Read Wancho Naga Isaia 57 Bible Online

Isaia 57 - Wancho Naga bible

Isaia 57

¹Müikya khünaknu zile paole, ikoxle owaechu ija müntik chichangba ija tuitexkya mix tuita chitüi. Ikoxle chemtue hwom zile paopuix, jaopo sikngün chemechu hwom to mak-kha ang chitho.

²Ozün ma müile ngokyabue zipongma mongsom ma haxmüi-zangmale zi ang kople.

³Ikhato kaxfün ang nguihüi, hünzom ochax khünakbu! hünzom a jenu-shipabu, chinunchakkaikyabu, ilaxle ma tsangtsa hangkyabu füi sümüikya le münchang.

⁴Hünzome owa chanyile wanjai? Khualop mixbu hünzome owa mong amüi?

⁵Hünzome otsao pünle thomkya pünnu tongbu to shekobu füi jip-pom laxle sixlibu kox angkya baozangle nyakkyabu to hünzome shwom. Shuakax tokya longkunbu khato hünzome masu-masabu tö tuita ang koxle lang.

⁶Ikhatokya longtom müikyabu tswonle koplaxle ibu to baozang changpule shwom. Ibu chitong to shwomle hünzome jubu thok tamchu ibu hato saxziakbu apüile töbu kox. Hünzome ibu mokkya füi ku ang mongmüile le hünzome texpia?

⁷Hünzom haxnukho tsuakyabu to dong ilaxle ikhato töbu koxle chinunchakkaile chang.

⁸Hünzome jannong alüile tüikya hünzom chapabu ma hom fülom nuakfüichi ma zingle dan. Hünzome ku ahaile awüt; hünzome ma nyizabu sikle awüt ilaxle ma mongkün mixchabu füi chongle zingle thomkya lyakho to dong, ilaxle ibu mixchabu ma füi jip ang tom. Ilaxle hünzome ikhato ma mongzokkya tsangtsa mongzom amüi.

⁹Hünzome ongan müikya hia müngabu pa ilaxle hünzom Molek baozang to shwom. Shwom angkya baozangbu atak lom ang, hünzom tsailo nok to khünakbu akat, ile ama-lumting chito ngaxchu wüi akat.

¹⁰Mama baozangbu lom ang hünzom ipongpongle na-jua-le maxle azong, ikoxlechu hünzome twotle chitox. Hünzome thüt ibu jannong alüile tüikya chapabue hünzom ang janzüi faüi, ikhoma hünzom otuechu na-juale chichang.

¹¹JOWANPAe thüi: “Hünzom za ang tomkya baozang ibu a owa? Owa khomale hünzom atse ilaxle ku komkaile alakle awütpu? Ku okuilole dangjale ngokya khoma hünzome ku achuakkya zakpia?

¹²Hünzome chem mokpuix ija sukya changpule hünzome thütle, ikoxlechu hünzom zanglom kue kotok to alaiüi, ipongma hünzom chapabue hünzom asun ang chithoüi.

¹³Chemtue hünzom asun angkya lomle akhongüihex, chapa ibue hünzom khosünkya naxtüikox. Zangchei cheithoe hwom pikle paoüi! Ikoxle ku to mongong thomkya khünakbu ija haxtok ma wüi ngoüi ilaxle ku Zangshwom-Hom ma ku to shwomüi.”

¹⁴JOWANPAe thüile: “Ku khünakbu ku hato chat ang tomkox. Hwom lomtang angkya obax-obang pangwüi apaokox! Lomnu zingkox, ilaxle ija achwonle zinglax!

¹⁵“Ku a jento ngokya Khüthak tamchu otsao Zang changpu. Ku a atsuakya khato tamchu otsao nui to ngole, ikoxle kue a puinaile tüikya hia künlop-monglüile tüikyabu füichu ngopu, ija a hwom mongong hia monghom achatle koxtsuak angkya hanpakma.

¹⁶Kue ku khünakbu ang khüzün koxpu, ilaxle kue hwom ma tsaitox-kaxfele münngoüi chichangba othuithuima hwom füi mongmale münngoüi.

¹⁷Hwom ochax hia nüfux hanpakma ku hwom füi mongmale ngokya changpu, ikhoma kue hwom to sikangünpu ilaxle e-sele chichangpu. Ikoxlechu hwom ningle-khokhe chithüikya khünakbu ilaxle hwom malomlom to paole sam.

¹⁸“Hwome chemle mokpuix kue ngündaoa, ikoxlechu kue hwom amüiüi. Kue hwom azuiüi ilaxle hwom to asunüi, ilaxle kue mongsomle ngokyabu mong asomüi.

¹⁹Kue pangnusa ang mongsom koxpu, hoxkyabu tamchu tsailo tokyabu pangwüi to! Kue ku khünaknu kak amüiüi.

²⁰Ikoxle ochax khünakbu a, tamchu chidangle, oma-oshix hia onom-osyabu apüile ngokya tinu tichap lailai.

²¹Ochax khünakbu hanpakma mongzom müi angkya ojao müntüi”, le JOWANPAe thüile