Read Wancho Naga Isaia 60 Bible Online

Isaia 60 - Wancho Naga bible

Isaia 60

¹Zolax, Jerusalem, ilaxle senuja ningle nyanlax; JOWANPA fuazang a hünzom to nyanle tüile!

²Mama mama chaxwannu nok a zangnake alule thomüi, ikoxlechu hünzom to a JOWANPA zangngaie nyanüi; Chix womle tüikya zangngai a hünzom füi ngoüi.

³Chaxwannu nok pangwüi hünzom zangngai hato bele apüiüi, Ilaxle wanghombu a hünzom hanpak nyizün dongkya hato apüiüi.

⁴Hünzom akhople hulax ilaxle chempang changle ngopuix hulax: Hünzom khünaknu a hom to ngui angkya hanpakma asoxle tüile! Hünzom sasün hwom tsailo nok tokya nguiüi; Hünzom sacha hwom a naosombu ningle tswonle apüiüi.

⁵Hünzom ija ngün ang kopüi ilaxle mongmüi atungle changüi; Zongbakle mongmüikyae hünzom asuaüi. Chaxwannu nok angkya tuinabu hünzom hato apüiüi; Molo-Tinubu akaile hwom okop-olwotbu nguile hüiüi.

⁶Midi hia Efah tokya utbu jenlole hünzom hato nguiüi. Hwom Sheba tokhange nguiüi, hwome hun hia ongan müikya müngabu apüiüi. JOWANPAe chem mokdaopuix ija bama khünaknue müikya kaxho faüi!

⁷Kedar hia Nebaioth angkya chunbu Töbu ningle hünzom hato apüiüi Ilaxle JOWANPA mong amüi angkya hanpakma tö-tsap ma ibu tö koxüi. Amipongkya füi ataxle müile JOWANPAe chix Zangshwom-Hom fuazangle zingüi.

⁸Zangfwombu ningle thün-lünle, Osu pile nguikya ningle khua ibu a chempang?

⁹Ibu a tsailo nok tokya nguile ngokya khuabu changle, Zang khünakbu ibu ma nguile ngole. Hwom füi tomle ibue hun hia khopbu laxlaxle nguile JOWANPA mün achuak-achen angkya hanpakma, Israel nok otsao Zang a, Owae chaxwannu noke chix achuak angkya zingle tsuaklaxpuix.

¹⁰JOWANPAe Jerusalem ang thüi: “Hünzom katukbu a mixnokbue zingüi, Ilaxle hwom wanghombue hünzom thothale changüi. Ku mongtsik ma kue hünzom to sikangünpu, Ikoxle athax a kue hünzom hato ku mongkün hia chingcha ahoüi.

¹¹Hünzom fülom a zangnak zangngaile daple thomüi, ija a chaxwannu nok wanghombue Hünzom hato hwom tuina apüi angkya kuxma.

¹²Ikoxle chaxwannu nok owapange hünzom thothale chichangpuix Ibu a komkaile max ang tomüi.

¹³“Pain pün, junipar pün, ilaxle saipres pün, Lebanon faonu angkya pün sümüimüi, ibu a Jerusalem zingle amüi ang apüiüi, Ku Zangshwom-Hom osün müile zing ang, Ku tingnu fuazangle zing ang.

¹⁴Hünzom to zothuple ngokya putong hwom nguiüi Ilaxle chathua zakya ahole hwom akhuxüi. Tam-a hünzom adix-adale changdaokyabue hünzom chitong ma shwomüi. Hwome hünzom ang ‘Zaion, Israel nok Otsao Zang JOWANPA tingnu’, le nyaküi,

¹⁵“Athax a hünzom to chie-chisekya hia anukya müntüiüi, Khünak owachu chingole awütle toxkya tingnu tuita a. Kue nang a chongle tamchu osün müile zingüi, Jento mongmüi-pwonlale ngokya onui ang achangüi.

¹⁶Chaxwannu nok hia wanghombue hünzom to humele Nao honu tuitae naosa to humekya ningle a. Hünzom a, Ku, JOWANPAe sünle kopkya changpule hünzome tüküi, Israel nok Khüthak Zang-e hünzom dankya changpule a.

¹⁷“Kue hünzom hato wi lüix to hun apüiüi, Khop hia tu a jan hia pün lüima, Ilaxle jan a long lüix ma. Hünzom to apün-adale ngokyabue hünzom to zothuple chichangüi; Kue hünzom a sukya kaxfün hia mongsom ma apün-ada ang tomüi.

¹⁸Chaxpwon-zanlekya ozing tamchatle atat ang müntomüi; Hünzom haxtok a olithukya thama füi apong ang müntomüi. Long katuk tuita ningle kue hünzom kho-awale sün thomüi; Kue hünzom khosünle changkya khoma hünzome ku achuaküi.

¹⁹“Athaxpi zanghan a hünzom zongto anyixningkya wünnyan ang chichangüi Chichangba zangnak ma lyetnu a hünzom wünnyan ang chingoüi; Ku, JOWANPA, oshuk chitüile hünzom wünnyan ang ngoüi; Ku fuazangkya wünnyane hünzom ang zangngai koxüi.

²⁰Hünzom künmax-mongshankya hanpakbu a oshuk ang changüi. Ku, JOWANPA, oshuk chitüile hünzom wünnyan ang ngoüi, Lyetnu hia zanghan tsün füi ngaxchu sülole nyan ngoüi.

²¹Hünzom khünak pangnusae chem supuix ija moküi, Ilaxle ija haxtok a hünzome jento kople thomüi. Ibu kue küi-thwompu, kue zingle alaipu, Noknusa hato ku chongkya aho ang.

²²Hünzom khama ahixkya hia puinaile tüikya homkha ngaxchu Tüle chongle tüikya onok tuita ningle tsak-zongle tüiüi. Chemtue chaxwan zanghan nguile hüiüihex, Kue ija chwonle chang ang tomüi. Ku a JOWANPA changle!”