Read Wancho Naga Liwi 8 Bible Online

Liwi 8 - Wancho Naga bible

Liwi 8

¹JOWANPAe Mosa ang thüi:

²“Nang füi tomle Arun hia chix sasün hwom koplax, ilaxle nyi-za, pa angkya münga, ochax tö hanpak ang maihupong tuita, chunla anyi, üntoxle twonkhax chiawonkya ankhao khong tuita le koplax

³ilaxle khünaknu pangwüi hwom asoxkya Nyihom homtho to selax.”

⁴JOWANPA kaxtom lailaile Mosa-e mok, ilaxle khünaknu asoxle tüipongma,

⁵chixe hwom ang thüi: “Ija a ile moklax-o lükya JOWANPA kaxtom changpu!”

⁶Ifüima Mosa-e Arun hia chix sasün hwom thochito alai ilaxle hwom ti füi sole kox.

⁷Ilaxle chixe Arun to nyipong hia zapua kox ilaxle chix khyadax ma wok-hit nyi füi hitle kox. Chixe Suakwex-nyi füi awunle kox ilaxle nyipak takkya füi khyadax ma hitle amongle kox.

⁸Ilaxle chixe chix to thünkhuxkhyep füi khyeple kox, ilaxle ija thünkhuxkhyep ma chixe Urim hia Thummim apütle kox.

⁹Üntoxle JOWANPAe chix ang fakya kaxtom ningle Mosa-e nguapa khang ma khang-ngüi-nyi füi nguile kox. Thünthochi ma chixe hun füi zingkya otsao khohom apütle kox.

¹⁰Ifüima Mosa-e pa angkya münga lax ilaxle zangshwomnui Nyihom hia ikhama tüikya tuina pangwüi to pale kox ilaxle ibu pangwüi atsaole dan.

¹¹Ilaxle ibu JOWANPA kux ang atsaole dan angkya hanpakma ija münga füi tö-tsap to othom anüt ma sak ilaxle tö-tsap hia ija ma tüikya khopkhua wansabu pangwüi tamchu tilax khuanu hia ima atüitüi pangnu to pa.

¹²Ilaxle Arun atsaole thom angkya hanpakma Mosa chix khang to münga füi li ilaxle chix to pale kox.

¹³Ifüima Mosa-e Arun sasün hwom apüi, üntoxle JOWANPA chix ang fakya kaxtom ningle, hwom ang nyipongbu apongle kox ilaxle hwom ke ma wok hit nyi füi nguile kox tamchu khohombu soxle kox.

¹⁴Chixe ochax tö hanpak ang maihupong apüi. Chixe ija maihupong khangkho ma Arun hia chix sasün hwom chak dan ang tom.

¹⁵Mosa-e ija lang, ilaxle chixe ija aji apüilaxle tö-tsap akhople tüikya müizongbu to chix chak makhange pale tö-tsap atsao, ilaxle tö-tsap chitong ma aji thok ilaxle ochax pao angkya hanpakma ija atsaole chixe zomzing.

¹⁶Ilaxle howok ma tüikya müizao pangwüi, mongsa pangnyi hia ima tüikya ozao chixe alaile lax, ilaxle Mosa-e ija tö-tsap ma zokle ashun.

¹⁷Ikoxlechu JOWANPAe Mosa ang kaxtom fakya ningle, maihupong tamchu ija okhwon, ija omüi hia odix, chix thongnui homtho to wün füi zokle ashun.

¹⁸Ilaxle zokle ashunkya tö hanpakma chun ola tuita apüi; ija chun khangkho ma Arun hia chix sasün hwome chak dan.

¹⁹Ilaxle Mosa-e ija lang üntoxle chixe tö-tsap akhople ija aji sak.

²⁰Ija chun chixe texle akhix, ilaxle okhang hia müifun tamchu ozao Mosa-e wün füi zokle ashun. Chixe okhax-omong hia ocha-ochak ti füi so, ilaxle chun ola otom ma lanle Mosa-e tö-tsap ding ma zokle ashun. Ija a ongan müikya tö hanpak ang wün to zokle ashunkya tö changkya; ija a JOWANPAe Mosa ang fakya kaxtom ningle mok.

²²Ifüima chixe ata chun ola apüi; ija a nguapabu atsao angkya hanpakma fünthole koxkya chunla tuita. Ija chun khangkho ma Arun hia chix sasün hwome hwom chak dan.

²³Ilaxle chixe ija lang. Mosa-e ija aji apüilaxle Arun to tsaxchi nakho ma tamchu tsaxchi chak-khi khinu ma hia tsaxchi chakhi khinu ma lyetle kox.

²⁴Ifüima chixe Arun sasün hwom apüi ilaxle hwom pangwüi to tsaxchi nakho ma, tsaxchi chak-khi khinu ma, tsaxchi chakhi khinu ma, le aji füi lyetle kox. Anaole chu Mosa-e tö-tsap akhople aji sak.

²⁵Ilaxle müizao, omüikua zao, howok-kha tokya ozao, okhax hia mongsa anyi, ibu to chwople tüikya müizao hia tsaxchi ochung zaple kop.

²⁶Ifüima JOWANPA hanpak ang atsaole thomkya twonkhax chiawonkya, khong ma tüikya ankhaobu kha angkya ankhao tuita, münga füi awonkya ankhao tuita, paklonglongle akhaokya an tuita, ibu chixe kop ilaxle ibu pangwüi müizaobu hia ochung müi ding ma dan.

²⁷Chixe ibu pangwüi Arun hia chix sasün hwom chak to koxle tox ilaxle JOWANPA ang sümüikya hingho tuita ningle sütsuale koxkya tö hanpak ang achuakle nwonle dan.

²⁸Ilaxle Mosa-e ibu hwom chak tokya lax üntoxle tö-tsap ding ma zokle ashunle tö kox. Ibu a ongan müikya tö ang fünthole kox. Ija a wün to zokle ashunle koxkya tö changkya.

²⁹Mosa-e otsom lax üntoxle JOWANPA pomtho ma süchuakle koxkya tö hanpak ang ija kox; ija chun ola a, zompu-zangpabu atsaole zomzingkya bama fünthole koxkya Mosa süntom changkya. Mosa-e pangwüi JOWANPAe chix hama kaxtom koxle adangle fakya ningle mok.

³⁰Ilaxle Mosa-e pa angkya münga hia tö-tsap ma tüikya aji apüi üntoxle Arun hia chix sasün hwom tamchu hwom nyiza to sakle kox. Ile Arun hia chix sasün hwom tamchu hwom füi tomle hwom nyizabu chuwüi atsaole thom.

³¹Ilaxle Mosa-e Arun hia chix sasün hwom füi akax: “Khünaknu asoxkya Nyihom zui ma müi songkox; Arun hia chix sasün hwome ija sax angkya changle, le kue fakya kaxtom ningle, ikhama ija hia fünthole fakya, khong ma tüikya an saxlax.

³²Ilaxle omüi hia an oja atale toxüihex, hünzome ibu chuwüi wün to zokle ashundao.

³³Hünzome fünthole fale atsaokya hanpak ma-ashuk tanto, hünzom a khünaknu asoxkya Nyihom fülom kaile homtho to chilaile nyix anüt atsaole nui angkya changle.

³⁴Anyix mokkya lailaile hünzom ochax hünlit hünle paole khongai angkya bamachu zomzingle changlaxle danpu.

³⁵Ilaxle anyixning hia awünningle hünzom a nyihom mongto ngo angkya changle Hünzom zikmüt mangkho chitüi angkya hanpakmale JOWANPAe kaxtom fakya ningle moklax; chemthüikoxle ku ang ile chang ang tomkya changle.”

³⁶Ikhoma Arun hia chix sasün hwome, Mosa makhange hwom ang JOWANPAe kaxtom chemle fapuix ija ningle mok.