Read Wancho Naga Liwi 22 Bible Online

Liwi 22 - Wancho Naga bible

Liwi 22

¹JOWANPAe Mosa ang

²Arun hia chix sasün hwom füi akax angkya kaxtom koxle thüi: “Hünzome ku mün otsao hato thajao taxapüi, idaile Israel khünaknue ku hato apüikya otsao tö to müile humele changhüi. Ku a JOWANPA changle.

³Nang sixli owawae, chix zanglom ma chitsaole ngopongma, Israel khünaknue ku ang koxkya otsao tö hato soxle jangchang, chixe tamchatle tö-tsap ma ku thothale chang ang müntho. Ija a füichi hanpakma ojento ile changüi. Ku a JOWANPA changle.

⁴“Arun sixli owaechu, zanglom-ma ma otsao ang machang tanto, tsangtsa khwon mak füikya mixe tamchu oti-jenle paole ngokya mixe otsao tö sax angkya münchang, chitsaokya müimang to twonkya chichangba oti jenle lai ngo pongma,

⁵chichangba chitsaokya müi hia chitsaokya khünak to jangtwon daoba nguapa owawachu chitsaokya ang achangpu.

⁶Nguapa owa chitsaokya ang achangpuix, chix a han-ahomle chitsaokya ang ngoüi, ilaxle ifüima ngaxchu ti ajole machang tanto chixe otsao tö kha angkya tütalichu sax ang müntho.

⁷Zanghan dütle tix chix a otsao, ifüima chixe otsao tö sax ang tsuak, ijabu a chix süt jaojao.

⁸Chixe müimang, owüi zikya wüi changlax, fao zan-e langkya wüi changlax, chisax angkya oli; ijae chix chitsaokya ang achangüi. Ku a JOWANPA changle.

⁹“Kue koxkya wanlombu nguapabu noke wüi thom angkya oli changpu. Ile chichang thüiningle, hwom thaiüi ilaxle ziüi, chemthüikoxle ija ahwom otsao wanlombu chitwonkya changle. Ku a JOWANPA ilaxle kue hwom otsao ang zingpu.

¹⁰“Otsao tö tütalichu nguapa homkha angkya khünake tix sax-laxle chang ang tsuak; owaechu ibu sax-lax ang müntho: nguapa füi tomle ngokya owawa chichangba chixe hingchak koxle thomkya owawae ngaxchu ibu sax ang müntho.

¹¹Ikoxlechu nguapa dabu chichangba chixe ma ngun koxlaxle shakkya chichangba chix hom ma pux-paile changkya, hwome JOWANPA ang koxkya süntom kha angkya sax ang tsuak.

¹²Nguapa sacha owawae nguapa chichangba ma ating-anokle changkya mixe ija sax ang müntho.

¹³Ikoxlechu thanu chichangba kako füi janlaxle chatle sacha owa ma su-sa chitüile ngopuix ilaxle owa hopa lox-o fang ma ngo ang chatle tüilaxpuix, she-e hopa hato nguikya nguapa suitom kha angkya sax ang münthoüi. Tütalichu ikha angkya a nguapa homkha angkya etix sax ang tsuak.

¹⁴“Nguapa homkha chichangkya owawae, sax angle chichang homtoxle le-le otsao tö kha angkya saxle jangchang thüiningle, chixe nguapa ang otha bakle thomüi ilaxle ito bole thomtsa onüi koxüi.

¹⁵Nguapabue ija otsao töbu

¹⁶owawa chisax homfang khünak ang asütle thajaokya chitüiüi; ijae iningkya khünak hato thaikya thama apüiüi. Ku a JOWANPA changle ilaxle töbu kue otsao ang achangpu.”

¹⁷JOWANPAe Mosa ang

¹⁸Arun hia chix sasün hwom tamchu Israel khünaknu ang ibu wanlom kox angkya kaxtom fa. Chemtue Israel haxtok ma ngokya, Israel nok wüi changlax chichangba mixnok wüi changlax, owawae zokle ashunkya tö, tuita tsaosaxdaokya mwot tsuak ang koxkya wüi changlax chichangba mongtex tö koxkya wüi changlax, tö ang koxkya müi ma ofwot chemchu chitüi angkya oli changle.

¹⁹Pongle laxtsuak angkya hanpakma, ija a ofwot chitüikya ola chang koxle müiüi.

²⁰Nange ofwot füikya tö koxle jangchang thüiningle, JOWANPAe ija pongle münkopüi.

²¹Chemtue owawae JOWANPA ang notom-tusüi tö koxle changüihex, ija a kaxtsao tüidaokya mwot tsuak ang wüi changlax chichangba mongtex tö wüi changlax, ija pongle naxkop jangthüiba, müi a ofwot chemchu chitüikya müi chang angkya oli.

²²JOWANPA ang chemtuechu omik asutdaokya, ofai-oshok, mak-kha daokya, omak-ochak, tsangtsa buk, ibu füikya müi taxkox.

²³Mongmüi tö ang nange müi tuita puxpong ma amadaokya chichangba kuimüi-zangmale chitüikyachu kox ang tsuak, ikoxlechu ija a kaxtsao tüikya mwot-tsuak ang koxkya tö hanpak ang pongle münkoptsuak.

²⁴JOWANPA ang müi hozwom züidaokya, zütle awüt daokya, thuple asumdaokya chichangba zütle awüt daokya tö taxkox. Ija a hünzom haxtok ma mok ang müntsan.

²⁵Tuita sütli tö kox ang mixnok chak tokya kopkya müi taxkox. Iningkya müibu a ofwot füikya tamchu pongle kop ang müikya oli münchang.

²⁶Chemtue maihu sasün chichangba chun hosa chichangba zwonsa tuita ngünüihex, ija a nyix anüt mong ma honu füi afanle taxchang; ija kaikya füima sütling tö angchu pongle laxtsuak.

²⁸Maihu husa hia hunu nyi chichangba chun honu hia hosa nyi tamchu zwon zwonnu hia zwonsa nyile nyixtakya fang ma taxkox.

²⁹Chemtue hünzome JOWANPA ang münchong fakya tö koxle changüihex, wanlombu tolax, ile chang koxle nang tö a pongle kopüi.

³⁰Ibu pangwüi ija nyixnyix wüi saxle tsuakdao, ofüinyix hanpak ang ota taxtox.

³¹JOWANPAe thüi: “Ku kaxtombu kax ma laxlax; ku a JOWANPA changpu.

³²Ku otsao mün thajaole chang ang taxtom, Israel khünaknu noke wüi ku a otsao changpule ngailax. Ku a JOWANPA ilaxle kue hünzom otsao ang achangpu.

³³Ku a hünzom Zang ang ngo angkya hanpakma kue hünzom a Ijip nok tokya alaile apüipu. Ku a JOWANPA changle.”