Read Wancho Naga Jeremia 13 Bible Online

Jeremia 13 - Wancho Naga bible

Jeremia 13

¹JOWANPAe ku ang thüi: “Paolax üntoxle jaknyibu shaklax ilaxle ibu tholax, ikoxlechu ibu ti to taxsom.”

²Ikhoma kue ibu shak ilaxle ibu tho.

³Ifüima JOWANPAe ku füi tamchatle akaxle thüi:

⁴“Eufrat shuanu to paolax ilaxle ibu nyilo longluabu tüikya khato khomle toxlax.”

⁵Ikhoma ku pao ilaxle Eufrat zuito ibu khomle tox.

⁶Hanpak noxta ngokya füima Eufrat hato paolaxle ibu nyi apüi angkya JOWANPAe ku füi akax.

⁷Ikhoma ku chatle chat, ilaxle kue ibu khomle toxkya onui alopkya zuma, ku thoma ibu tuita chu lax ang chimüile kyetle male bang.

⁸Ifüima JOWANPAe ku füi tamchatle akax. Chixe thüi:

⁹“Ija lailaile Judah hia Jerusalem ngamle ngokya kue ama angkya changle.

¹⁰Ochax khünak ibue ku kax ma münlaxpule angamle. Hwom a amikya to kaile mongkhüile, ilaxle mama baozangbu to shwom ilaxle ibu thothale changle. Ikhoma ibu a, laxli chitüile nyilo ibu kyetle makya ningle maüi.

¹¹Chemle ibu nyilo hitle ke ma nguipuix, ilailaile Israel hia Judah nok pangnusae ku to mongle naxkople texpu. Hwom ku khünaknu ang achang ilaxle ku hato achua-achenkya hia münchong apüile chang angkya hanpakma mok-hupu; ikoxlechu hwome ku kax ma chilax.”

¹²JOWANPAe ku ang thüi: “Jeremia, Israel khünaknu hama grepti-ju jekya pe pangwüi grepti-ju füi awang angkya akaxkox. Ti pe ibu pangwüi grepti-ju füi awangle chang angkya hwome awan ngopule hwome lanüi.

¹³Ilaxle JOWANPA, kue ija haxtok ma tüikya khünaknu: Dawid su-sa wanghom hwom, zompu-zangpabu, ajebu, ilaxle Jerusalem ma ngokya pangwüi, hwom to owüiole tokle machang machangle kue hwom a grepti-ju füi awang ang tom angkya kax hwom hama wünkox.

¹⁴Ifüima kue tipebu ningle kue hwom tata füi ahongle changüi, naosom hia mixmüi owachu süile müntox. Hwom mik amüt angkya ku chemningkya chingcha hia jajae chu abaxle tui ang müntho.”

¹⁵Israel khünaknu, JOWANPAe akaxdaoa! Puinailax ilaxle ku kax to apalax.

¹⁶JOWANPA, hünzom Zang achuak kox, chixe zangnaknu ahüiüi thoma, ilaxle haxnubu ma hünzom asuale changüi thoma; hünzome sungle monghom ngokya zangngai chixe zangnaknu ang achangüi thoto.

¹⁷Hünzome chiapa jangthüi: Hünzom mongngam khoma ku huxsa ma sopüi; ku mongmaxle sopüi, ilaxle ku mikfi jenle juüi chemthüikoxle JOWANPA khünaknu a zanda ang kople paodao koxle.

¹⁸JOWANPAe ku füi akax: “Hwom ngwotnui angkya thai angkya wanghompa hia hotatüi wangchanu hama akaxkox, chemthüikoxle osün müikya khohom hia khüsünbu a hwom khangkho angkya dütdaoa.

¹⁹Shuathong angkya Judah tingnubu a hwople kopüi khakha ma tüile; hwom kai laxle owachu le ang müntho. Judah angkya khünaknu pangwüi a zanda ang koplaxle paodaoa.”

²⁰Jerusalem, hulax! Nang zanpabu a shuakux chitokhange nguile ngole! Nang ang hulax-ole koxkya khünaknu omaün, nang khünaknu opang bama nang mongngamle ngokyahex?

²¹Nange zuikhuile thütle ngokyabue nang to lüt ilaxle nang to apün-adale jangchangba nange chemle thüiüi? Sheko mixnu tuita to nao ngün wok kakpupule nang to kaküi.

²²Nang to ibu büthüikoxle changpuix: nang nyi büthüikoxle akyet puix ilaxle nang to shing-nünle changpuixle nang jangatüi: ija a nang ochax khom-atsikle changkya khoma changle.

²³Khünakbue ma tsangtsa khwon zong ajüi ang tho ang cha, chichangba chaxnu tuitae chix tsangtsa ma zakya awüt ang tho ang cha? Ija hwome tsuak koxba, ochax boma chemchu chimok tsuakkya nange changkya mwot mok ang awanle laxse.

²⁴Sak-hax zangwin to jeple paopu tsaxsa lailaile JOWANPAe hünzom a chaxwan tok to chiak angkya changle.

²⁵Chixe ija a hünzom osho ang changüile thüidaoa. Ija a chixe hünzom to ile moküile chix mong ma zangwün tsuakkya olom changpu, chemthüikoxle hünzome chix alakle asam ilaxle mixnok baozangbu to mongong ang sütkoxkha.

²⁶JOWANPA chix jaoe hünzom nyi-za sikle changüi ilaxle hünzom a kotho-ngaizale zakkop ang tomüi.

²⁷Hünzome chixe anukya mwot mokle changkya chixe ngündaoa. Zwonpong tuita zwonnu tuita to achuale zikpupule hünzom a ma tomzi kakonubu füito zikle ilaxle haxkho hia kotho to hünzom a songsari baozangbu hato paole changkya chixe ngündaoa. Jerusalem angkya khünakbu, hünzom a maxdaoa! Hünzom a chemtue tsaotha laxüi?