Read Wancho Naga Isaia 51 Bible Online

Isaia 51 - Wancho Naga bible

Isaia 51

¹JOWANPAe thüi: “Ku kax apalax, hünzom khosünse le tsukyabue, hünzom ku hato fongkya lomle nguikyabue. Nang ojong tokhange nguipuix ija longnu ajang koplax, ojong longthwot nui angkya nang thole alaipuix, ija a.

²Hünpu, Abraham ajangle koplax, tamchu Sarah, owa makhange hünzom pu-tsale hüipuix. Kue chemtue Abraham nyakkya hex, chix ma naosom matüikya, ikoxle kue chix to mohiman ilaxle su-sa hwom kox; kue chix su-sa hwom huanuma pu-tsale chang ang tom.

³“Kue Jerusalem hato chingcha ahoüi, ija pündaokya khama ngokya pangnusa to. She haxtok a sak-hax chang koxlechu, kue ija a tsawatkha ang achangüi, Kue Eden ma zingkya tsawatkha lailaile. Künsom-mongmüi ima tüile ngoüi, ilaxle ku achuakle hia münchong fale ngaokya tsaibu a.

⁴“Ku kax to apalax, ku khünakbu, kue chem akaxpuix ija to apalax: chaxwannu nok hato kue anwot-anole; ku wanlombue hwom hato zangngai apüiüi.

⁵Ku akhangle nguilaxle hwom khosünle kopüi; kue lüt angkya hanpak soxle tüile. Chaxwannu nok thak ma ku jaojaoe apünüi. Tsailo nokbue ku ngui angkya to hule ngo; kue hwom khosünle kopüi lükya monghom füi hwome hule ngo.

⁶Zangdingkhobu to angakle hulax; chaxwannu to hunolax! Zangdingbu a wünkhut samkya ningle samle paoünüi; chaxwannu a nyitsyen buikya ningle sumle paoünüi, ilaxle khünaknu pangwüi hwom zikya ningle zile paoünüi. Ikoxlechu kue apüikya khosün a jento ngoüi; kue lütkya ija a oshuk-okim changüi.

⁷“Ku kax to apalax, hünzom otsingtsing awankyabue, owae ku hwon-nwot ma mongtsang ma apütle thomlaxpuix. Chemtue khünakbue hünzom to adale haopuix ipongma taxza;

⁸hwom a saxe saxdaokya nyi-za ningle samle paoünüi! Ikoxle kue koxkya khosün a jento ngoüi; kue lütkya a othuithui hanpak changpu.”

⁹Zolax, JOWANPA, ilaxle kwom to asunlax! Nang tsak-zong twonlax ilaxle kwom khosünlax; kaitanto twonkya ningle nange ija twonlax. Tinu baozang Rahap hütle akhixle langkya a nang changkya

¹⁰Tinu khatokya ti zan ang tom ilaxle tinu afünle le angkya lom zingle koxkya nang changkya, ikhoma ozün ma tüikya pangwüi tale le ang tsuak.

¹¹Nange opang khosünle koppuix hwome mongmüi-pwonlale Jerusalem alopüi, ilaxle mongmüi atungle tsaingaole akhongüi. Hwom a othuithuima mongmüi-pwonlale ngoüi, othuithuima mongtsik hia mongma füi atsai laxle a.

¹²JOWANPAe thüi: “Hünzom tsak-zongle chang ang tomkya a ku changpu. Zile sam angkya thua hünzom büthüikoxle za angkya, hingzang tsün tukux ngaxchu chilo angkyabu thua a?

¹³Hüzome hünzom zingpupa JOWANPA, owae zangding shale pünpuix ilaxle chaxwannu chifün zingle changlaxpuix, chix alakdaocha? Hünzom amüt ang achwonle ngokyabu opange hünzom to athak ang mongsile ngopuix, ibu hanpakma jento zadongle chemto ngopu? Hwom mongtsike hünzom to ojao münpo.

¹⁴Kun khato kople thomkyabu lebama wüi danle alaiüi; hwom a tsünlo-zaknuile ngoüi ilaxle hwome sax angkya sün okhonguile tüile ngoüi.

¹⁵“Ku a JOWANPA hünzom Zang changle; tinu kha kue lüixle aluakpu ilaxle ija tichap akhong ang tompu. Ku mün a JOWANPA Khüthak Zang changpu!

¹⁶Zangdingkhobu kue pünle danpu ilaxle chaxwannu chifün zingle danpu; Kue Jerusalem ang thüipu: ‘Nang a ku khünaknu changpu! Kue nang a ku hwon-nwot koxdaoa, ilaxle nang kue ku chak füi sünle koppu.’”

¹⁷Jerusalem, zolax! Nang lualua to nang laoxle zolax! Nange sikngün pe lingdaoa ija a JOWANPAe chix mongtsik ma nang ang alingle; nange ija lingle jok, ilaxle ijae nang shu-shüile achangpu.

¹⁸Nang zun angkya mix owachu chitüi, hünzom khünaknu khama owachu nang chak ma syetlax tox angkya mix a.

¹⁹Nang hato thama anyi athütle hüidaoa: ochax-ozane nang haxtok a chilaxle ang achangle toxdaoa, ilaxle nang khünaknu a woknuak ma ngo. Nang hato chingchajaja aho angkya mix owa chitüi.

²⁰Lomnu nuk pangkha towüi nang khünakbu a hona-ojuae nguakle haxmax-zangsam; hwom a müikhisa tai ma mankya thatha ang achang. Hwom to Zang mongtsik janzüie po.

²¹Sikngün ma ngokya hünzom Jerusalem khünaknu, hünzom jutok mixbu ningle shu-shüile tüikyabu,

²²JOWANPA hünzom Zang-e hünzom kho awale akax: “Kue wansa tswonle paongopu kue ku mongtsik ma koxkya wansa a. Athax hünzome ija tam chilingüi hünzom shushüile achangkya ju a.

²³Kue ija a hünzom to afangle thomkyabu ang koxüi, hünzom lomnutang to nguak ang tomkyabu ilaxle haxthom to tingpupule hünzom to tingkyabu ang a.”