Read Wancho Naga Liwi 1 Bible Online

Liwi 1 - Wancho Naga bible

Liwi 1

¹JOWANPAe Mosa, JOWANPA Ngwotnui Nyihom to se ilaxle ibibi wanlombu chix ang kox;

²ibu a Israel noke tö koxle changpongma tole mok angkya wanlombu: Hünzom owawae JOWANPA hato tö kox ang tsom-pom apüikya zuma, hünzome hünzom tö, müizyem khatokya zwon chichangba chun apüiüi.

³Tö a müizyem kha angkya zokle kox angkya tö hanpak jangchang thüiningle, chixe ofwot chitüikya müi ola kox angkya changle. JOWANPA tunthoma ija ma khülüix ma pongle kop angkya hanpakma, chixe ija JOWANPA Ngwotnui Nyihom pomtho to apüiüi.

⁴Zokle koxkya tö khangkho ma chixe ma chak danüi, ija a chix ochax hanpak ang chix khülüix ma pongle laxüi.

⁵Ija maihupong a JOWANPA tunthoma lang angkya changle; ilaxle nguapa Arun sasün hwome JOWANPA ang koxüi ilaxle Chix Ngwotnui Nyihom fülom hama tüikya tö-tsap akhople ija aji saküi.

⁶Ifüima hünzome ija müi okhwon liüi ilaxle tsople changüi.

⁷Nguapabue tö-tsap ding ma ha achwon laxle ija ma wüntakle changüi.

⁸Hwome ija müi kha angkya othom-othom, okhang hia ozaochu womle ija wün ding ma zoküi.

⁹Hünzome müi oche-oshin hia ocha-ochakbu müile so angkya changle, ilaxle ima mok ang atsyenle tüikya nguapae ibu tö pangwüi tö-tsap dingma danüi. Ija süt tö koxkya ongan-ozang a JOWANPA zongto amüikya changle.

¹⁰Hünzome chun chichangba zwon, ibu tö koxkya jangchang, müi a ofwot chizaikya ola chang angkya oli.

¹¹Hünzome ija tö-tsap zongma shuakuxchi kao ma langüi, ilaxle nguapabue ija aji tö-tsap akhople sak angkya changle.

¹²Ija texle akhixle chang füima, ikhama asukya nguapae müi othom, okhang hia ozao chuwüi womle, wünkha to danüi.

¹³Hünzome ija oche-okhax hia chisok-chaksokbu ti füi müile so angkya changpu, ilaxle nguapae ibu tö-tsap angkya wünkha to wünkhut ang ajangle zokle ashunle tö koxüi. Ija zokle tö koxkya ongan a JOWANPA zongto zinglongle müikya changle.

¹⁴Ilaxle JOWANPA ang zokle ashunkya tö ang hünzome osa tuita koxkya jangchang thüiningle, ija a osu chichangba jua-osa chang angkya oli.

¹⁵Nguapae ija tö-tsap hato apüilaxle ongom afünle langüi ilaxle ija okhang a tö-tsap dingma wün to zokle ashunüi; ija ajibu a tö-tsap akhople saküi.

¹⁶Chixe saxjun hia ija thomnui a tö-tsap zongma handünchi ma tüikya wünjuak thoknui to tswonle awütüi.

¹⁷Chixe ija ocha ma koplaxle ija tsangtsa afiüi, ikoxle ozang a chiapun-khaiüi, ilaxle ija a komkaile tö-tsap ding ma zokle ashunüi. Ija süt tö koxkya ongam a JOWANPA zongto zinglongle müikya changle.