Read Wancho Naga Liwi 25 Bible Online

Liwi 25 - Wancho Naga bible

Liwi 25

¹JOWANPAe Sinai haxnukho to Mosa füi zangwün ilaxle chix ang kaxtom koxle

²Israel khünaknu ang ibibi wanlombu kox: Chemtue hünzom, JOWANPAe hünzom ang koxkya haxtok to nguiüihex, zanglao anüt lükya to haxtok ma man chizaile JOWANPA achuak-achenle changüi.

³Hünzome zanglao azok mong ma, haxtok ma sax küiüi, grep haxtok mo-zangle changüi, ilaxle hünzome ma manzai saxziak athünle changüi.

⁴Ikoxle zanglao anüt lükya a haxtok ang nazak fa angkya zanglao, tuita JOWANPA hanpak ang atsaole koxkya zanglao changpu. Hünzome haxtok ma sax taxküi ilaxle grep tong taxmo.

⁵Chiküikya khato sax hwom lailai to laikya zütle taxchang, ilaxle otong chimokya khato laikya grep ziak taxkhai. Ija a haxtok ang komkaile nazak kox angkya zanglao changpu.

⁶Ija zanglao ma haxtok manzai chitüikoxlechu, hünzom ang sax angkya süt koxüi. Hünzom dabu, hünzome hingchak koxle thomkya mwotmok mixbu, hünzom füi tomle ngokya mixnokbu,

⁷hünzom tsom-pombu, ilaxlechu hünzom haxtok ma tüikya faomüi-janyax pangwüie masütsüt kople ngoüi. Haxtok ma chempang lailaxpuix ibu saxle ngo ang tsuak.

⁸Zanglao anüt pong othom anüt ma akiaklax, thüikoxle zanglao punyi kho anguile changüi.

⁹Ifüima, lyetnu kua anüt lükya to, ija a Tsangthom Nyix, chaxwan pangkha towüi nyazong mütle khuapu angkya hanpakma khünak tuita tsanle apaokox.

¹⁰Ile hünzome zanglao punyi-bün lükya süile danüi ilaxle hünzom chaxwan ma tüikya pangnusa hato khangkho-ngaikya khuapuüi. Ija zanglao mong ma tuina chempang hang-jo laxle mixchak to koxle thomtüipuix, ibu pangwüi hopupa chichangba haxnu-homsabu hato chatüi. Khünak owawa, da ang koxle thomkya mix jangtüi, chix a ma homkha hato chat ang tomüi.

¹¹Hünzom haxtok ma thomole man chizaiüi, chichangba hwom lailai to laikya saxziak zütle chichangüi, chichangba mo-zangle chichangkya khato laikya grep-ziak hünzome chikhaiüi.

¹²Ija zanglao a hünzom zongto otsao zanglao ang changüi; haxtok ma hwom lailai to chem lailaxpuix, hünzome ija tix saxüi.

¹³Hang-jo daokya tuina pangwüi ija zanglao ma pangwüi hopupa hato chatüi.

¹⁴Idaile chemtue hünzome Israel khünak, tuita tüita-naopa ang, oja ma haxtok hangle kox chichangba chix haxtok shakle changpuix, syep-dyepkya taxtüi.

¹⁵Otha a hopu hato chatüima, haxtoke puamün chemtukux fale tsuaküihex, ija tha thütle otha fün-wünle chang angkya oli.

¹⁶Achatüima zanglao sütüile jangchang thüiningle otha süsaxüi, ikoxlechu achat angkya zanglao hidaole wüi jangchang thüiningle otha ashutüi, chemthüikoxle oja hangpuix ija a haxtoke oziak-opua chemtukux alaile fatsuaküihex, ijatix changpu.

¹⁷Israel khünak tomtome ma tüita-naopa to syep-dyeple taxchang, ikoxle JOWANPA hünzom Zang kax ma laxle tüilax.

¹⁸JOWANPA wanlom hia kaxtombu pangwüi kax ma laxle tüilax, ikoxle tix hünzom a ma chaxwan ma chazakya chemchu chitüile ngo ang tsuaküi.

¹⁹Haxtoke ma angkya oziak-owang alaile koxüi, ilaxle hünzome alomlom komle ataküi üntoxle azangle ngo ang tsuaküi.

²⁰Zanglao anüt mong ma, thomwot manzai hia saxzütle tsax atukya nang chitüi, chemsax chemlaxle ngo angkya le owawae atüi koxlax.

²¹Zanglao anyi hanpak ang saxkop-linglole chang angkya kuxma azok lükya zanglao ma JOWANPAe haxtok to mohiman angkya changle.

²²Chemtue hünzome achyet-lükya zanglao ma thom-manzaile changüihex, epong kople azok lükya zanglao ma zaikya manzai sax-laxle wüi ngoüi, ilaxle ija zanglao ma zaikya manzai puamünkya kople sax angkya hanpakma hünzom ang okhonguile le tüile ngoüi.

²³Hünzome ma haxtok owüiole hangle chiapaoüi, chemthüikoxle ija a nang kux münchang; ija a JOWANPA kux changle, ilaxle hünzom a onox ma ija haxtok apu-achang ang dankya mixnok-wünpabu ningle changpu.

²⁴Chemtue haxtok hangle changüihex, haxkop owangpa tuita ningle chatle achatle laxtsuak angkya olom zangle thom angkya wüi changpu.

²⁵Israel khünak owawa zasa ang achang laxle, chixe ma haxtok hang angkya chifün hato atsangle janghüi thüiningle, chix haxnu-homsabue ija shakle tüi angkya wüi changpu.

²⁶Khünak owawa haxnu-homsa wan chimüikya mix chang koxlechu, füichima chix ahak-aluale jangchang thüiningle, ija haxtok chix lailaie shakle achat angkya changle.

²⁷Ile jangchang thüiningle, ija mixsüne shakkya khünak ang, füichima tamchatle shakle sünle haxtok a hopupa hato wüi achat angkya zanglao nguile hüikya kople ija mixsüne haxtok ma chemtukuxle manzaile alai saxsehex, ibibi tha komkaile achatle kox angkya changpu; ile jangchang thüiningle tütatuechu chixe ija haxtok achatle lax ang thoüi.

²⁸Ikoxle chix ma haxtok achatle laxtang ngun-syen chitüile jangchang, tamchatle shakle sün angkya zanglao alople ija haxtok a shakle laxkya mixsün chak towüi ngoüi. Jubili zanglao matix ija haxtok hopupa ang achatle koxüi.

²⁹Long-katuke tuklaxle tüikya tingnu ma owawae hom-hax hangle jangchang, shakkya nyix makhange zanglao tuita mong ma tütatuechu ija hom-hax hopupae tamchatle shakle achat lax ang thoüi.

³⁰Ikoxle chixe ija zanglao mong ma achatle lax ang chitho, chixe chatle achatle lax angkya olom amütpu, ilaxle ija hom-hax a shakle laxkya mixsün hia hosu-sasün hwom kux ang achangpu; ija a jubili zanglao machu münchat.

³¹Ikoxlechu Long-katuk füi panzailaxle chitüikya tingkhua tokya hom-hax a mama haxtokbu thatha ang changüi; hopupae ibu achatle lax ang thoüi, ilaxle ibu a shakle sünkop angkya zanglao ma achat angkya changle.

³²Ikoxlechu, Liwibue hwom ang mwot koxle thomkya tingnubu angkya hwom tuina tütue chu achatle laxtsuak angkya olom tüile.

³³Ibu tingnu tuituita ma Liwi khünak owawae ma hom-hax hangle jangchang ilaxle ija achatle chilax, ija a Jubili Zanglao ma achatle kox angkya wüi changle; chemthüikoxle Liwibue hwom ngokya tingnubu ma hom koplaxle tüikya a Israel khünak tu ma ija a othuithuima hwom tuina changle.

³⁴Ikoxlechu Liwi hwom tingnubu akhople tüikya wun a otuechu chihangüi; ija a othuithuima hwom haxsüt ang ngoüi.

³⁵Nang homzui ma ngokya Israel khünak tüita-naopa ma cha ma ajong ang thüikoxle zongmo chiapongle tuimix-nuakmix ang achangle pao; ija to hingchak koxle thomkya mix to chemle humele changpuix ilailaile nange humele kox angkya changpu ikoxle tix chix a nang homzui ma ngo ang thoüi.

³⁶Chix ma olüi chemchu taxlom, ikoxle Zang kax ma laxlax üntoxle nang zuipa Israel khünak tuita nang homzui ma wüi ngo ang laxkox.

³⁷Nange chix ang koxkya ngun ma olüi taxju, ilaxle nange chix ang hangkya osüt-oling machu nange olap taxlax.

³⁸Ija a, chix hünzom Zang ang achang ang tamchu hünzom ang Kanan haxtok kox angkya hanpakma, hünzom Ijip nok tokya alaile apüikya JOWANPA hünzom Zang-e fakya kaxtom changpu.

³⁹Nang homzui ma ngokya Israel khünak tuita tüita-naopa owawa, chix alüile nang chak to chix da ang namhangle tuimix-nuakmix ang achangle jangpao thüiningle, nange chix ang da tuita mwot mok ang chitomüi.

⁴⁰Chix a hingchak mün to mokle ngokya khünak tuita ningle, hüile ngokya jubili thatan ang chix nang hom ma ngoüi.

⁴¹Ijama hwom ilaxle su-sa hwome nang dantoxlaxle hwom homkha hato tamchu pupae bangkya ting-tok lomle chatüi.

⁴²Israel khünakbu a JOWANPA changle; hwom a Ijip nok to da ang ngokya chixe alaipu; hwom a tamchatle da ang hang angkya oli münchang.

⁴³Hwom füi zongzukle taxchang; hünzome hünzom Zang kax ma laxlax.

⁴⁴Nange da janglom, nange ija a tomzi nok tokya shakle lax ang tsuak.

⁴⁵Hünzome hünzom füi tomle ngokya mixnok su-sabu thüichu shak ang tsuak. Hwom ningle hünzom haxtok ma pux-paile changkyabu a hünzom füikya ang laxtsuak,

⁴⁶ilaxle hünzome hwom a hünzom su-sabu mantswon ang thom ang tsuak, ibue hwom to mazi-mazile hu-meüi. Ikoxlechu hünzome ma tüita-naopa Israel khünak tuita zongto zongzukle chitüi angkya changle.

⁴⁷Namthütba, hünzom füi tomle ngokya mixnok tuita tüle ahak-alua, ikoxle Israel khünak tuita tüle tuimix-nuakmix ang achangle mixnok ang chichangba ma haxnu-homsa owawa ang ma alüile da ang hangle chang.

⁴⁸Chix hangdao koxlechu, chix a chatle shakle achat ang tsuak. Chix hotüi-honao owawae

⁴⁹chichangba chix pa-tüi owawae chichangba chix holisa owawae chichangba chix zongto ma haxnu-homsa owawae chix shakle achat ang tsuak; chichangba chixe huanuma ngunkop-syenlole jangchang, chixe ma alüile shak ang tsuak.

⁵⁰Chixe ma alüile hangkya zangpua makhange jubili zanglao alople, chix shakle kopkya mixsün füi akiak-aziakle changüi, ilaxle chix hangkya otha a zangpua to hulaxle fün-wünle changüi. Chix a hingchak mokle ngokya da tuita ningle ija mixsün hama ngoüi.

⁵¹Ota toxkya zangpua akiak laxle chix shakkya otha chixe thom angkya changle.

⁵²

⁵³Zangpua to hingchak ang nuikya da tuita ningle chix a ija mixsün füi ngoüi. Opupa-e chix to zongzanle chihwonüi.

⁵⁴Ijabu tuita olom machu chidan thüiningle, chix hia chix su-sabu jubili füi angkya zangpua ma danüi.

⁵⁵Israel khünak tuita a onyem ang da ang chingoüi, bethüikoxle Israel khünakbu a JOWANPA dabu changle. Ijip nok tokya hwom chixe apüipu, chix a JOWANPA hwom Zang changle.