Read Wancho Naga Liwi 16 Bible Online

Liwi 16 - Wancho Naga bible

Liwi 16

¹JOWANPA ang chitsaokya wün tö koxkya zuma Arun sasün anyi langkya füima JOWANPAe Mosa füi akax.

²Chixe thüi: “Hüntüi Arun ang, chix a Ataxkya Otsao Nui to otutu matix dong angkya changle, le thüilax; büthüikoxle Tsaotsüt Suak tüikya kha a, ija ding ma tüikya Chingcha Ngwotnui ma, zangfwom khato ku ngaile ahokya kha changle. Ija kax ma chilax jangthüiba chixe ma mik-max angkya ataküi.

³Ija Ataxkya Otsao Nui to chix a ochax tö to kox angkya hanpakma maihupongsa tuita ilaxle zokle ashunkya tö kox ang chun ola tuita le koplaxle tix nop ang tsuak.”

⁴Ifüima JOWANPAe wanlom ibibi adangle fa: Ataxkya Otsao Nui to nopüi thoma Arun-e tijo-chaktsux ilaxle nguapa nyi-za jaknyi füi zingkya nyilo, wok-hit nyi, khang-ngüi-nyi, ibibi laxle kop angkya changpu.

⁵Israel khünakbue noknu mün ma Arun ang, ochax tö hanpak ang zwonpong anyi ilaxle zokle ashunkya to hanpak ang chun ola tuita le apüile kox angkya changpu.

⁶Chixe maihupong tuita, chix ilaxle hwom homkha ochax pao angkya hanpakma ochax tö ang koxüi.

⁷Ifüima chixe ija zwon tom-anyi a JOWANPA ngwotnui Nyihom fülom to paoüi.

⁸Ikhato chixe longtom anyi tswonlaxle nantaküi, tuita a JOWANPA mün ma ata a Azazel mün ma.

⁹JOWANPA mün ma zwon oja tswonpuix, ija a Arun-e ochax tö hanpak ang JOWANPA ang koxüi.

¹⁰Azazel mün ma oja tswonpuix, ija zwon a, khünaknu ochax hünle pao angkya hanpakma Azazel hato faokha to danle apaoüi.

¹¹Chemtue Arun-e, chix tamchu homkha ochax tö hanpak ang maihupong koxle ochax tö koxpuix,

¹²tö-tsap angkya chixe chuale ngokya wündix füi awangle tüikya wünhok-khua tamchu chak ma awangle ongan müile ngankya jing, ibu pangwüi Ataxkya Otsao Nui to apüiüi.

¹³Ikhama, JOWANPA ngwotnui ma chixe ija ongan müikya jing wün to shoüi, ilaxle ija jing wünkhut füi Tsaotsüt Suak angkya Chingcha Ngwotnui to alumle changüi. Ija a, ija ngünlaxle chix chizi angkya hanpakma.

¹⁴Chixe maihupong aji hidaole laxüi ilaxle chix chak-khi makhange ija Chingcha Ngwotnui thüntho chito saküi tamchu ikha angkya wüi Tsaotsüt tunthochi ma othom anüt ma saküi.

¹⁵Ifüima chixe khünaknu ochax hanpakma ochax tö kox ang zwon langüi, ija aji a Ataxkya Otsao Nui to dünüi ilaxle ija füi Chingcha Ngwotnui to saküi üntoxle chu Tsaotsüt Suak tunthoma, chixe maihupong aji füi mokdaokya ningle moküi.

¹⁶Ile, Israel khünaknu chitsaole tüikya hwom ochaxbu khoma Ataxkya Otsao Nui chitsaole tüikya atsao angkya hanpakma chixe zomzingle changüi. Chixe ija Nyihom hanpakma chuwüi mok angkya changle, chemthüikoxle ija a wanlom ma otsao chichangkya, hwom thongnui osungwa ma tüikya changle.

¹⁷Wanlom ma atsaole zomzing ang Ataxkya Otsao Nui to Arun nopkya malai tanto, Nyihom khama owachu chingoüi. Chemtue chixe ma hanpak ang, kako hanpak ang tamchu Israel khünak noknu hanpak ang ija zomzingle changkya zuma,

¹⁸chix a tö-tsap hato nguilaxle zokle ashunkya tö koxle ija atsaoüi. Chixe maihu ji hidaole, zwonji hidaole le laxüi ilaxle tö-tsap ma tüikya ozong ali pangwüi to ibu füi paüi.

¹⁹Tötsap to othom anüt ma chix chak-khi makhange ija ajie saküi. Ile chixe ija, Israel khünaknu ochax tokya atsao koxle otsao ang achangüi.

²⁰Ataxkya Otsao Nui hia JOWANPA ngwotnui Nyihom pangwüi tamchu tö-tsap, ibu atsaole Arun-e zomzing tsuakle changkya zuma, Azazel hanpak ang zünle kopkya ozün ma tüikya zwon chixe JOWANPA ang koxüi.

²¹Chixe chix pangnyi chak ija zwon khangkho ma danüi ilaxle ochax lili pangwüi tamchu Israel khünaknu alünle ajongle thaikya pangwüi ngaiüi ilaxle ibu ochax pangwüi zwon ma ataile koxüi. Ifüima kamle thomkya mixsüne ija zwon a faokha to jwonle apaoüi.

²²Ile ija zwone hwom ochax pangwüi khünak chingokya faokha to laxlaxle paoüi.

²³Ifüima Arun a Nyihom to nguiüi. Ataxkya Otsao Nui to dongüima laxle kopkya chix nguapa nyi-za siküi ilaxle ibu ikhama danle toxüi.

²⁴Chixe otsao nui to ti-ajoüi ilaxle chixe zangjang nyiwun laxüi. Ifüima paolaxle hwome ma ochax hia khünaknu ochax hanpak ang zokle ashunkya tö koxüi.

²⁵Chixe ochax tö hanpak ang langkya müi ozao chixe tö-tsap ma zokle ashunüi.

²⁶Faokha to Azazel hato zwon jwonle apaokya mixsüne thongnui to chatüi thoma ti-ajole nyi-za shong-lüi angkya changle.

²⁷Maihupong hia zwon oja ochax tö kox ang laxpuix; ochax pao angkya hanpakma oja aji Ataxkya Otsao Nui to apüipuix, ija a thongnui homtho to alailaxle zokle ashunüi. Okhwon, omüi, ilaxle okhax-omong pangwüi zokle ashunüi.

²⁸Ija zokle ashunkya mixe thongnui to nguiüi thoma manyi-maza sole tijo-chaktsux kop angkya changle.

²⁹Füichima ibibi wanlom othuithuima twonle ngo angkya oli changle. Lyetkua anüt lükya bün nyixkha Israel khünaknu tamchu hwomkha to ngole tüikya mixnokbue chisax-chilingle tamchu mwot chemchu chimokle atsao angkya changle.

³⁰Ija nyix a, wanlom ningle hwom otsao ang achang angkya kuxmale hwom ochaxbu tokya atsao ang zomzing angkya changle.

³¹Ija nyix a tüle otsao nyix ang changüi. Ija nyix hwome chisax-chilingle atsaole mwot chemchu chimokle nuiüi. Ija wanlom a füichimachu jento twonle ngo angkya changle.

³²Nguakho müile kamle atsaokya tamchu hopa mantswon ang atsaole thomkya mixsüne tix ija atsao angkya zom zingüi. Chixe nguapa nyi-za laxüi;

³³ilaxle Ataxkya Otsao Nui, JOWANPA Ngwotnui Nyihom, tö-tsap, nguapabu üntoxle chu Israel khünaknu pangwüi atsao angkya hanpakma ija atsaokya zom zingüi.

³⁴Ibu wanlom a athax füichima jento twon-ngo angkya changle. Israel khünaknue hwom ochax tokya atsao ang ija zom a zanglao to tampong zingüi. Idaile JOWANPA kaxtom ningle Mosa-e mokle tsuak.