Read Wancho Naga Liwi 12 Bible Online

Liwi 12 - Wancho Naga bible

Liwi 12

¹JOWANPAe Mosa makhange wanlom ibibi

²Israel khünaknu füi akaxkox: Sheko tuita ma nao nguidong ilaxle lüka naosa puxle jangchang, she ang tutsyen paokya tukma atsaokya ningle nyix anüt a atsaole ngo angkya changle.

³Nyix-achyet lükya to ija nao mündün-katjole Khwonzüt-Zom zingüi.

⁴Hanpak nyix tsübün-azom kople nao honu atsaole ngo angkya oli. She tsaole khongai angkya hanpak nguile machang tanto, she-e otsao bwot-ba chemtochu chitwon angkya oli, chichangba zangshwom-nui to chingui angkya oli.

⁵Ikoxchu she-e shekosa tuita puxle jangchang, she ang tutsyen paole changpongma atsaokya ningle hatdang anyi atsaole nuiüi, ilaxle she khongai angkya hanpak nguile machang tanto hanpak nyixpuzom-azok atsao-alangle nui angkya oli changle.

⁶Ilaxle chemtue lüka naosa hanpakma wüi changlax chichangba sheko naosa hanpakma wüi changlax, she atsao-alangle ngokya hanpak tsuakle hüikya zuma, khünaknu asoxkya Nyihom tunthoma, nguapa hato zokle ashunkya tö hanpak ang she-e zanglao nguidaokya chun hosa tuita, osu chichangba jua-o hosa tuita le ochax tö hanpak ang apüi angkya oli changle.

⁷Ijabu she-e JOWANPA tunthoma koxüi ilaxle she hanpak ang ochax tokya khongai angkya zomzingle changüi; ilaxle aji jenkya ochax tokhange she tsaole ngoüi. Lükasa chichangba shekosa ngünkya hanpak ang ija a wanlom tuita ang changle.

⁸Ilaxle she-e chun hosa kox ang chitho thüikoxle, she-e jua-o anyi chichangba osu anyi apüi angkya changle; tuita a zokle ashunkya tö hanpak ang ilaxle tuita a ochax tö hanpak ang; ilaxle nguapae she hanpak ochax tokya khongai angkya zom zingüi ilaxle she a otsao ma ngoüi.