Read Wancho Naga Liwi 3 Bible Online

Liwi 3 - Wancho Naga bible

Liwi 3

¹Notom-tusüi tö hanpak ang hünzom owawae tö koxle jangchang, ija a maihupong chichangba hunu chang angkya oli.

²Ija müi khangkho ma nange chak danüi ilaxle ija a JOWANPA Ngwotnui Nyihom fülom ma langüi. Nguapa Arun sasün hwome ija aji tö-tsap akhople saküi.

³Ilaxle ibu a chixe JOWANPA ang süt tö hanpak ang tökya ma koxüi: Oshin-owok khato tüikya ozao pangwüi,

⁴mongsa otom pangnyi wüi ilaxlechu okhax sümüikya kha.

⁵Ija pangwüi nguapae zokle ashunkya tö füi tomle tö-tsap ma zokle ashunüi.

⁶Chemtue notom-tusüi tö hanpak ang chun chichangba zwon laxle changpuix, ija a honu wüi changlax hola wüi changlax, ija a ofwot chemchu chitüikya chang angkya oli.

⁷Hünzome tö ang chun koxle jangchang,

⁸nange ija müi okhang ma nang chak danüi ilaxle Nyihom fülom ma ija langüi. Nguapabue ija aji a tö-tsap akhople saküi

⁹ilaxle müithom ibibile JOWANPA ang süt tö hanpak ang koxüi: müizao, tokjo ma tüikya ozao tamchu okhax-omong to chwopkya ozao pangwüi,

¹⁰mongsa otom pangnyi üntoxle ibu ma tüikya müizao, ilaxle okhax sümüikya kha.

¹¹Ikhama ngole asukya nguapae ija pangwüi tö-tsap ding ma JOWANPA ang süt tö tuita ang koxle zokle ashunüi.

¹²Nange zwon koxle jangchang,

¹³nange ija müi okhang ma nang chak danüi ilaxle ija Nyihom tunthoma langüi. Nguapabue ija aji tö-tsap akhople saküi,

¹⁴ilaxle süt tö tuita ang müithom ibibi JOWANPA ang tö koxüi: howok khato tüikya ozao pangwüi,

¹⁵mongsa otom pangnyi hia ito chwople tüikya ozao, ilaxle okhax sümüikya kha.

¹⁶JOWANPA mongzom amüile nguapae ija süt tö tuita ang tö-tsap ding ma zokle ashunüi. Ozao a pangwüi JOWANPA hanpak.

¹⁷Israel khünak owaechu ozao hia aji chisaxüi; Israel khünakbue hwom angongo khato ija wanlom a tsün tok to tsün le tole ngo angkya oli.