Read Wancho Naga Isaia 62 Bible Online

Isaia 62 - Wancho Naga bible

Isaia 62

¹Kue Jerusalem mong achen ang zangwünüi; She khosünle machang tanto ku dangle münngoüi, Ilaxle she-e lütkya a zangnak fangto wünnyan zung ningle janüi.

²Jerusalem, chaxwannu noke nange anaokya ngün ang kopüi! Hwom wanghombu pangnue wüi nang fuazangkya ngünüi. Nang ang mün hozün koxle changüi, Ija mün a JOWANPA chix jaoe koxkya changüi.

³JOWANPA hanpakma nang a osün müikya khohom tuita ningle changüi.

⁴Nange ang “Awütle thomkya”, le münnyaküi, Chichangba nang haxtok ang “Awüt thomkya kakonu”, le münnyaküi. Nang ang fakya mün hozün a “She füi Zag mongmüikya tüile”, le changüi. Nang haxtok ang “Mongmüi-Pwonlale aju-asomkya”, le nyaküi, Chemthüikoxle JOWANPA ang nang füi mongzom müikya tüile, Ilaxle chix a nang haxtok bama tuipa tuita ang achangüi.

⁵Naosün tuitae chix tuinu ang naochasa laxkya ningle, Nange owae zingle alaipuix chixe wüi nang füi aju-asomle changüi. Tuipa tuitae ma tuinu füi chemle mongzom müipuix, Ija lailaile nang Zang chuwüi nang füi mongzom müiüi.

⁶Jerusalem, nang katukbu ma, Kue nyetmixbu danle thomdaoa; Hwom a zangnak zangngai dangle ngo angkya münchang. Hwome JOWANPA hama chix kaxtsaobu wünle lüwüi ngoüi, Ilaxle chix ang ibu alakle asam ang müntomüi.

⁷Chixe Jerusalem tamchatle zingle ma amüi tanto hwome chix ang nazak münfa angkya changle Ilaxle ija a chaxwannu noke achuakkya tingnu tuita ang achangle zing angkya changpu.

⁸JOWANPAe ojao mong chiao angkya kaxtsao saxle changdaoa, Ilaxle chix janzüi füi chixe ija mokle pao angkya wüi changpu: “Hünzom sozambu a hünzom zongto zanpabu süt ang münchangüi, Ilaxle hünzom grepti-ju mixnokbue tamchu münlingüi.

⁹Ikoxlechu hünzom ija sozam küi-thwomle changkyabu Hünzome tix ija an saxüi ilaxle JOWANPA achuakle changüi. Hünzom opange grep manzai laxle ibu oziak khaile asoxpuix Hünzome tix ku khwa ma ija grepti-ju ling angkya changpu.”

¹⁰Jerusalem angkya khünaknu, tingnu angkya laile paokox Ilaxle hünzom khünaknu chatle ngokyabu hanpak ang lom zingle laxkox! Lomnutang jao tuita achwonkox; ija lom angkya longbu apaokox! Chaxwannu noke awanle lax angkya hanpakma münwan apütkox

¹¹JOWANPAe zangfang pangnu hato tsingang tomkya nax-tik ang: “Jerusalem angkya khünaknu füi akaxkox JOWANPA a hünzom khosün ang, Chixe sünle kopdaokyabu chix füi tomle laxlaxle.”

¹²Hünzom ang a “Zang Otsao Khünakbu”, “JOWANPAe Sünle kopkya Khünakbu”, le a. Jerusalem ang a “Zang-e Mongkünkya Tingnu”, “Zang-e awütle Chitoxkya Tingnu”, le nyaküi.