Read Wancho Naga Liwi 20 Bible Online

Liwi 20 - Wancho Naga bible

Liwi 20

¹JOWANPAe Mosa ang

²Israel khünaknu füi ija akax angkya kaxkox: “Hünzom wüi changlax chichangba hünzom khato ngole hüikya mixnok wüi changlax, owae masu-masabu Molek baozang shwom ang koxle changüihex, ija mixsün a noknue long füi thuple lang angkya changpu.

³Owawae masu-masa Molek baozang ang koxlaxle ku otsao Nyihom chitsaokya ang achang tamchu ku otsao nui amale jangchang, kue chix chito tok ahoüi ilaxle ija khünak a ku khünak changle le münlax.

⁴Ikoxlechu chixe chem mokdaopuix, ija mo noknue chiwün homtoxle danle jangthom ilaxle ija mixsün chilang,

⁵ku jaojao chix zan to kaüi ilaxle chix homkha tamchu opangsae chix füi tomle Molek baozang to shwomüi ma ku kaxtele changpuix, kue hwom a chemtuechu ku khünak ang münlax.

⁶“Owawae lwompubu füi apongle ngokyabu hato tsaitik-kaxsho ang paole jangchang, ku chix zan to kaüi ilaxle chix a ku khünak ang münlax.

⁷Malailai to tsaole ngolax, chemthüikoxle ku a JOWANPA hünzom Zang changle.

⁸Ku wanlombu kax ma laxlax, chemthüikoxle ku a JOWANPA tamchu nang otsao ang zingkya Zang changle.”

⁹JOWANPAe ibibi wanlombu fa. Owawae mapa chichangba manu to thuakzomle jangchangba, ija khünak a mik max ang tom angkya changle; chix zik bama chix mütkop changpu.

¹⁰Mixsün tuitae, Israel khünak tomtom mix kakonu füi chinunchakkaile jangchang, ija mixsün hia mixcha pangnyi wüi mik max ang tom angkya changle.

¹¹Owawae mapa kakonu tütapu füi chinunchakkaile jangchang thüiningle, ija mixsün hia mixcha nyi, pangnyi wüi mik max ang tom angkya changle. Ma mik max angkya hwome alüile lomlaxpu.

¹²Owawae ma nomcha füi chinunchakkaile jangchang thüiningle, hokhi pangnyi wüi mik max ang tom angkya changle. Okhie naklyen-khosyen le changkya khoma, hokhi a ma mütkopkop bama zilaxpu.

¹³Owawae ma lailaikya lükapa füi nganguile jangchang, hokhie zakkop mwot jaojao mokdaoa, ilaxle hokhi pangnyi wüi mik max ang tom angkya oli changpu. Okhi a ma mütkop bama zilaxpu.

¹⁴Owawae sheko tuita lax ilaxle manu laxle jangchang thüiningle hwom azom pangwüi, hwome mokdaokya zakkop mwot khoma wünkha to zokle lang angkya oli changpu. Hünzom khama iningle chang ang chikox angkya oli changle.

¹⁵Owawae müi füi nganguile jangchang, ija khünak hia müi nyi a langle awüt angkya changle

¹⁶Mixcha owawae müi füi ngangüi ang azongle jangchang thüiningle ija mixcha hia müi nyi langle awüt angkya oli changle. Hwome mik a ma mütkop khoma hexle maxlaxüi.

¹⁷Owawae mana-manao tomtata chichangba haxnu homsa tokya kako ang laxle jangchangba, hokhi a noknu tunthoma zak akople hwonlaxle noktu angkya alaile apaoüi. Chixe mana-manao füi nganguile changdaokya khoma ija thama apong angkya jaojao.

¹⁸Owawae, mixcha tuita ang tutsyen paole ngopongma she füi chinunchakkaile jangchang, hokhi pangnyi wüi tukha angkya alaile awütüi, chemthüikoxle wanlom ma tsaole ngo angkya wanlom chitwonle hokhie amadaoa.

¹⁹Owawae ma zongto honu tsyen owawa füi chinunchakkaile jangchang, ija nushix dongkya mwot khoma hokhi pangnyie wüi thama apong ang tom angkya oli changpu,

²⁰Owawae ma honyenu füi chinunchakkaile jangchang, chixe ma pachong ang zak akoppu, ikhoma ija mixcha hokhi pangnyie wüi ija tsangmüt apong angkya oli changpu; hokhi opupuechu naosom münkopüi ilaxle nguidongle chu münchangüi.

²¹Khünak owawae matüi manao kakonu ma kako ang laxle jangchang, hokhi a su-sa chitüi homtoxle zi ang tomüi. Chixe zanglom ma chitsaokya hia matüi manao ang thajao ang tomdaoa.

²²JOWANPAe thüi: “Ku wanlombu hia kaxtombu pangwüi thomlax; ikoxle tix kue ikhato hünzom apüile nguile ngokya Kanan haxtoke hünzom pongle kopüi.

²³Ikhato tüikya mixnok wanlombu taxapüi; hünzome ija haxtok to nguitsuak angkya hanpakmale kue ibu songsaribu jwonle apaopu. Hwom ochax mwot pangwüi makhange hwome ku thajao ang tomle.

²⁴Ikoxle kue ija tüle ahak-aluale tamchu haxzaoe awangle tüikya haxtok hünzom hanpak hex-ole tsaodaoa, ilaxle kue ija hünzom ang koxüijao changle, kue hünzom mama-mama jat-li füi atsaile süile kopdaoa.

²⁵Idaile hünzome müi tamchu o-jux chitsaokyabu hia tsaokya süile awan kop angkya oli changle. Müi wüi changlax o-jux wüi changlax chitsaokya oli chemchu taxsax; kue ibu müntsaole ngaidaoa, ikhoma ibu jangsaxba hünzom chitsaokya ang achangpu.

²⁶Hünzom a otsao tamchu ku kux ang changüi, chemthüikoxle ku a JOWANPA tamchu ku a Otsao. Hünzom a ku tata kuxle naxngo lax ang kue mixjat-mixli pangnu füi süile thompu.

²⁷“Lüka wüi changlax sheko wüi changlax, owawae lwompubu füi apongle tsaitik-kaxshole changkya khünak jangtüi, ija khünak a long füi thuple lang angkya oli changle; owawae ile jangchang thüiningle ma tsangmüt khoma chix mik max angkya ataklaxpu.”