Read Wancho Naga Isaia 65 Bible Online

Isaia 65 - Wancho Naga bible

Isaia 65

¹JOWANPAe thüi: “Ku a ku khünaknu zangjop to lan ang achwonle tüikya, ikoxle mix hwome zangjao chijopkha. Hwome ku naxatakkoxle ku achwon ngokya, ikoxle hwome ku lom ang ojao chiazong kha. Kue, ‘Ku ikhama tüile; kue hünzom to asunüi’, le hwom zangjop to lan ang achwonle ngokoxchu onoke jao ku to chijopkha.

²Ningle-khokhe chithüile ma lomkuakua to paole sam ngokya ku khünakbu pongle kop ang ku a jento achwonle ngokya.

³Zakmax-thünbale hwome ku ang mong atsikle ngo. Otsao tsawatkha ma hwome songsari baozangbu ang töbu koxle chang.

⁴Zangnak ma hwom a longkun hia zuk-kha to lwompu chasabu füi apong ang pao. Hwome wak-müi sa ilaxle songsari baozangbu ang tö kox angle zingkya töbu kha angkya hwome saxlingle chang.

⁵Ifüima hwome mix ang thüi: ‘Kwom füi atsaile ngolax; hünzome lyet angkya kwom a hünzom zongto huanu otsao changle’ Kue khünaknu ile ajongle ngo ang münkoxtho — hwom füikya ku mongtsik a amüt ang chithokya wün ningle changdaoa.

⁶“Hwom to sikngün fa angkya kue mongzangwünle tsuakdaoa, ilaxle hwom mik amüt angkya laiza tsuakdaoa. Hwome mokdaokya mwot to kue mike hulanle müntox, ikoxle hwom ang olüix khomüi,

⁷hwom ochax hia hwom pupa hwome achaxkya ochaxbu hanpakma. Hwome songsaribu zomtong haxnukho to töbu zokle changdaoa ilaxle ku mün amale akaxdaoa. Ikhoma hwom mwote lomkya ningle kue hwom to sikangünüi.”

⁸JOWANPAe thüile: “Müikya grepbu owaechu münama; ikoxle ibu füi hwome grepti-ju fyetle. Kue ku khünaknu amaüi münchang — ku thothale changkyabu kue sünle kopüi.

⁹Judah jat-li Israel nok to kue mohimanüi, ilaxle hwom su-sabue ku haxtok angkya haxnubu kopüi. Kue kamle kopkya khünaknu, owae ku thothale changpuix, ibu a ikhato ngoüi.

¹⁰Hwome ku to shwomüi ilaxle hwom chun hia osu-maihubu hannopchi angkya Sharon Haxsha ma tamchu handünchi angkya Sikngün Haxsha ma fum tsüt ang tomüi.

¹¹“Ikoxle hünzom opange ku chilaxle awütpuix, tamchu ku otsao haxhua, ilaxle sho amüi angkya baozangbu Gad hia Meni to shwompuix, hwom hanpakma chixlili changüi.

¹²Alün-aloxle zi angkya a nang osho changüi, chemthüikoxle kue nyak pongma hünzome ku kax to chilan chichangba kue akax pongma chiapa. Ku kax ma chilaxle ochax mwot mok angkya mix hünzome zünle kop.

¹³Idaile kue hünzom ang thüipu, opange ku to shwompuix tamchu ku kax ma laxle tüipuix, ibu ang sax angkya hia ling angkya okhonguile tüiüi, ikoxlechu hünzom a wokno tilanle wüi ngoüi. Hwom ang mongmüile tüiüi, ikoxlechu nang a chilaxle ahaiüi.

¹⁴Hwome mongmüi laxle tsai ngaoüi, ikoxlechu hünzom a mong makya füi sopüi.

¹⁵Ku khünaknue nang mün a othuak-ozom lom to twonüi. Ku, JOWANPA Khüthak Zang-e hünzom a zi ang tomüi. Ikoxlechu hünzom ku kax ma laxle tüikyabu ang ku mün mama fapu.

¹⁶Haxtok angkya khünak owae mohiman jule changüihex, chixe Mongong ma chialekya Zang ma ju angkya changpu. Owae tsaotsütle changüihex, chixe Mongong ma chialekya Zang mün ma chitsüt angkya changpu. Ledaokya sikngün a kaitoxdaoüi ilaxle alak angkya changle.”

¹⁷JOWANPAe thüi: “Kue hozün chaxwannu hia hozün zangkhotingbu zingle ngole. Thochi ma changle ledaokyabu pangwüi alak angkya changpu.

¹⁸Oja kue zingdaolaxpuix ija ma mongmüi-pwonlale ngolax. Hozün Jerusalem a mongmüie awangle tüiüi, ilaxle ima tüikya khünakbu a mongmüi tungle tüiüi.

¹⁹Jerusalem hia she ma tüikya khünaknu khoma ku ngaxchu mongmüi-tungle tüiüi. Ikhato sop-juakya hia fongmix sele akhongkya müntüiüi.

²⁰Naosombu a naosa pongma zikya chitüiüi, ilaxle khünak pangwüi tsünlo-khothole ngoüi. Zanglao hopong kople ngokyabu a naosa tuita ang eüi. Ija manguiba zikyabu a, kue hwom to sikngün fakya münwan ang changüi.

²¹Khünaknue malailai to homhaxbu zinglaxle ngoüi — hwom to owaechu atsang-anangkya chitüiüi. Hwome grep haxtok manzaiüi ilaxle grepti-ju ling ang kopüi — ija a owawa mixe chilingüi. Pünzuabu lailaile ku khünakbu a tsünlo-zaknuile ngoüi. Hwome chem mokdaolaxpuix ija hwome mongzom müile kop-lole ngoüi.

²³Hwome mokkya mwottho ma tsuakle hüikya tüiüi, ilaxle hwom su-sa hwom füi thama apongkya müntüiüi. Kue othuithuima hwom tamchu hwom su-sa hwom to mohimanle ngoüi.

²⁴Hwome ku to zangjopkya ashuküi thoto wüi kue hwom zangjop to lanüi.

²⁵Shwon hia chun hosabue tomwüi saxlingle ngoüi; maihue saxkya ningle mailangbue tsaxsa saxüi, ilaxle pubu ma thomzün angkya chemchu chitüiüi. Zaion, ku otsao haxnu ma, thomzün angkya hia ochax chemchu müntüiüi.”