Read Wancho Naga Jeremia 14 Bible Online

Jeremia 14 - Wancho Naga bible

Jeremia 14

¹JOWANPAe ku hama haxzua-zangzua angkya bama akax,

²Judah a mang sople ngole; ija angkya tingnubu a zingole, ija angkya khünaknu a mongmaxle hax to jiple ngole, Jerusalem a fongmix lomle akhong ngole.

³Hakpabue ti lax ang hwom dabu tsanle apaole; hwom a tüküi to ti lax ang za, ikoxle ti ojao chiatak; hwom a tipebu ohua ma laxlaxle chat. Monghixkyae tamchu khosamkyae, hwome ma thün khom.

⁴Chemthüikoxle zang ojao chiwat ilaxle chaxwan tok komkaile zanle zua, manzaimixbu ang mong ma okak ang achang; hwome ma thün khom.

⁵Zimfa to müikhi honu tuitae puxle adütlankya hosa danle tox chemthüikoxle tsüt angkya fum ojao chitüi.

⁶Haxkho ma ajongle tüikya fao mantsakbu hijanbu ningle zaklo syet ang azongzi; hwom mikbue ngün ang chitho chemthüikoxle hwome sax ang osüt muale ngaxchu chitüi.

⁷Ku khünakbue ku sele akhong: “Kwom ochaxbue kwom ma tsaihux-kaxhux fe angkya tüingokoxchu, kwom to asunhüi, JOWANPA, ami nange tsaodaokya ningle a. Kwome nang hato tok obithomthom ma hexle ahole changdaoa; kwome nang zongto ochax mwot mokle changdaoa.

⁸Israel hanpakma monghom angkya nang ta wüi; sikngün-tuitai chak tokya kwom khosünle hüikya a nangtix changpu. Nang a kwom haxtok ma büthüikoxle wünpa tuita ang changle ngo, ja tuita hanpakma nguile toxkya mixwün tuita lailaile a?

⁹Nang a owawa chabüt-lasün ang tomkya ningle büthüikoxle chang, asunle fa ang chithole süpahi tuita zongsho maxkya ningle hi? Otsing tomtata ma, JOWANPA, nang a kwom füi tüile! Kwom a nang khünaknu changle; kwom danle sütaxtox.”

¹⁰JOWANPAe ibu khünakbu bama akax: “Ku ha angkya zikle paokya to hwome luale, ilaxle hwome alüile ma akum-athumle münchangüi. Ikhoma ku ang hwom füi mong münmüi. Hwome mokdaokya thaikya mwotbu kue akhax thomüi ilaxle hwom ochaxbu khoma hwom to sikangünüi.”

¹¹JOWANPAe ku ang thüi: “Ibu khünaknu to fongle fahüile ku ma taxtik.

¹²Hwome chisax-chilingle atsaole zangjop koxle ngaxchu, hwome asun hüile sopkya zing to kue na müntha; ilaxle hwome ku ang zokle ashunkya to hia saxziak to, ibu koxle changkoxchu, ku ang hwom füi otuechu mong münmüi. Itülüi, kue zanhok ma tamchu woknuak hia kak-lak ma hwom mik max ang tomüi.”

¹³Ifüima kue akax: “JOWANPA Khüthak Zang, ajebue khünaknu hama ochax-ozan chichangba woknuak tilan müntüipua, chemthüikoxle kem haxtok ma tumüi-lomkhao lanle ngo angkya nange tsaosaxle akaxdaoale hwome akax ngokya nange awan ngopu.”

¹⁴Ikoxle JOWANPAe lan: “Ku mün male ajebu othai akax ngopu; hwom a kue ajokyabu chichang, chichangba kue hwom ang akax angkya kaxtom koxkya chitüi chichangba kue hwom füi kaxfa tuita chiakax. Hwome akax ngokya mikza wünmang a kuchi tokhange ahüikya münchang; hwome ajekya hia hwome ajangkya tüta angchu münchang.

¹⁵Kue chiahüikya ajebu opange ija haxtok hato ochax-ozan hia woknuak-tilan münhüipule ku mün ma zangwünle changdao laxpuix: hwom a kue ochax-ozan hia woknuak-tilan ma max ang tomüi; ile hwom to kue chakmokle chang angkya JOWANPA kue nang hama akaxle ngopu.

¹⁶Khünaknu opang hama hwome ija zangwün wünle changdaopuix, hwom chuwüi talailaile mik max ang tomüi. Hwom tompobu a Jerusalem tingjang lomnu to tswonle awütüi, ilaxle hwom mangzu angkya khünak owachu chitüiüi. Ija a hwom pangwüi füi ile changüi: hwom kakonubu füichu, hwom sasün hia sacha hwom füi chuwüi. Kue hwom ang hwom chichangchizangle tüikya tsangthom ang tomüi.”

¹⁷JOWANPAe ku ang kaxtom koxle ku mongtsik bama khünaknu hama apua angkya tamchu: “Ku mik ma zangnak zangngaile mikfi jenle naxngo, ku sopkya tamchizakle naxchang, chemthüikoxle ku khünaknu to zule mak-kha laxle tüile ilaxle hwom to chisumüile thomzünle.

¹⁸Chemtue ku zang kotho to laile paopuix, kue zanhok ma langkya khünak mangbu ngün; chemtue ku tinglongbu to paopuix, kue khünaknu woknuak ma zile ngokyabu ngün. Zompu-zangpabu hia jebue hwom mwot mokle ngo, ikoxle hwome chem mokle ngopuix hwome chitik.”

¹⁹JOWANPA, nange Judah nok owüiole awüt pia? Zaion angkya khünaknu thua nang anu pia? Nange kwom to chemkhoma ojao chimüi angkya maklaxle chang ang tompu? Kwome tumüi angkya to hule nuipu, ikoxle omüi chemchu chihüi; kwome kakmüi angkya to hule ngopu, ikoxle kwom hato chabüt-lasün angkya mix hüipu.

²⁰Kwome nang zongto ochax lyenle changdaoa, JOWANPA; kwome ku ochax ngaile ngopu ilaxle kwom pupa hwom ochaxbu a.

²¹Nang kaxtsaobu texle ataklax ilaxle kwom ajaole tax-awüt; Jerusalem hato thajao-wünhai taxahüikox, ikha a fuazangkya nang nui-ting changle. Nange kwom füi zingkya Tsaotsüt amale taxchang.

²²Owa nok chapabue chu zangwat ti ajo ang münthopu; zangdinge chix lailai to nyenti ajo ang müntho. Kwome kwom monghom nang ma thompu, O JOWANPA kwom Zang, chemthüikoxle ibu moktsuakkya a nangtix changle.