Read Wancho Naga Jeremia 16 Bible Online

Jeremia 16 - Wancho Naga bible

Jeremia 16

¹Anaole chuwüi JOWANPAe ku füi zangwün ilaxle thüi:

²“Iningkya chaxwan longkho to kako tanle hia supux-sapaile taxchang.

³Ija haxtok ma pux-paile changkya naosom hia nu-pa hwom to chemle chang angkya hex kue nang füi wünüi.

⁴Hwome khompua-zadünkya kaknu-laknu ma zile paoüi, ilaxle owaechu hwom mang münsop chichangba münakhün. Hwom mangbu a haxkha to haxzao thokle athünkya ningle thomüi. Hwom a zan ma maxüi chichangba woknuak ma maxüi, ilaxle hwom mangbu a osabu hia faomüibu süt ang changüi.

⁵“Mangsople ngokya homkha to nang münnop angkya oli. Owa hanpakma chu nang taxsop. Kue chemtue ku khünaknu to mongsom füi mohimanle münchang chichangba mongkün hia chingcha ahole münchang.

⁶Hakpa-luapa hia tüimix-nuak mix pangwüi ija haxtok ma ziüi, ikoxle owachu hwom man münsop ilaxle owae hwom münakhün. Hünzom kha angkya owaechu ma thün münakhiküi chichangba mongma ahole kho-ongle münchangüi.

⁷Owawa mamix zile changpongma owaechu owa füichu mong asom ang hexle tomsax-tomlingle chichangüi. Owaechu chingchajaja ahole chitüiüi. Honu hia hopa max-samle changkya khünak to ngaxchu humele chichangüi.

⁸“Khünaknue puale saxlax ngokya homkha to nople le taxchang. Hwom füi tomle tomsax-tomling ang thungle taxchang.

⁹JOWANPA, Israel nok Khüthak Zang-e chem akaxse hex ija to apalax. Mongmüi ozing ilaxle pwonla tungle tuiju-nasomle puakya zing kue adang daoüi. Ikha angkya khünaknu a ija changle hüikya ngün ang ngoüi.

¹⁰“Chemtue nange ibu pangwüi hwom hama wünle koxüihex, chemkhoma kue hwom to ipongpong thomshixle sikangün ang thüipule hwome atüiüi. Hwom tsangmüt chem hex ilaxle JOWANPA zongto thaikya hwome chem mokdaopuix, ibu hwome atüiüi.

¹¹Ipongma JOWANPA zangwün ija hwom hama apuakox: ‘Hünpu hünpa hwom ku hato tok aho laxle aküile pao ilaxle mama baozangbu to shwom-to tamchu ibu thothale chang. Hwome ku chilaxle awüt ilaxle ku hwon-nwotbu kax ma chilax.

¹²Ikoxle hünzom hünpu-hünpa hwom to kaile chimüikya mwot mokle hüi. Hünzom pangwüi mongkhüi ilaxle chichangchizangle tüi, ilaxle hünzome ku kax ma ojao chilax.

¹³Ikhokhoma, kue hünzom a, hünzomechu chichangba hünpu hünpa hwomechu tümatsingkya haxtok to tswonle awütüi. Ilaxle ikhato zangnak zangngaile hünzome mama baozangbu thotha-manzaile ngoüi, ilaxle kue hünzom hato chingcha ahoüi münchang.’”

¹⁴JOWANPAe thüi: “Ijip nok tokya Israel khünaknu alaile apüikya khüzün Zang changpule ku mün ma khünaknue tsaosaxle chichang angkya hanpak nguile hüile.

¹⁵Itülüi, ku a, shuakuxchi nok tokya tamchu kue hwom chiakle asam thomkya nok tokya Israel khünaknu khosünle apüikya khüzün Zang changpule ku mün ma tsaosaxle changüi. Kue hwom pupa hwom ang koxkya hwom haxtok towüi chatle apüiüi. Ija kax JOWANPA, kue akaxdaoa.”

¹⁶JOWANPAe thüi: “Ibu khünaknu kop angkya hanpakma kue nyaxlwot mixbu huanuma apao ngopu. Ifüima kue müihapmixbu huanuma, haxnu hia haxhua tamchu longkun hia longlua pangnu khato hwom to hap ang apaoüi.

¹⁷Hwome mokle ngokya pangwüi kue ngünle ngopu. Ku miktho angkya hwom owaechu pyenle münthom; hwom ochaxbu a ku thoto pyen ang müntho.

¹⁸Hwom ang kue hwom ochax hia chichangchizangle tüikya tsang othom anyie nüile thom ang tomüi, chemthüikoxle khüzün chemchu chitüikya mang thatha chapabu makhange ku haxtok akhu ang tomdaoa, ilaxle ija haxtok ma hwom othai baozangbue awang ang tomdaoa.”

¹⁹JOWANPA, nang a ku kho-awakya tamchu ku ang tsak-zong koxkya Zang changpu; kue sikngün apongle changpongma nange ku to asun. Haxtua-zangnam tokhange jat-li pangwüi nang hato nguiüi ilaxle thüiüi: “Kwom pupa hwom ang othai baozang, laxli chitüikya chapabu boma chemchu müntüidaoa.

²⁰Khünaknue ma baozangbu alüile zingle lax ang tsuak ang chami? Müntsuak! Hwome zingle jangchang thünchu ibu a baozangbu tsingtsing münchangüi.”

²¹Ikhoma JOWANPAe thüi: “Tamfang ma pangnusa hanpakma jat-libu ang kue ku tsak-zong hia janzüi awan ang koxüi; ilaxle hwome ku a JOWANPA changpule awanle laxüi.”