Read Wancho Naga Liwi 27 Bible Online

Liwi 27 - Wancho Naga bible

Liwi 27

¹JOWANPAe Mosa ang

²Israel khünaknu hanpak ang ibibi wanlombu kox. Chemtue ma tsaotsüt okho-angui ang khünak tuitae ma khüzün JOWANPA chak to koxle changpuix, ija mixsün a ibibile ngun koxlaxle shakle tüi ang tsuak,

³ija a onok thathop olom ma: — lüka mixmüi, zangtsa makhange zang puzom kople: khop ngunkhix 50 füi — sheko mixnu tuita: khop ngunkhix 30 füi — naosün, zanglao aga makhange zanglao tsa nguidaokya: khop ngunkhix 20 füi — naocha: khop ngunkhix 10 füi — lüka naosa zanglao aga füi fangchi: khop ngunkhix aga füi — sheko naosa: khop ngunkhix azom füi — zanglao puzom thak tokya lüka mixpa: khop ngunkhix 15 füi — zanglao puzom thak tokya sheko mixnu: khop ngunkhix 10 füi, shakle tüi ang tsuak.

⁸Tsaotsüt daokya khünak otha thople tüikya ngun kox ang chithole tuimix-nuakmix jangchang, chixe ija khünak a nguapa hato apüiüi, ilaxle nguapae, ija mixsüne shak ang tho tangle otha ashutle fünüi.

⁹Müi tuita jangchang thüiningle, oja JOWANPA ANG TÖ KOX ANGKYA HEX, ININGKYA MÜI CHEMPANGSA KHÜNAKE JOWANPA ang koxpuix, ija a otsao changle,

¹⁰ilaxle khünak owae tsaotsütle changpuix, chixe ija olüix ang mama müi tamchilax ngoüi. Chixe ija olüix janglax, müi pangwüi JOWANPA kux ang achangdaoa.

¹¹Ikoxlechu ija tsaotsütkya müi a wanlom ma chitsaokya müi jangchangba, tuita JOWANPA ang tö koxtsuak angkya oli müi chichangba, chixe ija müi a nguapa hato apüiüi.

¹²JOWANPAe chimüikya hia müikya to hulaxle otha thopüi; ile nguapae otha thople koxkya ningle ija müi shaküi.

¹³Chixe ija sünle kopse mong jangtüi, chixe otha koxkya boma onüi hota ma thomtsae bole kox angkya oli changle.

¹⁴Chemtue owawae ma hom JOWANPA ang atsaole koxüihex, ipongma nguapae chimüikya hia müikya to hulaxle otha thople koxüi, ija otha a thafün tsuakkya ang laxüi.

¹⁵Ikoxle owae ija hom JOWANPAe atsaole koxpuix, chixe wüi chatle laxse jangtsuba, chixe otha koxkya to bole hota ma thombün onüi kox angkya changle.

¹⁶Khünak tuitae chix haxtok jongtakha JOWANPA ang atsaole kox, otha a, ija khama sai ang saxtsang chemtukux laxpuix, ija ma thütlaxle jan ngunkhix huakbün a tsaxsa-tula tuaktsa hanpak thama langle fünüi.

¹⁷Chixe ija haxtok jubili zanglao füima lüile koxkya jangchang thüiningle, otha a bakle laxüi.

¹⁸Ikoxle chixe ija süfüima koxle jangchang, anaokya jubili zanglao ha alop ang zanglao chemtukux tüipuix akiak laxle otha fünkya zuma ngun athaile changüi.

¹⁹Nange ija nang haxtok nange wüi shakle achat-se jangtsu, nange otha koxkya to bole hota ma thomtsae nüile kox angkya changpu.

²⁰Haxtok a chixe wüi sünle koplaxle owawa khünak ang hangle jangchang, chixe ija achatle lax ang müntho.

²¹Ikoxle jubili zanglao nguikya zuma, owüiole koxdaokya daile ija haxtok a othuithuima JOWANPA hanpak ang ngoüi, ilaxle nguapa haxtok ang ngoüi.

²²Owawae mae shakkya haxtok JOWANPA tsyen ang atsaole koxle jangchang,

²³anaokya jubili alop ang zanglao chemtukux atale tüipuix, ija akiak laxle nguapae ija haxtok otha somüi ilaxle ija khünake otha ija nyix-nyix wüi kox angkya changle, ija ngun a JOWANPA hanpak changle.

²⁴Jubili zanglao ma ija haxtok a hopupa ang chichangba chix haxnu-homsa owawa ang achatle koxüi.

²⁵Otha pangwüi onok ziathop ma thütle tsuaküi.

²⁶Pongwang ma puxkya tsom-pom a JOWANPA tsyen ang ngoünjao, idaile ija a owaechu JOWANPA mün male chatle chiatsao ngoüi chichangba mongtex tö ang chikoxüi. Maihu hia chun tamchu zwon, ibu hosa pongwang ma puxkyabu a JOWANPA kux changle.

²⁷Ikoxlechu chitsaokya müi oli chichangba otha boma hota ma thomtsa-e bole koxlaxle shakle chat ang tsuak. Ija shakle chichat thüiningle ija a onok thathop ma owawa ang hang ang tsuak.

²⁸Ile chang koxlechu JOWANPA ang koxle atsao thomdaokya, khünak wüi changlax, müi wüi changlax chichangba chix ma tüikya haxtok wüi changlax, hünzom opupuechu shak chichangba hangle chang ang müntsuaküi. Fünthole atsao koxthom daokya a pangwüi JOWANPA hanpakma ataxkya otsao changle.

²⁹JOWANPA mün ma atsaole koxdaokya jangchang, khünak ngaxchu shakle tüi ang müntsuak; ibu a mik max ang tom angkya wüi changpu.

³⁰Haxtok ma tüikya, tsaxsa-hikha wüi changlax, pünziak laimo wüi changlax, bün kha angkya othom tuita a JOWANPA kux wüi changle.

³¹Khünake ikha angkya tütapu shakle lax ang jangtsu, chixe onok thathop otha koxlaxle hota ma thomtsa onüi bole koxlaxle shak ang tsuak.

³²Tsom-pom bün kha angkya müitom tuita a JOWANPA hanpak changle. Chemtue müi akiakle changüihex, ipongma bün kha angkya tom tuita a JOWANPA kux ang koxüi.

³³Chimüipuix müipuix hopupae chizünüi chichangba alüixle chichangüi; chixe ija alüixle changdaobachu itukma a ija tamchu oja hanpak ang ija alüixpuix, pangnyi wüi otsao changle; ija shakle chichatüi.

³⁴Sinai haxnukho to Israel khünaknu hanpak ang JOWANPAe fakya wanlombu a ibu changpu.