Read Wancho Naga Liwi 19 Bible Online

Liwi 19 - Wancho Naga bible

Liwi 19

¹JOWANPAe Mosa ang

²Israel khünaknu hama wün angkya kax koxle thüi: “Otsao ma ngolax, büthüikoxle ku, JOWANPA hünzom Zang a otsao changle.

³Hünzome pangnusae wüi manu hia mapa chathua zale tüi angkya changpu, üntoxle Sabath nyix nuiüi. Ija a, ku, JOWANPA, hünzome Zang-e fakya kaxtom changle.

⁴“Ku awüt toxlaxle chapa to taxshwom; khop hia jan füi chapa zinglaxle ibu to shwomle taxchang. Ku a JOWANPA hünzom Zang changle.

⁵“Chemtue notom-tusox tö hanpak ang hünzome müi langle changüihex, ipongma kue koxkya wanlombu thomlax, ile chang koxle kue ija tö pongle kopüi.

⁶Omüi a müi langkya nyix chichangba ofüinyix wüi saxtsuak angkya oli changle. Azom-lükya nyix thoma abangbang müi wün to zokle ashun angkya oli,

⁷chemthüikoxle ija a zom lom ma chitsaokya changle, idaile owawae ija saxle jangchang thüiningle kue tö pongle münkopüi.

⁸Owae ija saxlaxpuix, ku ang fakya ija chixe zangjang süt ang laxkya bama chix thaikya ang achangüi, ilaxle chix ku khünak tuita ang müneüi.

⁹“Chemtue hünzome tsax atule changüihex, chamtua-suizang to lünle nange sax taxzüt, üntoxle chu saxwüt asüi ang tam taxchat.

¹⁰Alakle dantox daokya hia dütle ngoünkya grep ziak tswon ang ija haxtok makhange tam taxle ngo; ibu a mixnokbu hia zasa-khaxsabu hanpak ang dantox dao. Ku a JOWANPA hünzom Zang changle.

¹¹“Tax-ahux chichangba mix taxdyen chichangba taxatse.

¹²Nange chithomtsuak angkya ningle jangchang thüiningle ku mün ma hexle tsaosaxle taxchang; ile changkyae ku hato münma apüile. Ku a JOWANPA hünzom Zang changle.

¹³“Nange owawa mwot-kat zongma laxle taxpao chichangba mix ziasyen shomüi ang taxlax. Nange mwot amok daokya khünak ang hingchak mün chifa homtoxle jata ngaxchu taxthom.

¹⁴Naba mix to taxthuak chichangba mikduak mix tuntho to asua angkya jali taxtox. Ku thua zalax; ku a JOWANPA hünzom Zang changle.

¹⁵“Wanlom ma kaxfün fa angkya zangwün azut pongma olom ma tamchu sule mokkox; mixshix-zasabu to asongle hu ikoxle saxpu-luawang to angakle hule mapai-mixzünkya chitüile tomzi bama sukya kaxfün laxkox.

¹⁶Owawa bato khualople taxchang, ilaxle owawa a chix khüzün hanpakma kaxfün khwa ma tüipongma, nang zangwüne chix to kaxjua fongtsuak angkya olom jangtüi thüiningle ija akaxle laxkox. Ku a JOWANPA hünzom Zang changle.

¹⁷“Nange ma tomzi to mongto khax-khule taxchang, ikoxle hünzom ba angkya zangwün zingmüi ma tsuakdao, ile changkox tix wüi hwom zongto nange ochax lyenkya müntüiüi.

¹⁸Owawa to olüix khomkya taxtüi chichangba chix to anule taxngo, ikoxle ma tomzi to ma bütukuxle mongkünkox. Ku a JOWANPA hünzom Zang changpu.

¹⁹“Ku kaxtom kax ma laxle tüilax. Mali-mali müi kuilex-litai ang taxtom. Haxtok jongta khama wüi mali-mali pün anyi tomle taxküi. Zi-li-anyi füi zingkya nyiwun taxlax.

²⁰“Dacha tuita owawa mixsün kakonu changpule atsingshokya ikoxlechu she ang otha mathom tamchu dan-panle machang, ikoxle owawa mama khünake she füi chinunchakkaile jangchang, hokhi pangnyi ang wüi sikngün apong ang tomüi, ikoxlechu mik max ang müntom chemthüikoxle she a dacha tuita changle.

²¹Ija mixsüne chix tsangthom tö hanpak ang ku ngwotnui Nyihom to chun ola tuita apüiüi,

²²ilaxle ija mixsün ochax atsao angkya hanpakma nguapae zomzingle khongai koxüi, ilaxle Zang-e chix thaikya alakle awütüi.

²³“Chemtue hünzome Kanan haxtok to nguiüihex tamchu saxpüli pünziak-laimo küi-thwomle changüihex, pongwang angkya zanglao azom hanpak oziak a chitsaokya ang laxüi. Ipongma hünzome ikha angkya chisax angkya changle.

²⁴Zanglao ali lükya to JOWANPA, ku füi hünzom ang mongzom müikya aho ang tö koxkya tuita ningle, pünziak-laimo komle atsaoüi.

²⁵Ikoxle zanglao aga lükya to hünzome pünziak sax ang tsuaküi. Hünzome ibibi komle jangmok thüiningle hünzom pünbue oziak tüpong-tüpong dünüi. Ku a JOWANPA hünzom Zang changle.

²⁶“Aji tüingale müi taxsax. Hing füi khun-khekya mwot otuechu taxmok.

²⁷Hünzome muntsakzyen hatokya kho taxzüt chichangba tunmun taxzüt

²⁸chichangba hünzome ma to huxtule taxchang chichangba ziünkya hanpak ang mongsi-ngünkya ahole nang tsangtsa to janman toxle mak taxkha. Ku a JOWANPA hünzom Zang changle.

²⁹“Zangshwom-Hom ma tsangtsa hangmix ang achang ang tsanlaxle hünzome ma sacha hwom hato thajao apüi ang taxtom; hünzome ile jangmok thüiningle hünzom a mama baozangbu hato paokya ang achangpu ilaxle hünzom haxtok a nushix dongkya haxtok ang changüi.

³⁰Sabath nyix atsaole thomlax, ilaxle ku shwomkya ma achuaklax. Ku a JOWANPA hünzom Zang changle.

³¹“Lwompu hwom füi apongkyabu hato tsaitik-kaxshole chang ang taxpao. Hünzome ile jangmok thüiningle zanglom ma chitsaokya ang changüi. Ku a JOWANPA hünzom Zang changle.

³²“Taiko hwom chathua zakya tüilax ilaxle hwom achuak-achenle tüilax. Chathuazakya füi ku kax ma laxlax, Ku a JOWANPA hünzom Zang changpu.

³³“Hünzom haxtok ma ngole tüikya mixnokbu to chichang-chizangle taxhwon.

³⁴Israel khünake ma mix to chemle huse hex ile hwom tochu hukox ilaxle ma to chemle mongkünle tüipuix ilailaile hwom tochu mongkünkox. Noxta hünzom chuwüi Ijip nok to püntüi ang ngole toxdaokya changle.

³⁵“Olwot-ojang thütpongma tamchu othom ma thütpongma owawa to syep-dyepkya taxtüi.

³⁶Tuak thütpongma dangzem ajitle, jandwon hia thütkya jali tomwüi ajitle thütlax. Ku a Ijip nok tokya hünzom alaile apüikya JOWANPA hünzom Zang changle.

³⁷Ku wanlom hia kaxtombu pangwüi kax ma laxle tüilax. Ku a JOWANPA changle.”