Read Wancho Naga Isaia 63 Bible Online

Isaia 63 - Wancho Naga bible

Isaia 63

¹“Edom nok tokya Bozrah tokhange nguile ngokya mix ija owa? Ija khidak-khisumle aza-apua laxle, zikle nguingokya tsak-zong hia janzüi ma?” “Khosün angkya tsak-zong füi, zan to lütkya apuk ang nguile ngokya a JOWANPA changle.”

²“Owawae grep-ti fyet ang nakle changpongma khikya ningle chix nyi-za a büthüikoxle alanglangkhile chang?”

³JOWANPAe lan: “Kue grepbu to nakkya ningle chaxwannu nok to cha füi nakdaoa, ilaxle ku to asun ang owachu chihüi. Ku mongtsiktsik ma kue hwom to nak, ilaxle hwom ajie ku nyi-za bakle akhikdaoa.

⁴Kue ku khünaknu khosün angkya le tyale thomkya hanpak a nguile hüidaoa; ija a hwom zanpabu to sikangün angkya hanpak changle.

⁵Ku to asun ang owachu chihüikya ngünlaxle ku hu üntoxle ku abütpu. Ikoxlechu ku mongtsike ku tsak ang tompu, ilaxle ku tatae wüi anaole tsuakpu.

⁶Ku mongtsik füi kue chaxwannu nok to cha füi nak ilaxle hwom tingle akhün. Kue hwom aji a hax ma thokle ajen.”

⁷Mong chiathokya JOWANPA mongkün mo kue wünüi; Kwom hanpakma chixe mokdaokyadu hanpak ang kue chix achuakpu. Chixe Israel nok to okhonguile mohimanle chix chingcha hia chizakkya mongkün tüikya khoma.

⁸JOWANPAe thüi: “Hwom a ku khünakbu changpu; hwome ku mündyenüi.” Ikhoma chixe hwom

⁹sikngün chak tokya khosünle. Ija a kaxtai mix chichang, ikoxle JOWANPA chix jaojaoe hwom khosünle koppu. Chix mongkün hia chingcha makhange chixe hwom khosünle kop. Ledaokya ma chixe jento hwom to akox-akomle hüi,

¹⁰ikoxlechu hwome chix füi alünle ajong ilaxle chix otsao chasa ang mong ama. Ikhoma Zang a hwom zanpa ang achang ilaxle hwom füi azan ang süt.

¹¹Ikoxlechu hwome ledaokyabu texle atak, JOWANPA dapa Mosa din tokyabu a, ilaxle hwome atüi: “Tinu chak tokya chix khünaknu khosünle kopkya JOWANPA a ojong? Mosa ang chix chasa koxkya JOWANPA a ojongto tüi?

¹²Chix tsak-zong füi Mosa makhange chongkya-chongkya mwotbu mokle aho, tinu anyi ang achang laxle chix khünakbu tinu akaile le ang tomle oshuk chitüile chix mün fuale ngo ang tom, ija JOWANPA athax omaün?” JOWANPAe lomzun to, hwom a fao manbu lailaile ojao chikho chiasua atingting khama sütle chang.

¹⁴Haxzao tüikya haxsha to müizyembu zunle paokya lailaile, JOWANPAe chix khünaknu ang nazak kox. Chixe chix khünaknu azüi ilaxle chix mün chuak-chongle chang ang tom.

¹⁵JOWANPA, otsao hia fuazang ma nang ngole tüikya zangkangting tokhange kwom to huhüi. Nange huanuma kwom tuitexkya omaün? Nang tsak-zong a omaün? Nang mongkün hia chingcha a omaün? Kwom chie-chisele taxchang.

¹⁶Nang a kwom hopa changle. Kwom putong Abraham hia Jakop hwome kwom mün chichangle, owae jento kwom khosünle koppuix, ija JOWANPA, kwom hopa, nang mün tata fuale tox wüi.

¹⁷Nang lomtang angkya kwom omalax ang cheichakle pao ang tom? Kwome nang hato tok nam ahole kwom mong büthüikoxle tsak ang tompu? Shongchat-hüi, nang thotha-manzaile ngokyabu khokho ma thüingaxchu; ibu a jento nang kux ang ngole hüikya khünakbu changle.

¹⁸Kwom, nang otsao khünakbu, kwom a noxta bama zanpabue jwonle asam: hwome nang shwomkya nui to tingle ama.

¹⁹Nang ang kwom lompa ang tam chichangkya tukuxle nange kwom to mok, kwom a otuechu nang khünaknu chichang toxkya ningle hwon.