Read Wancho Naga Liwi 10 Bible Online

Liwi 10 - Wancho Naga bible

Liwi 10

¹Arun sasün Nadap hia Abihu nyie jing-so zokkya khua makuxkux lax üntoxle ija ma wündix dan ilaxle ima ongan müikya so danlaxle JOWANPA mik-hu ma chitsaokya wün tö hokhie kox. Ija ningle mok angkya kaxtom chixe chifa.

²JOWANPAe allele wün ahüi. Ija wün to huakle hwom JOWANPA pomtho ma shunle zi.

³Ifüima Mosa-e Arun ang thüi: “JOWANPAe akaxkya kax a ija changle: Ku thothale changkya pangnusae wüi ku otsao chathua zale tüi angkya oli; kue ku khünaknu hato ku fuazangkya ngaile ahoüi.” Ikoxle Arun a kaxsix chidünle ngo.

⁴Ilaxle Mosa-e Arun hopasa Uzziel sasün, Mishael hia Elzafan nyi se, ilaxle hokhi ang thüi: “Ikhato oman ilaxle ija otsao nui angkya hünzom linao hwom thongnui pom homtho to mang paodao.”

⁵Ikhoma hwom nguilaxle Mosa-e kax koxkya ningle, mang ibu, hwom tsangtsa angkya nyizabu ma loplaxle azyale thongnui pom homtho to alai.

⁶Ifüima Mosa-e Arun üntoxle sasün Eliazar hia Ithamar hwom ang thüi: “Hünzom mangsop mongma aho ang, hünzome ma kho chishit ilaxle manyi-maza akyetle taxchang. Hünzome ile jangmok hünzom a ziüi, ilaxle noknu füi JOWANPA ang mongmakya tüiüi. Ikoxlechu Israel khünak mamabu a, JOWANPAe ahüikya wün ma mik max ang kopkyabu hanpak ang mang sople chang ang tsuak.

⁷Hünzom a zangshwom ang khünaknu asoxkya Nyihom zünkai to taxlai, janglai thüiningle hünzom a ziüi, chemthüikoxle hünzom a JOWANPA müngae pale atsao daokyabu changle.” Hwome Mosa kaxtom kax ma laxle chang.

⁸Ilaxle JOWANPAe Arun füi akax,

⁹“Hünzome tamchu hünzom su-sabu owaechu ku ngole tüikya Nyihom to juling-saxsax laxle taxngui. Hünzome ile jangmok, hünzom a ziüi. Ija a hünzom hanpak ang sutsün-satsün to nguile ojento twonle ngo angkya wanlom changpu.

¹⁰Hünzome zom tuina hia mama zangjang mwot-kat tamchu zanglom zom ma chitsaokya hia tsaokya oba ajatle awan thom angkya oli changpu.

¹¹Ilaxle Mosa makhange JOWANPAe hwom füi zangwünkya wanlom bakle, Israel khünakbu pangwüi hama apua angkya changle.”

¹²Ilaxle Mosa-e Arun füi tamchu atale tüikya chix sasün Eliazar hia Ithamar nyi ang thüi: “Zokle ashunle JOWANPA ang süt tö laxlaxle ilaxle ija makhange twonkhax chiawonkya an zinglaxle ija tö-tsap zui ma saxlax; chemthüikoxle ija a müimamakya otsao changle;

¹³hünzome ija a otsao nui ma saxlaxle chang angkya oli changpu, chemthüikoxle ija a zokle ashunle JOWANPA ang koxkya süt tö kha angkya nang üntoxle hünsa hwom süntom changle. Ija a JOWANPAe ku ang koxkya kaxtom changle.

¹⁴Ikoxlechu otsom hia ochung oja nguapabu hanpak ma JOWANPA ang sümüikya hingho ang tö koxle tüipuix, ija a nang üntoxle hünzom homkhae sax ang tsuak. Ija a hünzome zanglom ma otsao nui ma sax ang tsuak; chemthüikoxle Israel khünaknu notom-tusüi tö tuita ang langkya kha angkya, nang üntoxle hünsa hwom süntom hanpak ang ibu koxkya changpu.

¹⁵Hwome JOWANPA ang süt tö tuita ang müizao koxle changpongma müi ochung hia otsom tomwüi apüi angkya changpu. JOWANPA kaxtom ningle ibu a nang süntom; nang füi tomle nang naosombu zongto othuithuima hwom süntom ang ngoüi.”

¹⁶Ilaxle ochax tö hanpak ang Mosa-e zwon khütkhile lom, ikoxle ija a zokle ashundao le bang. Ikhoma ozün ma tüikya Arun sasün Eliazar hia Ithamar nyi füi chix ang mong huanuma ma.

¹⁷Ilaxle chixe thüi: “Ija a ataxkya otsao, tamchu ija a JOWANPAe, khünaknue lyenkya ochax pao angkya hanpakma koxkya changpu. Jangchangba hünzome ija a büthüikoxle otsao nui ma chisax?

¹⁸Hulax, ija aji a otsao nui to chianop; idaile ku kaxtom ningle hünzome ija a homtho towüi saxse changpu.”

¹⁹Ilaxle Arun-e Mosa ang thüi: “Hulax, anyix khünaknue ochax tö hia zokle ashunkya tö JOWANPA ang koxdaoa; ilaxle kue athaxchu iningkya thama apong ngopu, üntoxle anyix kue ochax tö saxdaopuix thüikoxba JOWANPAe ija pongle kopsecha hex?”

²⁰Ilaxle ija kax atatkya zuma Mosa ang mongzom müi.