Read Wancho Naga Liwi 17 Bible Online

Liwi 17 - Wancho Naga bible

Liwi 17

¹Jowanpa-e Mosa ang kaxtom koxle,

²Arun hia chix sasün hwom ang tamchu Israel khünaknu ang ibu wanlom kox angkya akax.

³Israel khünakbue Jowanpa ang tö kox ang, Jowanpa Ngwotnui Nyihom fülom ma chichang homtoxle ojongjong to, maihu wüi changlax chichangba chun wüi changlax chichangba zwon wüi changlax, langle jangchangba ija khünake Wanlom pünkya ang changpu.

⁵Ija kaxtom a, amipongma Israel khünaknue zangshwom ang kothofa to langkya müi athaxpi Jowanpa hato apüile lang angkya kax changle. Athaxpi hwome ibu a zompu-zangpa hato apüilaxle notom-tusox tö hanpak ang langüi.

⁶Nguapa-e aji a tö-tsap kaochi sam ma, Nyihom fülom ma awütüi üntoxle ozao a, Jowanpa zongto ongan müikya alaile zokle amiküi.

⁷Zwon ma amuakya baobu ang kothofa to müilang laxle tö koxle, athaxpi Israel khünaknu ang Jowanpa to mong chiongle chitüi angkya oli münchang. Füichima Israel khünaknue ija wanlom a jento thom angkya oli changpu.

⁸Israel khünak wüi changlax mixnok wüi changlax, onok khato ngole hüikya khünak owae, zokle ashunkya tö wüi changlax chichangba mama tö wüi changlax,

⁹Nyihom fülom ma chichang homtoxle, Jowanpa ang mama khato tö koxle jangchangba, chix a Zang khünak tuita ang ema laxle chithomüi.

¹⁰Israel khünak wüi changlax chichangba mixnok wüi changlax, onok füi ngokya khünak tuitae, aji füi afomle müi saxle jangchangdao, Jowanpa-e chix chito tok ahoüi ilaxle chemtuechu ija khünak a chix khünak changpule chieüi.

¹¹Zünmok pangnu ang wüi khüzün a aji ma tüipu; idaile aji pangwüi khünaknu ochax pao angkya kuxma tö-tsap chitong ma thokkoxle thüipu.

¹²Ikhoma Israel khünaknu füi Jowanpa-e, hwom wüi changlax chichangba mixnok wüi changlax, onok khama womle tüikya khünak owaechu aji füi afomle müi chisax angkya akaxpu.

¹³Israel khünak wüi changlax chichangba mixnok wüi changlax, onok khama womle tüikya owawae, wanlom ma otsao ang laxkya müi chichangba o lang-huakle jangchangba, chixe ija aji hax to thokle awütüi ilaxle ija to hax füi chwople toxüi.

¹⁴Zünmok ang khüzün a aji ma tüipu, ikhoma Israel khünaknu füi, Jowanpa-e, aji füi afomle müi chemchu chisax angkya, ilaxle owawae ija saxle jangchangba ija khünak ang chemtuechu chix khünak ang chilax angkya akax.

¹⁵Khünak tuita, Israel nok wüi changlax chichangba mixnok wüi changlax, owawae ngat-to zikya chichangba ochax-ozan to maxkya müimang saxle jangchang, chixe ma nyi-za solaxle ti-ajoüi üntoxle hansong alople chitsaokya ang ngoüi.

¹⁶Chixe ile chimok thüiningle, ija ochax thama chix huak hünlit ang changüi.