma azang angkya olom müntüi”, le JOWANPAe thüile.