Read Wancho Naga Liwi 23 Bible Online

Liwi 23 - Wancho Naga bible

Liwi 23

¹JOWANPAe Mosa ang

²Israel khünaknue zangshwom ang asox pongma twon angkya hanpakma zanglom pangpwon wanlom ibibi kox.

³Hünzom ang ma mwot mok angkya hanpakma nyix azok tüile, ikoxle nyix-anüt lükya a Sabath nyix, nazakle nui angkya nyix changpule texle ataklax. Ija nyix a mwot taxmok, ikoxle zangshwom ang asoxlax. Nang tütajongkha towüi ngole asukoxlax, Sabath a JOWANPA kux changle.

⁴Hanpak otuthüt-thüt ma ibibi pangpwon khuapule changkox.

⁵Kaitox pangpwon ija a JOWANPA achuak-achen ang owang lükya lyetnu nyixbün-ali lükya to zanghan dütkya füi tomle owang wangle.

⁶Nyixbün-aga lükya to twonkhax chiawonkya anthut pangpwon owang wangüi, ilaxle hanpak nyix anüt mong ma hünzome twonkhax awonle zingkya an münsax angkya changpu.

⁷Ija asuikya nyix a, nyixfokya to mokle nuikya ma mwot dantoxlaxle hünzom pangwüi zangshwom ang asox kox.

⁸Nyix-anüt hanpakma hünzome JOWANPA ang süt tö laxkox. Nyix-anüt lükya to anaolechu hünzom zangshwom ang asoxüi, idaile hünzom owaechu ma mwot chimoküi.

⁹Chemtue hünzom, JOWANPAe hünzom ang koxle ngokya haxtok to nguiüihex, hünzome tsaxatule changkya zuma pongwang lükya saxthom nguapa hato apüikox.

¹¹Chixe, ile hünzom pongle koptsuak angkya hanpakma ija a JOWANPA ang ataxkya tö tuita ang koxüi. Ija a JOWANPA Sabath füinyix wüi koxüi.

¹²Hünzome saxziak tö koxkya nyix wüi, zanglao tuita tsongdaokya, ofwot chizaikya chun ola tuita zokle ashunkya tö hanpak ang laxkox.

¹³Ija füi tomle süt tö hanpak ang hünzome akhix tuak anyi olip münga füi awon laxkox. Ija tö koxkya ongan a JOWANPA zongto tüle zingle müikya changle. Ifüi tomle hünzome grepti-ju tsoxta wüi tö ang laxkox.

¹⁴Zang hato tö ang koxle ma-apüi tanto saxzün, ohing ma wüi changlax chichangba an ang achang laxle wüi changlax, taxsax. Ija wanlom a hünzom su-sabue tsün tok to tsün le twonle hüi angkya oli changpu.

¹⁵JOWANPA hato hünzome tsaxthop apüikya Sabath füima hatdang anüt anguile akiaklax.

¹⁶Nyix-punyi-bün lükya to, ija a Sabath füinyix, JOWANPA hato mama tsaxthop hozün apüile laxkox.

¹⁷Otsao hingho tuita ningle pangnu homkha tokya wüi ankhao anyi pong apüile JOWANPA ang laxkox. Ankhao tuipong a ankhix tuak anyi, twonkhax füi awon zing angkya changle ilaxle ija a saxcha-wünkya ningle JOWANPA hato tö ang apüile koxüi.

¹⁸Ija ankhao füi tomle noknue zanglao nguile tsongdaokya chun ola anüt, maihupong tuita, ilaxle chun hosa anyi, ile ofwot chitüikya müibu apüile koxüi. Ibu a saxziak hia grep-ti füi tomle, zokle ashunkya tö tuita ang JOWANPA hato apüile koxüi. Ibu tö ongan a JOWANPA zongto tüle müikya ongan changle.

¹⁹Ikoxlechu ochax tö hanpak ang zwonpong tuita üntoxle notom-tusüi tö hanpak ang zanglao nguidaokya chunla anyi JOWANPA ang koxüi.

²⁰JOWANPA hato ataxkya hingho hanpak ang nguapae an chun hosa anyi füi JOWANPA ang koxüi. Ibu tö a otsao changle.

²¹Hünzom owaechu ija nyix ma homsüt-pungmwot taxmok, ikoxle zangshwom ang asox kox. Hwom tüta khato wüi ngole asukoxlax, hünzom su-sa hwome ija wanlom a tsün tok to tsün le twonle hüi angkya oli changle.

²²Chemtue hünzome tsax atuüihex, Chamtua-suizang alople taxasüi, ilaxle danle toxdaokya tsaxwüt asüi angchu tam-taxchat ngo. Ibu a mixshix-zasa hia püntüibu hanpak ang toxdao. JOWANPA a hünzom Zang changle.

²³Lyetnu-kua anüt owang lükya nyix nazakle nuilax, ilaxle nyazong zing atakya füi tomle zangshwom ang asoxlax.

²⁵JOWANPA ang süt tö kox ilaxle hünzome ma mwot chemchu taxmok.

²⁶Lyetnu-kua anüt to nyixbün lükya hanpak a khünaknu ochax pao angkya hanpakma zangpua zomzing angkya nyix changpu. Ija nyix chemchu taxsax; zangshwom ang tomle asoxlax, ilaxle JOWANPA ang süt tö koxlax.

²⁸Ija nyix mwot taxmok, chemthüikoxle ija a ochax pao angkya hanpakma zomzingle khongaikya nyix changle.

²⁹Ija nyix owawae tütali saxlaxle jangchang thüiningle chix a Zang khünak tuita changpule chemtuechu münlaxüi.

³⁰Ilaxle owawae ija nyix mwot mokle jangchang thüiningle, JOWANPA chix tomtatae ija khünak mik amütüi.

³¹Ija wanlom a, hünzom sixlibu, tüta khato wüi ngolax, hwom pangwüi hanpak ang twonüi.

³²Ija lyetnu ma nyix-aku lükya nyix zanghan dütkya füi tomle, ataxle nuikya nyix le nuikya, ija obama chemchu chisax-chilingle, bün lükya nyix zanghan dütkya alople nuiüi.

³³Pomsa pangpwon a lyetnu kua anüt ma bün-aga nyix makhange owang wangle nyix-anüt nuiüi.

³⁵Pongwang lükya nyix a zangshwom ang asoxlax ilaxle homsüt-pungmwot chemchu taxmok.

³⁶Nyix-anüt mong ma nyixfole hünzome süt tö koxüi. Nyix-achyet lükya nyix chuwüi hünzom zangshwom ang asoxlax ilaxle süt tö koxlax. Ija a zangshwom angkya nyix changle, hünzome mwot chemchu taxmok. (

³⁷Ibu a, zangshwom ang asoxkya, süt tö koxkya, zokle ashunkya tö koxkya, saxziak tö koxkya, fünle fakya tö koxkya, ilaxle grep-ti tö koxkya, oja nyixfokya to laxli changpuix, ibu asox-atomkya makhange JOWANPA achuak-achenkya zanglom pangpwonbu changle.

³⁸Ibu pangpwon a ozangjang to ngokya Sabath obo changle, ilaxle ibu tö a wanjang to koxkya hünzom hinghobu, hünzom töbu, oja hünzome ma kaxtsao kho-angui ang tamchu JOWANPA ang kox ang mongtex töbu oja apüipuix, ibu obo changpu.)

³⁹Chemtue hünzome tsax zütle changüihex, ipong ija pangpwon a nyix anüt nuilax. Ija a lyetnu-kua anüt ma nyixbün-aga to owang wanglax, Pongwang lükya nyix a ataxle nazakle nuikya nyix ang changüi.

⁴⁰Ija nyix hünzome ma pün angkya pünziakbu sümüimüi laxlax, pün okangbu hia ochak-mua füikya pünkangbu laxlax, ilaxle hünzome JOWANPA achuak-achenle zanglom pangpwon owang wanglax.

⁴¹Ija a nyix anüt pwonle nuilax. Ija wanlom a hünzom su-sabue tsün-tsün to twonle ngo angkya changle.

⁴²Israel khünaknu pangwüi nyix anüt a pomsa ma nui angkya changle.

⁴³Ile changkoxle tix hünzom su-sabue, chixe hwom Ijip tokya alai pongma Israel khünakbu a olan to zingkya pomsa ma ngo ang tomkya awanle laxüi, chix a JOWANPA hünzom Zang changle.

⁴⁴Ile Mosa-e Israel khünakbu ang, JOWANPA achuak-achenle zanglom pangpwonle nui angkya bama wanlombu fa.