Read Wancho Naga Isaia 59 Bible Online

Isaia 59 - Wancho Naga bible

Isaia 59

¹JOWANPA a hünzom khosün ang onüi shonaile chichangba hünzom fonghüile nyakkya ozing atat ang chithole nabale le taxthüt!

²Chixe hünzom kaxzing chiatatkya a hünzom ochaxbu khoma changpu. Hünzome chix to shwom-tole chang ang thüipongma hünzom Zang füi atsai ang tomkya a hünzom ochaxbu changle.

³Hünzom a atsekya, changnong-pünthomle tüikya, hia mix mik amütkya ma thaile tüile.

⁴Hünzom khwa to paole, ikoxlechu hünzome sukya kaxfün chikoptsuak. Hünzome ija tsetwon-zangwün to lüt ang bama kaxthai zangwün to mongongle ngo. Hünzome mix thomzün ang tom angkya hünzom mwot-lom mokle wüi ngo.

⁵Hünzome zingle ngokya ochax mwot-lom a tuita oje füikya pu oti ningle changle. Ija oti ashix, ikha angkya pu lai! Ikoxle hünzom ochax mwot-lome hünzom zongto müikya chemchu chimok — mak zi makhange zingkya nyibu ningle ibu a ojao mwot to chihüikyabu ang chang!

⁷Hünzome ojento chimüikya ochax mwot-lomlom wüi zingle ngo, ilaxle ija chimok homtoxle hünzom adule ngo ang chitho. Chemngax chichangkya khünakbu mik amüt angkya bama hünzom ang ojao cha-ao-mongsaokya chitüi. Hünzom apaopao khato hünzome jali olithule amatox,

⁸ilaxle hünzom tüikya khama owachu chazakya chitüile ngo ang chitho. Hünzome amokmok sukya tuita chitüi. Hünzome ocheichei lom to, ilaxle ija lomtang ma ahamkya khünak owachu azang angkya chifün ma chitüi.

⁹Khünaknue thüi: “Kem to sikangünle ngokyabu chak tokya Zang-e kem büthüikoxle khosünle chikop puix tsingdaoa. Chitong ngünle aham angkya bama kwome wünnyan to ongpu, ikoxle ikhato zangnaknak wüi,

¹⁰ilaxle kwom pangwüi mikpwompabu ningle pwomle aham. Tungto-sejale kwom chikho thu; ija a zangnak-kha ningle tamchu amalumfang zangnak fang ningle süt.

¹¹Kwome a abüt-aban ilaxle khangkho sam. Kwom to afangle thomkya hia thaikya chak tokya kwom khosün angkya hanpakma kwome Zang sung, ikoxle chemchu chichang.

¹²“JOWANPA, nang zongto kwom thaikya a huanu. Kwom ochaxbue kwom ma kaxhux fele. Kwome ibu pangwüi tiklax ngopu.

¹³Kwome nang zongto alünle changdaoa, nang chilaxle awütdaoa, ilaxle nang man müntopu le angam daoa. Kwome mix to afangle thom ilaxle nang hato tok aho. Kwom tutex a othai changpu; kwom zangwünbu a thaipu.

¹⁴Sukya kaxfün a jwonle apaodaoa, ilaxle oja changpuix ija a soxle hüi ang chitho. Noknu tuntho to otsingtsing asuale nguak, ilaxle otya ma ajingle ngokya ang ima ngwotnui chitüi.

¹⁵Ikhama sukya mwot a hidaole wüi ikhoma ochax mwot mokkya dantoxkyabu a hwom lailai to mütkopmix ang achangle bang.” JOWANPAe ija ngünle laxdaoa, ilaxle sukya kaxfün chitüikya khoma chix ang mongmale.

¹⁶Afangle thomkyabu to asunle fa angkya mix chitüikya ngünlaxle chix huanuma abütle. Ikhoma hwom khosün angkya hia zan to lüt angkya hanpakma chixe chix tsak-zong twon angkya changle.

¹⁷Sukya kaxfün a chixe khyep-di ningle awunüi ilaxle khosün angkya tsak-zong a khohom ningle sünüi. Jali sukya olom ma apüi angkya ilaxle othai lom to khünaknu ang sikangün angkya mongtsukya janzüi a chixe nyiwun tuita ningle laxüi.

¹⁸Tsailo nok to ngokyabu to ngaxchu, chix zanpabu to chixe hwom thaikya olom ma sikngün fa angkya changle.

¹⁹Handün hia hannop pangnu chitokhange noknusae chix hia chix tsak-zong bama atat ang kopüi. Chix a tichap ningle tamchu zongkya zangchei tuita ningle nguiüi.

²⁰JOWANPAe chix khünaknu ang thüi: “Hünzom kho-awa ang ku Jerusalem to nguiüi ilaxle ochaxbu tokhange mongchatkya hünzom pangwüi khosünle kopüi.

²¹Ilaxle kue hünzom füi tsaotsüt tuita thompu: Kue hünzom ang ku tsak-zong hia hwon-nwot othuithui hanpak ang koxdaoa, ilaxle athax a hünzome ku kax ma lax angkya wüi ilaxle othuithuima ku kax ma laxle ngo angkya hanpakma hünzom su-sa hia hünzom sixlibu hama anwot-anole changüi.”