Read Wancho Naga Isaia 6 Bible Online

Isaia 6 - Wancho Naga bible

Isaia 6

¹Wanghompa Uzziah zile paokya zanglao ma, kue JOWANPA ngün. Chix a chix tüntong ma thungle tüikya, tüle tsuale tamchu achuak-achenle, ilaxle chix nyiwune Zangshwom-Hom homnu awang.

²Chix akhople wünchua füikya zünmokbu ajongle tüikya. Hwom pangwüi ma ozang azok pongle tüikya. Ibu zünmok pangwüie mathünthün to ozang anyipong füi khung, ilaxle ma tsangtsatsa tochu ozang anyipong füi khung, ilaxle mama ozang anyipong füi a hwom pile ngo.

³Hwome tata nyakle akax: “Otsao, Otsao, Otsao! JOWANPA Khüthak Zang a Otsao changle! Chix fuazangkyae chaxwannu awangle.”

⁴Hwom akhongkya ozinge Zangshwom-Hom homting alox, ilaxle ija Zangshwom-Hom a wünkhute awangle tüikya.

⁵Kue akax: “Ku hanpakma monghom angkya müntüi! Ku a maxdaoa, chemthüikoxle ku le makhange laipupu kaxhuak pangwüi ochax, ilaxle opange kaxhuak pangwüi ochax zangwünle tüipuix, hwom khato ku ngole. Ikoxlechu ku mik jao füi ku Wanghompa, Khüthak Zang kue ngünle laxdaoa!”

⁶Ifüima zünmok kha angkya tuita ku hato pile ju. Chixe, chix ma tö-tsap ding angkya khaplak anyi füi khaple laxkya khisumkya wünhandix tuita koplaxle tüikya.

⁷Chixe ija chuale ngokya wünhandix füi ku tun ma lyet ilaxle thüi: “ijae nang tunpün to lyetdaoa, athaxpi nang thaikya maxdaoa, ilaxle nang ochaxbu thailak tüidaoa.”

⁸Ifüima kue JOWANPA kax atat: “Kue opupu apaüi? Kem kaxhomix ang owa changüi?” Kue lan: “Ku paoüi! Ku tomfa!”

⁹Ikhoma chixe ku ang pao üntoxle ija kaxho khünak hato apua angkya akax: “Hünzome tütatukux wüi apalax, hünzome tsingle lax ang müntho. Hünzome tütatukux wüi hulax, chempang changle ngopuix, hünzome awan ang müntho.”

¹⁰Ifüima chixe ku ang akax: “Ija khünaknu kün-mong oba ang achang kox, hwom nabu ba ang tomkox, hwom mikbu apwom ang tomkox, ikoxtix hwome ngün ang chithoüi, atat ang münthoüi, ilaxle tsingle lax ang münthoüi. Hwome ile tsuakle jangchang, hwom ku hato mong lüile hüiüi ilaxle kakmüi angkya ataküi.”

¹¹Kue atüi: “Ija, iningle chemtukux changle ngoüi?” Chixe lan: “Tingnu maxlaxle tamting ang machang tanto: chaxwan longkho jaojao owachu chingokya nuiting ang achangle awütle matox tanto, ile ngoüi.

¹²Kue khünaknu a ochu to apaoüi, ilaxle ija haxtok jaojao owachu chingokya nui ang achangüi.

¹³Bün kha angkya khünak tuita ngaxchu ngole jangchang, chix ngaxchu max ang tomüi; chix a zakpünnu tongtho ningle achangüi.” (Püntongtho a Zang khünakbu chatle owang wangkya münwan)