Read Wancho Naga Isaia 53 Bible Online

Isaia 53 - Wancho Naga bible

Isaia 53

¹Khünaknue lan, Athax kwome kaxwün wangkya to owae ongse dai? Ija ma JOWANPA chak owae ngünse dai?

²Haxzan to tsingküi jule pün chongkya ningle chix dapa tsong angkya a JOWANPA mongtex changkya Kem ang chixsün-chixjo aho angkya hanpakma chix ma münchong hia osün chitüi. Chix bama mikzalokya oli chemchu chitüi, kem chix hato jikle ahüi fang chemchu chitüi.

³Kwome chix ajao ilaxle chilaxle awüt; chixe sikngünkya hia tsütle kakkya adu. Owaechu chix thün to hu ang chitho — chix chemchu chichangkya ningle keme chix ahai.

⁴Ikoxlechu keme kop-haxkux sikngün chixe mix adu, keme hün haxkux tsütle kakkya chixe hün. Oshuk alople keme chix sikngün to Zang-e chix ang fakya sikngünle hule alyet.

⁵Ikoxlechu kem ochax khoma chix to maklax, keme mokkya ochax khoma chix to chakmok. Chixe apongkya sikngün khoma tix kem kak müi, chix to chakthom topkya khoma kem kuimüi-zangmale ngo ang kop.

⁶Kem pangwüi lom asamdaokya chunbu ningle changkya, kem pangwüi malomlom to pao. Ikoxle JOWANPAe sikngün chix khangkho ma adüt, ija sikngün a kem pangwüie kopsepa.

⁷“Chix to chisumüi lejao zothup, ikoxlechu dangjale adu; chixe kaxfa tuita chizex. Lang ang paokya chun tuita ningle, omun ong ang kople thomkya chun tuita ningle, chixe kaxfa tuita chizex.

⁸Chix a kop ilaxle mik amüt angkya kaxtsuak üntoxle lang ang pao, ija chix osho hanpakma owa mong tochu chikak. Kem khünaknu ochax khoma chix mik amüt.

⁹Chixe mütkopkya chemchu chitüi koxlechu, chichangba kaxfax tuita akaxkya kha chitüi koxlechu; Ochax khünakbu füi tomle chix a zuk-khato sho, chix a hakpabu füi tomle akhün.”

¹⁰JOWANPAe thüi: “Chix sikngün angkya a ku mongtex changkya; chix zikya a thailak atak angkya hanpakma tö tuita changkya. Ikhoma chixe chix sixlibu ngün ang kopüi; chix a tsünlo-khothole ngoüi, ilaxle chix makhange ku mwottho tsuakle changüi.

¹¹Khüzün sikngünle chang füima, chix ma chatle mongsom tüiüi; chixe chix a thabi-juaba to sikngünkya münchangle awanüi. Ku to mongkoxkya da, owa füi ku mongzom müipuix, chixe noknu sikngün hünlit hünüi ilaxle chix khokho ma kue hwom ang thailak tüiüi.

¹²Ikhoma kue chix ang achuak-achenkya ngwotnui koxüi, chongkya hia tsak-zong füikyabu ngokya khato a. Chixe chix tsün küntsu-mongluale kox ilaxle ochax khünakbu shoma ahanle lax. Chixe ochax khünaknu ngwotnui lax ilaxle hwom ang thailak tüi angkya hanpakma zangjop.”