Read Wancho Naga Liwi 18 Bible Online

Liwi 18 - Wancho Naga bible

Liwi 18

¹JOWANPAe Mosa ang

²Israel khünaknu füi akax angkya kaxle thüi: “Ku a JOWANPA hünzom Zang changle.

³Kaipongma hünzom ngole toxdaokya Ijip nok chichangba kue hünzom zunle apüile ngokya Kanan haxtok, ibu ma tüikya khünakbu ningle taxchang.

⁴Ku wanlom kax ma laxle tüi üntoxle ku kaxtom ma moklax; ku a Jowanpa hünzom Zang changle.

⁵Kue mokkya mwot hia ku wanlombu ningle moklax; ile jangmokba nange nang khüzün sünle kopüi; ku a Jowanpa changle.”

⁶Jowanpa-e wanlom ibibi fa: Ma haxnu-homsa khama owa füi chu chinunchakkaile taxchang.

⁷Manu füi chinunchakkai laxle mapa mong amale taxchang. Nange manu mong chuwüi taxama.

⁸Hünpa kakonu owawa füi chinunchakkaile changkya tokhange nange hünpa mongma ang taxtom.

⁹Mana-manao chichangba ma homkha ma tomwüi tsomle atsünkya owawa füi chinunchakkaikya taxtüi.

¹⁰Ma sacha füi chinunchakkaikya taxtüi; ija a nang zongto oma tomtata ang changüi.

¹¹Nu ma chitom pa ma tom chichangba pa ma chitom nu ma tomle changkya mana-manao füi chinunchakkaikya taxtüi. She chuwüi nang zongto nanao tomtata changle.

¹²Mapa füikya nanao chichangba manu füikya nanao owa füichu chinunchakkaikya taxtüi.

¹⁴Ma hopasa kakonu füi chinunchakkaile taxtüi; she chuwüi nang zongto honyenu ang changle.

¹⁵Ma nomcha füi chinunchakkaikya taxtüi;

¹⁶chichangba matüi manao kakonu füi chinunchakkaile taxtüi.

¹⁷Nangjip-nangpomle ngodaokya mixcha sasün chichangba hosu owawa füichu chinunchakkaile taxtüi; hwom a nang zongto haxnu-homsa ang sütüi ilaxle ija a jonglyenkya tuita ang changüi.

¹⁸Nang kako ozün ma tüitanto, nange ma kakonu honao ma kako ang taxlax.

¹⁹Sheko tuita tutsyen paole ngopongma she füi jip-pomle taxchang, chemthüikoxle she a zonglom ma matsao.

²⁰Mix kakonu owawa füi chinunchakkaile taxchang; ile chang koxle nang zomlom ma chitsaokya ang achangüi.

²¹Molek zangshwom pongma lax ang nang naosom opupuchu taxkox. Ile chang koxle Jowanpa ang nang füi küntsik mongma angkya tüiüi.

²²Lüka owaechu lüka tomtom füi nganguile taxchang, ijaningkya thua Zang tüle anule.

²³Owa lükaechu chichangba owa shekoechu müifüi nganguile chichangüi; iningle chimüikya mwot mokkya makhange nang zomlom ma chitsaokya ang achangüi.

²⁴Iningkyabu mwot oli tuita ningkya olom makhangechu nang tuita chitsao ang taxachang. Songsaribue iningkya mwotlom makhange hwom alüile chitsaokya ang achangle. Ibu songsaribu a hünzom thoma ija haxtok ma bangkyabu tamchu hünzom ngui ang angkya thoto Jowanpa-e jwonle apaokyabu changle.

²⁵Hwom mwot-kat makhange ija haxtok a chitsaokya ang achangle. Ikhoma JOWANPAe haxtok to thuakzomle ilaxle ikhama ngokya khünakbu pongle chikopkya ang achangle.

²⁶Ibu chisumüikya mwotbu pangwüi hwome mok, ilaxle haxtok chitsaokya ang achangle, ikoxlechu hünzome ibu a chimoküi. Hünzom pangwüi, Israel nok wüi changlax, mixnok wüi changlax, hünzom füi tüikya khünak noke wüi JOWANPA wanlom hia kaxtombu kax ma laxle tüi angkya oli changle;

²⁸ile changkox tix, hünzom thoma bangkya songsaribu awütkya ningle awütkya ningle haxtoke hünzom mün-awütüi.

²⁹Iningle chisumüikya mwot mokle ngokya khünak opupuchu JOWANPAe chix khünak ang münlaxle hünzome awan ngopu.

³⁰Ilaxle JOWANPAe akax: “Ku kaxtom kax ma laxle tüilax ikoxle ija haxtok ma hünzom thoma bang angkya khünakbu ningle haxtok tamchu iningkya tütali mokkya makhange hünzome ma alüile chitsaokya ang taxachang. Ku a JOWANPA hünzom Zang changle.”