Read Wancho Naga Isaia 7 Bible Online

Isaia 7 - Wancho Naga bible

Isaia 7

¹Chemtue wanghompa Ahaz, Jotham sasün ilaxle Uzziah susün-e Judah apünle ngokyahex, zan lai. Siria nok wanghompa Rezin ilaxle Israel nok wanghompa Remaliah sasün Pekah hwome chemtue Jerusalem to singpuix, ija abakle kop ang chitho.

²Israel nok haxsüt to Siria nok süpahibu owüiole nguile ngoünkya zangwün chemtue Judah wanghom hato nguipuix, chix ilaxle chix khünaknu pangwüi, zangwin to pün sile alox pupule anyon.

³JOWANPAe Isaia füi akax: “Nang sasün Shear Jashub koplaxle wanghompa Ahaz füi apong ang paokox. Nange chix a nyitak mixbue mwot mokkya lomtang to apongüihex. Ikha a thakchi tüküi angkya ti apüikya thapshua oshuk ma tüile.

⁴Chix ang mik-hingle tamchu somdangle ngo angkya ilaxle zakyae poxle chingo angkya akaxkox. Wanghom Rezin hia Siria nokbu tamchu wanghompa Pekah hwom mongtsik a hatua anyi ma azwonle laikya wünkhut thangaxchu münchang.

⁵Siria nok, Israel nok hia ija wanghom athütlaxle zankat katzua tsuak.

⁶Hwome Judah nok tingtak laxle khünaknu ang hwom füito chinamnambale aza angkya ilaxle Tabil sasün wanghom tüntong ma athung angkya hwom mongkho ma dong.

⁷“Ikoxle ku, JOWANPAe ija ile chang ang müntom angkya le ngaidaoa.

⁸Büthüikoxle? Chemthüikoxle Siria a Damaska tukux tsak-zongle chitüi. Damaska a ija pongwün tingnu changkya. Damaska a wanghom Rezin tukux tsak-zongle chitüi. Ikoxle Israel nok hanpakma a, zanglao 65 mong ma, tuita jat-lile ngo angkya chifün chitüile maxdao angkya changle.

⁹Israel ma Samaria, ija pongwün tingnu tukux tsak-zong chitüi, tamchu Samaria a wanghom Pekah füi tsak-zongle chitüi. “Nang mongong okui chilolo, nang kui münlopu.”

¹⁰JOWANPAe Ahaz hato mama kaxho ahüi:

¹¹“JOWANPA nang Zang ma nang ang mowan tülaxhüi thüilax. Ija mowan a fangchi amalum tokyachu changtsuak chichangba thakchi zangkangting tokyachu changtsuak.”

¹²Ahaz-e lan: “Kue mowan münju. Kue JOWANPA to thwontsingle münchangüi.”

¹³Ija to Isaia-e lan: “Athax apalax, Dawid su-sa hwom. Khünaknu na-juale chang ang tomkya ngaxchu hünzom zongto huanu oma ang changle ngole — ikoxle hünzome Zang ngaxchu na-juale chang ang tomüi leo?

¹⁴Jangchangba müihudaoa, JOWANPA chix jaoe hünzom ang mowan naxfafa: naocha tuita owa ma nao nguidongle chang üntoxle lüka naosa tuita puxlaxle ‘Immanuel’ le amünüi.

¹⁵Chixe ma hanpakma alüile mongzangwün ang tsuakle tsongle hüikya zuma, khünaknue tsomti ling ilaxle nax-ti saxle ngo angkya changle.

¹⁶Ija hanpak nguile hüiüi thoto wüi, opange hünzom aza-anale changpuix, ija haxtok anyi a laxli chitüikya haxtok ang achangle awüt angkya changle.

¹⁷“JOWANPAe hünzom hato, hünzom khünaknu hato, wanghom homkha pangnu hato, Israel wangting Judah füi süile changkya füima sümapupa hanpak zanghan apüile fa angkya changle — chixe Asiria nok wanghom apüi angkya changle.

¹⁸“Chemtue ija hanpak nguile hüiüihex, Nail shuakux-tsim tokya Ijip nok hwot nguikya ningle ngui angkya, tamchu Asiria nok hwom haxtok tokya nax-lang ningle ngui angkya hanpakma hwom sele JOWANPAe pipit mütüi.

¹⁹Hwom a long tüikya haxsha to ilaxle ima tüikya longkunbu to othom-thom ma athütüi, ilaxle hwome hux füikya tham hia fumtsütnui pangwüi awangüi.

²⁰“Chemtue ija hanpak nguile hüiüihex, Jowanpa-e Eufrat tachi tokya khosex mix tuita ahyenle apüiüi — Asiria nok chongwangpa! — ilaxle chixe hünzom kaxmaimun ongle awütüi, nang khangmun hia tsangtsa munchu pangwüi ongle koxüi.

²¹“Chemtue ija hanpak nguile hüiüihex, manzai mix tuitae tuita maihusa hia zwonsa anyi mun wüi ong ang thole changkoxchu,

²²ibue chix ang okhongui tsomti koxüi. Changle, ija haxtok ma hidaole ozün ma toxkyabue sax angkya hanpakma tsomti hia nax-ti tüi angkya changle.

²³“Chemtue ija hanpak nguile hüiüihex, müikya grep haxtokbu, hajat makhange ozu tüikyabu ilaxle khop ngunkhix hajat pong tha tüikyabu pangwüi, kongbüi-zu hia hux püne limle changdaoüi.

²⁴Ikhato khünakbu a hap hia sanbu koplaxle müihap ang ahamüi. Changle, ija haxtok pangwüi kongbüi-zu hia hux püne awangle changdaoüi.

²⁵Manzaile tüikya haxhua pangwüi a, ikhato owachu chisoxle kongbüi fume awangle tüiüi. Ija a chun hia maihubue fum tsüt angkya nui ang achangle paoüi.”