Read Wancho Naga Isaia 58 Bible Online

Isaia 58 - Wancho Naga bible

Isaia 58

¹JOWANPAe thüi: “Tsuakkya pongle hünzom akhong kox! Ku khünaknu Israel nok hama hwom ochaxbu apuale laxkox!

²Nyixfokya to hwome ku shwomle, hwome ku lomtang awansele mongtsukya akaxle ilaxle ku kaxtom kax ma laxle le thüile. Kue hwom ang sukya wanlombu koxkya hia hwome ku to shwomle chang angkya hwom mongtsule.”

³Hwome atüile: “JOWANPAe chingünangba keme omalax ang chisax-chilingle atsao ngoüi? Chixe kem to mongkoxkya chitüiba kem chisax-chilingle ngo angkya chem mwot tüi?” JOWANPAe hwom ang thüi: “Kaxtsing tomtata a ija changle, hünzome chisax-chilingle atsaokya füi tomtomle hünzom ma mongtextex lomle ilaxle hünzom mwot mokle ngokyabu to zothuple.

⁴Hünzom chisax-chilingle atsaokyae zan alaile, ilaxle hünzom ahe-atsile tamchu achax-azanle. Iningkya chisax-chilingle atsaokya zangjop to kue lanüile hünzome texdaicha?

⁵Chemtue hünzome chisax-chilingle zangjoppuix, hünzome hünzom sikangünle; Lainax ningle hünzome hünzom khang akhuxle, ilaxle hünzom thung ang nyikhwon nom tamchu haxbu thokle changle. Ija ang hünzome chisax-chilingle atsaokya le nyakle? Hünzome ile changkya füi ku mongzom müiüile hünzome thütpia?

⁶“Kue lomkya chisax-chilingle atsaokya olom a ija changle: mix to zothupkya khak-kha dahai ilaxle chisukya kaxfün dang apaodao, ilaxle zothup ma ngokyabu mongtex ma aham ang dankox.

⁷Nang süt a chitüi-chinang füi ahanle saxkox ilaxle homhax chitüikyabu ang nang hom daple laxkox. Nyiwun chitüikyabu ang nyiwun laxkox, ilaxle ma haxnu-homsa hwom to münfongpu le tax-angam.

⁸“Ile changkya zuma sedün-zangngai müikya ningle ku chingchae nang to nyanüi, ilaxle nang kak a lebama wüi müiüi. Hünzom khosün ang ku a hünzom füi jento ngoüi; ku womle ngokyae hünzom a pangnu lom ma khosünle tüiüi.

⁹Chemtue nange zangjoppuix, kue hünzom to lanüi. Chemtue hünzome ku to nyaküihex, kue ija to lanüi. “Hünzome mix to zothupkya toxüi jangthüiba, mix to afangle hukya jangzakba, tsaima-kaxshix pangwüi jangtoxba;

¹⁰hünzome woknuak mix ang süt koxle tamchu tütali lomkya mix ang ija kox-zunle jangchangba, hünzom akhople tüikya zangnaknu a tungto-süja ang achangle ngaiüi.

¹¹Ilaxle kue hünzom jento azuiüi ilaxle müikya oli pangwüi füi hünzom ang mongzom müi ang tomüi. Kue hünzom a tsak-zongle tamchu müimüi-zangngaile ngo ang tomüi. Hünzom a ti okhonguile tüikya tsawatkha lailaile changüi, tamchu zople chipaokya shuasa jajen ningle changüi.

¹²Kaiwüi male ngodaokya homting zang oman ma hünzom khünakbue hom zingüi, Hünzom a katuk chatle zaile alailaxle male ngoünkya hombu zingle amüikya khünakbu le awanle laxüi.”

¹³JOWANPAe thüi: “Hünzome nazakle nuikya nyix a otsao-nyix le jangtwon ilaxle ija nyix nang mongtex mwot chimok; nang ija otsao nyix achuakle thom ilaxle aham-atüile chichang, mwot chimok, chichangba ija nyix chisumüikya zang chiwün,

¹⁴ile jangchang nange ku thothakya ma kopse mongmüi kopüi. Chaxwannu pangnu thüntho to kue nang achuak-achenle changüi, ilaxle kue hünzom putong Jakop ang koxkya haxtok ma hünzom mongmüi-pwonlale ngoüi. Ija, JOWANPA, kue akaxdaoa.”