Read Wancho Naga Jeremia 11 Bible Online

Jeremia 11 - Wancho Naga bible

Jeremia 11

¹JOWANPAe ku ang akax,

²“Tsaotsüt zangwün to apalax. Judah hia Jerusalem angkya khünaknu hama,

³JOWANPA, Israel nok Zang-e Tsaotsüt zangwün kax ma chilaxle tüikya pangwüi to thuakzomle chang angkya hwom khangkho thomdaokya kax apuale laxkox.

⁴Hwom zongto okham wünnukha lailaile tüikya chaxwan, Ijip nok tokya hwom alaile apüi pongma, ija Tsaotsüt a hwom pupa hwom füi tsaotsütle wünkya kax changpu. Ku kax ma laxle tüi angkya tamchu ku kaxtom ma mokle chang angkya kue hwom füi akaxdaoa. Hwome ku kax ma laxle jangtüi, hwom a ku khünaknu ang ngoüi ilaxle ku a hwom Zang ang ngo angkya kax kue hwom füi akaxdaoa.

⁵Ikoxle wüi, anyix hwom ngole tüikya kha, ahak-aluale tamchu haxzaoe awangle tüikya haxtok hwom kux ang kox angkya changpule kue hwom pupa hwom füi tsaokya tsaotsüt thomüi.” Kue thüi: “Changle, JOWANPA.”

⁶Ifüima JOWANPAe ku füi akax: “Judah tingnu hia Jerusalem tingjang lomnu to paokox. Ikhato ku kaxho laxkox ilaxle khünaknu ang Tsaotsüt füikya zangwün to nathale apa angkya ilaxle ibu kax ma laxle tüi angkya akaxkox.

⁷Chemtue kue hwom pupa hwom Ijip nok tokya apüile ngokyahex, kue hwom ang ku kax ma laxle tüi angkya wüile kaxkhün koxpu, ilaxle athax kople kue khünaknu ang chizakle kaxkhün koxle hüipu.

⁸Ikoxle hwome apachu chiapa ilaxle kax machu chilax. Itülüi, amipongkya lailaile wüi hwom pangwüi sisile mongkhüi tamchu chichangchizangle tüikya chizak. Kue hwom ang Tsaotsüt thom angkya kaxtom koxpu, ikoxle hwome ija pongle chikop. Ikhoma ijama zale tüikya thangnak pangwüi hwom khangkho to ahüipu.”

⁹Ifüima JOWANPAe ku ang thüi: “Judah hia Jerusalem angkya khünakbue ku zan to ka ang atsingle ngole.

¹⁰Hwom a, kue akaxkya kax ma münlaxpule angamle tüikya hwom pupa hwom ochaxbu hato chatle chatdaoa; hwome ibu baozangbu to shwomle changdaoa. Kue hwom pupa hwom füi zingkya Tsaotsüt, Judah hia Israel nok pangnyie wüi amadaoa.

¹¹Ikhoma, athax ku, JOWANPAe hwom hato thama ahüi angkya kaxkhün koxpu, ilaxle hwom a azang ang münthopu. Ilaxle chemtue hwome ku hato ozing alaile, hwom to fong angkya akhongle changüihex, kue ija to ojao münapa.

¹²Ifüima Judah hia Jerusalem angkya khünaknu a hwome tö koxle shwom-to ngokya baozangbu hato paoüi ilaxle hwom to fonghüile ibu sele akhongüi. Ikoxle ija thama hüikya zuma ibu baozangbue hwom azün ang müntho angkya changle.

¹³Judah angkya khünaknu hanpakma hwom ang tüikya tingnubu tukuxle jao baozangbu tüihule, ilaxle Jerusalem ma ngole tüikya khünakbuechu tingjang lomnu büta zakkop baozang Bal tö-tsapbu okhonguile ajongle tüile.

¹⁴Jeremia, ibu khünaknu hanpakma ku to jop-tole taxchangzi. Chemtue hwom thama ma tüiüihex ilaxle hwom to fong angkya bama ku nyakle changüihex, kue hwom kax to ojao na münthapu.”

¹⁵JOWANPAe thüi: “Kue mongkünle changkya khünaknue ochax mwotbu mokle ngole. Hwom ang ku Zangshwom-Hom ma ngo angkya chifün chemchu müntüi. Hwome tsaosaxle changkya füi tamchu müibu tö koxle changkya füi thama abax ang thoüile texpia? Ifüima hwom mongmüi ang tho ang cha?

¹⁶Hanpak tuita ma kue hwom ang ochakmua wüi pongmüikya, oziake awangle tüikya olip pünle nyakpu; ikoxle athax, zangchei zangwat ningle tsaktsakdungle kue ija ochakbu zokle ashunüi ilaxle okangbu zople awütüi.

¹⁷“Ku, JOWANPA Khüthak Zang-e Israel hia Judah nyi küi-thwomkya changpu; ikoxle athax kue hwom a thama füi azapu. Hwome achaxkya khoma hwom khangkho to ija thama alüile ahüilaxpu; hwome Bal ang töbu koxle shwomkya makhange ku mong atsik laxpu.”

¹⁸Ku zanpabue ku zan to ka ang atsingle ngokya JOWANPAe ku hama apuapu.

¹⁹Ku a mongongsakya tuita lang ang paole ngole chun ningle chang, ilaxle hwome ochax huxtsing-loptsang mwot ibu mok ang aze ngokya a ku zan to ka ang atsing ngopule kue chitik. “Kemepi opün wan müile ngopongma ija pün dakle changhax; kemepi owaechu chix texle chiatak angkya hanpakma chix mik amüt-hax”, le hwome akaxle ngo.

²⁰Ifüima kue zangjop: “JOWANPA Khüthak Zang, nang a sukya kaxfünpa tuita; khünaknu tuthüt mongjang nange wanle ngopu. Ku zangwün otong kue hünzom chak ma danpu; idaile hünzome ibu khünakbu to olüix khomle changkya to kue hule ngofang.”

²¹Anathoth angkya khünakbue ku langse tsu, ilaxle kue JOWANPA kaxho apukle ngokya chizak thüiningle hwome ku lang angkya hwome ku hama akax.

²²Ikhoma JOWANPA Khüthak Zang-e akax: “Kue ibu to sikangünüi! Hwom naosünbu a zanhok ma max ang tomüi; hwom naosa hwom a woknuake ziüi.

²³Anathoth angkya khünaknu hato thama ahüi angkya kue lyet-hantyale changdaoa, ilaxle ija hanpak nguile hüikya zuma, hwom tuita chu azang ang münkop.”