Read Wancho Naga Jeremia 17 Bible Online

Jeremia 17 - Wancho Naga bible

Jeremia 17

¹JOWANPAe akax: “Judah angkya khünaknu, hünzom ochax a jan zatkia füi zadaoa; ilaxle ija a hünzom künkha-mongkha ma thalix long jun füi takle zadaoa ilaxle nang tö-tsapbu angkya müizongbu ma ija saosa füi takle zadaoa.

²Hünzom khünakbue baozangchanu Asherah hanpak ang pünnu tong hex athüithüi ma tamchu haxkho hex athüithüi ma

³haxhuabu hia kothofa pangnu khato muabu zinglaxle shwom. Hünzome mokdaokya ibu ochax khoma kue hünzom zanpabu ahüilaxle hünzom haxtok pangkha tokya tuina hia ngun-syenbu pao ang tomüi

⁴Kue hünzom ang koxkya haxtok hünzome dantox angkya wüi ilaxle hünzome awanle chingokya mixnok chaxwan to kue hünzom ang zan-nokbu thotha-manzaile ngo ang tomüi, chemthüikoxle ku mongtsik a wün ningle changpu, ilaxle ijae jento zokle ngoüi.”

⁵JOWANPAe thüi: “Ku hato tok ahokyabu zile maxün angkya khünak to hwome mongong thomle changkyabu pangwüi kue ahaile changüi.

⁶Chix a sak-hax tokya hingzangsa ningle changpu, oja zuazoxkya mwot to chihüikya nui, chemchu chinyemkya hum chaxwankho ma nyemle tüipuix. Chix füi chemtuechu müikya oli tam chiapong.

⁷“Ikoxle ku to chix mongong thomkya khünak to kue mohimankya tüiüi.

⁸Chix a shuasa tuita kax ma nyemkya pün tuita ningle changpu ojae matsing timong to ju ang koxpuix. Zangwin khamkya jeple chang pongmachu ija ang monghix angkya müntüi, chemthüikoxle ija pünchakbu a hingshüile tüile; zangwatle chichang pongmachu ija aban angkya müntüi; ija ma oziak chizakle ziakle ngole.

⁹“Khünaknüsa kün-mong owae tsingthoüi? Ija ningkya huxtsing-loptsang chemchu müntüi; ija a tam chimüikya lima okak füi tüile.

¹⁰Ku, JOWANPAe kün-hi-mong lomle ilaxle khünaknu mong wanle anole. Hwom chemle ngopuix ija olom ma kue pangwüi füi asax-amokpu, hwome mokkya mwot füifüile a.”

¹¹Chimüikya lom makhange ngun kople changkya mix a mae chilütkya oti to womkya osa ningle changpu. Chix zaxtan tüipongwama chixe ma ahak-aluakya asamüi, ilaxle oshukshuk ma chix a tuita ongat ang changüi.

¹²Kem Zangshwom-Homnu a fuazangle tüikya tüntong tuita ningle, pongwang tokhange wüi atsuakya haxkho ma ajongle ngokop laxle a.

¹³JOWANPA, nang a Israel nok monghom changle; nang danle toxkyabu pangwüi ang zak-akopüi. Hwom a haxbu ma asaxkya ningle samdaoüi, JOWANPA, titsao jenkya tümik, hwome nang danle toxkya khokho ma.

¹⁴JOWANPA, ku kak amüihüi ilaxle ku kodong-handongle changüi; ku khang azün hüi ilaxtix ku khangkho zangngaikya ang ngoüi. Kue achuakkya a nang changpu!

¹⁵Khünaknue ku ang thüi: “Zang-e chemkha tokya tsai-kax ibu lomlaxle kem azapuix? Athaxpi chix ang ibu mokle aho ang laxkox!”

¹⁶Ikoxle, JOWANPA, hwom hato othom-ojo apüi angkya kue otuechu nang mong asa ang müntom; kue hwome thangnak apong angkya to münlua. JOWANPA, nange ija awan ngopu; kue akaxdaoale nange awan ngopu.

¹⁷Ku zongto shix-male taxchang; thangnak hüipongma nang a ku khangkho sün nui changpu.

¹⁸Ku zan to kale changkyabu hato thünzak apüile laxkox, ikoxle ku a shantoxhüi, JOWANPA. Hwom a thomshixe awangle chang ang tomkox, ikoxlechu ku a chabüt-lasünle chang ang taxtom. Hwom hato thama apüile laxkox ilaxle hwom a thuple akhixkox.

¹⁹JOWANPAe ku ang thüi: “Jeremia, Judah nok wanghom nopkya hia laile paokya Khünaknu Zünkai ma ku kaxho apuk-kox; ifüima Jerusalem angkya zünkaibu pangnu khato wüi paokox.

²⁰Wanghom hwom hia Judah angkya khünaknu hama tamchu Jerusalem ma ngole tüikya pangnusa hama üntoxle chu zünkai ibu makhange nguidongle changkyabu pangnusa hama, kue akaxkya kax to apa angkya akaxkox.

²¹Hwome hwom khüzün to mongkünle jangtüi, hwome Sabath nyix hün chemchu chihün angkya oli; hwome Jerusalem zünkaibu makhange tütalichu hün laxle münngui angkya changpu

²²chichangba Sabath nyix hwom homkha ang tütali hün laxle münpao angkya changpu. Hwome Sabath nyix mwot chimoküi; hwome ija nyix tuita otsao-nyix le atsaole nui angkya changpu; ija a kue hwom pupa hwom ang koxkya kaxtom ningle changpu.

²³Hwom pupa hwome ku kax to chiapa chichangba mong ojao chikox. Itülüi, hwom mong sisi mix khüi; hwome ku kax ma chilax ilaxle ku makhange chemchu awanle chilax.

²⁴“Hwome ku kaxtombu kax ma laxle chang angkya wüile ibu khünaknu hama akaxkox. Ibu zünkaibu makhange hwome Sabath nyix chemchu hünle chiapüi angkya changpu. Hwome Sabath nyix a tuita otsao nyix changle le mwot chemchu chimokle atsaole nui angkya wüi.

²⁵Ifüima hwom wanghom hia wanghom naosom hwom Jerusalem zünkaibu makhange nguiüi ilaxle Dawid ma tüikya ningle Chongwang tsak-zong tüile ngoüi. Judah hia Jerusalem angkya khünaknu füi tomle, hwom a man-kanlin hia man, ibu ma ngaüi, ilaxle Jerusalem tingnu a jento khünaknue awangle ngoüi.

²⁶Judah tingnu hia Jerusalem akhople tüikya tingkhuabu tokhange khünakbu nguiüi; hwom a Benjamin haxsüt tokyabu nguiüi, haxchabu tokya, haxhuabu tokya, ilaxle shuathong Judah tokyabu nguiüi. Hwome ku Zangshwom-Homnu to zokle ashunkya tö hia zangjang tö saxziak tö, ongan müikya so, ibu pangwüi apüiüi. Hwome münchong fakya töbu chuwüi apüiüi.

²⁷Ikoxlechu hwome ku kax ma lax angkya wüi ilaxle Sabath a tuita otsao-nyix le atsaole nui angkya wüi. Ija nyix hwome Jerusalem zünkai makhange chemlichu hün laxle chileüi, chemthüikoxle hwome ile jangmok thüiningle Jerusalem zünkaibu ma kue wün langüi. Jerusalem angkya chongwang homlobu wün to zokle shun ang tomüi, ilaxle ija wün owaechu amüt ang münthoüi.”