Read Wancho Naga Isaia 52 Bible Online

Isaia 52 - Wancho Naga bible

Isaia 52

¹Jerusalem, tamchatle tsak-zonglax ilaxle chonglax! Zang otsao tingnu, tüle müile aza-apuale changlax! Songsaribu a hünzom zünkai to tam münnopüi.

²Jerusalem, nang mongtex ma sile aloxlax! Haxbu kha tokya ajonglax ilaxle wanghom tüntong ma thunglax! Zaion ma kople thomkya khünakbu, hünzom to khale thomkya janbüi da dao!

³JOWANPA Khüthak Zang-e chix khünakbu ang thüi: “Chemtue hünzom dabu ang achangpuix, hünzom hanpakma ngun chifa; ija ningle hünzom dan ang chuwüi omün chemchu chifale danüi.

⁴Chemtue hünzom Ijip nok to püntüibu ningle nguikya hex, hünzome ija ningle ma mongtex ma mok; Ibachu Asiria noke hünzom tswonle pao ilaxle hünzom hanpakma omün chemchu chifa.

⁵Ilaxle athax Babilon nok machu ija ningle wüi changpu: hünzom zandabu, ilaxle hünzom bama omün chemchu chithom. Opange hünzom to apünle ngopuix ibu tsaichong-kaxbong ilaxle ku mün a chizakle adix-adale chang.

⁶Athax füichi ma hünzome ku a Zang changpu ilaxle kue hünzom füi zangwünpu le ngaiüi.”

⁷Ija ngün angkya chemtukuxle ohünotün changüi hex kaxhomix tuita haxnu akaile nguile ngokya mix, chixe kaxho müikya, mongsom kaxho apüi ngole! Chixe lütkya kax ngailaxle Zaion ang thüile, “Hünzom Zang a Wanghom changpu!”

⁸Tingnu nyele ngokyabue akhongle, mongmüi to owon müimüile akhongle! Hwome ma mik makhange ngün ang tsuakle Zaion to JOWANPA nguile ngokya a!

⁹Tüle-tüle mongmüi tungle akhong, male ngoünkya nang Jerusalem! JOWANPAe chix tingnu khoseüi ilaxle chix khünaknu mong asomüi.

¹⁰JOWANPAe chix otsao tsak-zong twonüi; chixe chix khünaknu khosünüi, ilaxle ija zangfang pangnusae ngünle laxüi.

¹¹Hünzome Babilon dantox angkya münthaile tsingkoplax, zangshwom-hom tuina kople tüikyabu hünzom pange wüi! Taxtwonle atsaokya oli to taxtwon; ibu füi hünzom atsailax ilaxle otsao ma ngolax.

¹²Izuma hünzom a khong to paoüi münchang; hünzom a paole azang ang münazongüi. JOWANPA hünzom Zang-e azuiüi ilaxle pangnu chikao tokhange hünzom kho-awaüi.

¹³JOWANPAe thüi: “Ku dae chix mwot a tsuakle changüi; chix a huanuma achuak-achenle changüi.

¹⁴Chix ngünkya zuma khünaknubu huanuma abüt; chix a khünak ningle jao chingünle pope dongle tüikya.

¹⁵Ikoxlechu athax a chaxwannu nokbu chix ma abütüi, ilaxle wanghombu a khosamkyae zangwün chitüile changüi. Hwome ngünüi ilaxle tsingle laxüi amiba hwome matsingkya oli a.”