Read Wancho Naga Liwi 14 Bible Online

Liwi 14 - Wancho Naga bible

Liwi 14

²Ngwonkak tüikya khünak hanpakma chix atsaole khangkho zangngai angkya nyix ija wanlom tüi angkya changle: Chix a nguapa hato apüiüi,

³ilaxle nguapae thongnui tokna to paolaxle chix to hule wanüi. Ikoxle ngwon a zuale müile jangbang,

⁴ijama, owa atsaole khongai angkya tüipuix, chix hanpak ang, ozün ma tsaothakya osa anyi ilaxle ha ang a sedar ha üntoxle zukhik tamchu haisop pünkang apüi angkya nguapae kax koxle changüi.

⁵Ifüima osa tuita a titsao füikya komtik ding ma lang ang tomüi.

⁶Chixe ata osa kopüi, ilaxle sedar ha hia zukhik tamchu haisop, ibu pangwüi langdaokya osa aji ma somüi.

⁷Ngwon atsao angkya khünak to chixe ija ajie othom anüt ma saküi, ifüi chixe ija mixsün a tsaokya ang achangünale ngaiüi. Ifüima chixe ozün ma tüikya osa a homtho to danle apaoüi.

⁸Ija mixsüne chix nyizabu sole changüi, chix khobu pangwüi ongüi ilaxle ti ajole changüi; ifüima chix a zanglom ma tsaokya ang changüi. Athax chix a thongnui to ngotsuaküi, ikoxle nyix anüt hanpakma chix ma nyihom homtho to ngo angkya changle.

⁹Nyix anüt lükya to chix khangmun hia tunmun, chix mikzyen üntoxle chu chix tsangtsa angkya mun pangwüi ongle awütüi; chixe ma nyi-za soüi ilaxle ti ajole changüi, ifüima chix zanglom ma otsao ang changüi.

¹⁰Nyix achyet lükya to chixe zanglao nguidaokya ofwot chizaikya chunla anyi, chuncha tuita, olip münga füi awon an tuak azom ilaxle olip münga pe tuita le apüiüi.

¹¹Nguapae ija mixsün hia ibu tö JOWANPA ngwotnui Nyihom homtho to apüiüi.

¹²Ifüi nguapae chunla tuita laxüi tamchu münga othom azom ma ahankya othom tuita laxüi, ija füi awon üntoxle ija ochax tö ang koxüi. Chixe ibu nguapa hanpakma amüikya hingho tuita ningle JOWANPA ang koxüi.

¹³Chixe ija müi ochax tö hia zokle ashunkya tö ang koxkya müibu langkya onui ma langüi. Chixe ija mok angkya wüi changle chemthüikoxle ochax tö chuwüi ochax tö tuita ningle nguapa kux changpu tamchu ija a ataxkya otsao changpu.

¹⁴Nguapae ija chun aji hidaole laxüi ilaxle zanglom ma tsaoünale ngaile kox angkya mixsün to, ija füi, tsaxchi nakho ma, tsaxchi chak-khi khinu ma tamchu tsaxchi chakhi khinu ma lyetle kox angkya changle.

¹⁵Nguapae olip münga hidaole laxüi ilaxle ija chix nongchi chakwok ma thoküi,

¹⁶ija to chix tsaxchi chak-khi füi thuüi ilaxle ikha angkya hidaole JOWANPA ngwotnui ma othom anüt ma saküi.

¹⁷Chixe ma chakfa ma tüikya münga hidaole laxüi ilaxle chun ajichu hidaole laxüi üntoxle zanglom ma tsaoünale ngai angkya mixsün to tsaxchi nakho ma ilaxle tsaxchi chak-khi khinu ma tamchu tsaxchi chakhi khinu ma ibu füi lyetle koxüi.

¹⁸Chix chakfa ma ota tüikya münga füi chixe ija mixsün khang to pale koxüi. Ile chix otsao ang achangle kox angkya zanglom zomzingle koxüi.

¹⁹Ifüima nguapae ochax tö koxüi ilaxle chix atsao-athale kox angkya zom zingüi. Ifüima chixe zokle ashunkya tö kox ang müi langle changüi,

²⁰ifüima tö-tsap ma süt tö koxüi. Ile atsaole khongai angkya nguapae zom zingle changüi, ifüima khünak a zanglom ma tsaokya ang changüi.

²¹Ikoxle khünak a ibu chemchu kox ang chithole tuimix-nuakmix tuita jangchang, chixe ma atsao angkya hanpakma ma ochax tö kox angkya hanpakma chun olasa tuita apüiüi; ija a JOWANPA ang koxkya kha angkya nguapa hato apüi angkya hingho amüikya tuita ang changpu. Chixe süt tö hanpak ang olip münga füi awon ankhix tuak tuita üntoxle olip münga wüi pe tuita othom azom ma ahanlaxle othom tuita apüiüi.

²²Chixe osu anyi chichangba jua-o anyi le apüiüi, ija tuita a ochax tö hanpak ang ilaxle ata a zokle ashunkya tö hanpak angle apüile koxüi.

²³Chix atsaole changkya füima nyix achyet lükya to chixe nguapa hato ija Nyihom fülom to apüile koxüi.

²⁴Nguapae ija chun hosa hia olip münga kopüi ilaxle nguapa hanpak ang apüikya amüikya hingho tuita ningle JOWANPA ang tö koxüi.

²⁵Chixe chun hosa langüi, ija aji hidaole laxlaxle ija mixsün to tsaxchi nakho ma ilaxle tsaxchi chak-khi khinu ma tamchu tsaxchi chakhi khinu male lyetle koxüi.

²⁶Nguapae ija aji hidaole chix nongchi chakwok ma thoküi,

²⁷ilaxle chix tsaxchi chak-khi makhange ija aji füi JOWANPA ngwotnui to othom anüt ma saküi.

²⁸Chixe aji füi chemle sakpuix ija ningle münga füi chuwüi ija mixsün tsaxchi nakho to, tsaxchi chak-khi khinu to, tsaxchi chakhi khinu to, le sakle koxüi.

²⁹Ota tüikya chix chak angkya münga füi chixe ija mixsün khang to pale koxüi; ile ija mixsün atsaole khangkhongai angkya zom zingle koxüi.

³⁰Ifüima chixe osu tuita chichangba jua-o tuita le

³¹ochax tö hanpak ang tamchu süt tö hanpak ang, zokle ashunkya to füi tomle koxüi. Ile nguapae atsaole khangkhongai angkya zom zingüi.

³²Ibibi a ngwon-kak füikya khünak tuita, zangjang tö kox ang chithokya khünak hanpak ang atsaole khongai angkya zomzing wanlom changle.

³³JOWANPAe Mosa hia Arun nyi ang,

³⁴(Chemtue JOWANPAe hwom ang koxkya haxtok Kanan chaxwan aloplaxle tingtan-nokzingle changüihex ipongma) Israel noke hwom hombu to ngwon paxle changpongma twon angkya wanlombu adangle kox: Hünzom owawae ma homkha ma ngwon-kak paxkya ngün ang kople jangchang,

³⁵ipongma hompupae nguapa hato nguilaxle hwom homkhama ngwon-kak paxkya kakle kox angkya changle.

³⁶Ilaxle homkha ma atüitüi pangwüi chitsaokya ang chichang angkya kuxma, mak to hu ang nguapa hato mahüiba, hwom hom ahua angkya hanpakma nguapae kaxkoxle changüi, ifüima nguapa a hom to hu ang nguiüi.

³⁷Ilaxle chixe kak to hule wanüi. Ilaxle hing-hing-kwonle chichangba khikhisumle katuk to saxkya man jangbang thüiningle,

³⁸chixe ija hom dantoxüi ilaxle nyix anüt hanpakma hom hakle dantoxüi.

³⁹Nyix anüt lükya to chatlaxle nguapae ija to tamhule wanüi. Ija kak onüi tsale jangbang thüiningle,

⁴⁰ijama, long ojapang ma kak-lak bangpuix, ibu a tingkhua pan athaile oma-oshix athünkya nui chitsaokya khato tswonle awüt angkya hwom ang kax koxüi.

⁴¹Chixe hommong züilaxle müile sole atsao ang tomüi. Long füi atsamle tüikya hax hwome pan athaile oma-oshix athünkya nui chitsaokya khato awütüi.

⁴²Ifüima awüt daokya longbu manma chatle mama long onüi danüi ilaxle long katuk to haxzün füi pale chwopüi.

⁴³Ilaxle chixe long apaole chang füima hom züile atsao koxle haxzün füi chwople chang füima, ija hom ma kak tamchatle janglai thüiningle,

⁴⁴imawüi nguapa nguilaxle hule wanüi. Mak a homkha ma sisile tsale jangtüi, ija hom a tsaokya hom münchang.

⁴⁵Ija hom pünüi ilaxle ima tüikya long, pün tamchu katuk to pakya hax pangwüi pan athaile paolaxle oma-oshix athünkya chitsaokya nui to awütüi.

⁴⁶Ija hom hakle tüipongma owawa nople le jangchang, chix a hansong kople otsao münchang.

⁴⁷Owawa ija haxkha ma jiple hia fongsaxle jangchang, chixe manyi-maza so angkya wüi changpu.

⁴⁸Ikoxle ija hom katuk to haxe pale chang füima, nguapa tamchatle hu ang nguikya thoma, kak tamchatle paxle chibang thüiningle chixe ija hom a otsao changle le ngaiüi, chemthüikoxle ikha angkya okak-olak a komkaile atsaile paodaoa.

⁴⁹Hom atsao angkya hanpakma, chixe osa anyi laxüi, han ang sedar ha hidaole, zikhik hia haisop kangsa laxüi.

⁵⁰Chixe osa tuita titsao füikya haxtik-khe dingma langüi.

⁵¹Ifüima chixe tsaokya ti tok ma langkya ija osa aji ma sedar ha, haisop zu, zukhik tamchu ozün ma tüikya osa tuita somüi, ilaxle chixe ija füi hom to othom anüt ma saküi.

⁵²Ile chixe, osa aji, titsao, ozün ma tüikya osa, sedar ha, haisop zu hia zukhik, ibu füi chixe hom atsaoüi.

⁵³Ifüima chixe ozün ma tüikya osa a pantua to paolaxle danle apaoüi. Ile chixe wanlom ma hom atsao angkya zomzingle changüi ilaxle ija hom a otsao ang changüi.

⁵⁴Ibu a ngwonkak hanpakma wanlombu changle.

⁵⁵Nyiza ma tüikya hia hom ma tüikya ngwonkak hanpakma, ilaxle omak-ochak laikya bama, buk laikya bama tamchu tsom hia pam laikya bama tamchu tsangtsa to thuak-thuak-thangle laikya bama,

⁵⁶

⁵⁷ibu pangnu khoma chemtue chitsaokya ang changpuix ilaxle chemtue tsaothakya ang changpuix, ija bama wanlom ibu füitix tsuaküi.