Read Wancho Naga Jeremia 18 Bible Online

Jeremia 18 - Wancho Naga bible

Jeremia 18

¹JOWANPAe ku ang thüi:

²“Tikjaomix hom to jukox; ikhato kue nang ang ku kaxho faüi.”

³Ikhoma ku ikhato ju ilaxle ocha anguixle tik-jaopae tik jaole ngokya ngün.

⁴Chemtue chixe jaokya tik chimüile laipuix, chixe ija haxthom lax ilaxle mama tütali ang achangle zing.

⁵Ifüima JOWANPAe ku ang thüi:

⁶“Ija tik-jaopae chix haxthom füi chemle mokpuix ija ningle hünzom Israel khünaknu füi kue moktsuak angkya chifün ku ang müntüi hia? Tikjaomix chak ma haxthom chemle hex ilailaile hünzom a ku chaktom ma tüipu.

⁷Tütatuechu changlax, kue fuaküi, thuple akhixüi, chichangba tüta jat-li chichangba wangting kue amale awütüile kue jangthüiba,

⁸ikoxle hwom chichangchizang mwot dantoxlaxle ija jat-li mongchatle jangchangba, kue chem moksepa hex ija münmok.

⁹Itülüi, kue küi angkya changpu chichangba tütapu jat-li chichangba wangting chang koxlax kue zingle alai angkya changpule kue jangthüi:

¹⁰Ikoxlechu ija jat-lie ku kax ma chilaxle ochax mwot mokle wüi jangngoba, kue chem moküile akax daolaxpuix ija münmok.

¹¹Ikoxle athax, kue hwom zan to kale hwom to sikangün angkya olom zingle ngole le Judah hia Jerusalem angkya khünakbu füi akaxkox. Hwom ang chichang-chizangkyae awangle chingo angkya kax laxkox: hwom kün-mong hia hwome mokle ngokya mwot dantox angkya akaxkox.

¹²Hwome lanüi, ‘Münchang, kwome ile büthüikoxle changüi? Kwom pangwüi kwome tex-sung pupule mongkhüile tamchu chichangchizangle tüiüi.’”

¹³JOWANPAe thüi: “Thochi ma iningkya changle hüidaocha ang mixjat-mixlibu ma atüile anolax. Israel khünaknue khomtsikya oli tsuakdaoa!

¹⁴Lebanon angkya longnukhobu jun chitüitox homle tüngocha? Ija angkya zangkong haxnubu angkya ti zople chang toxcha?

¹⁵Ikoxlechu ku khünaknue ku alakle asam; hwome chapabu tuntho to ongan müikya sobu zok. Hwome müile lehaxkux lom ma hwom chikho thu; hwome athaxpi kaikya baozangbu lom ojao chito; hwom a oshua chitüikya lombu to aham.

¹⁶Hwome ija haxtok a khompua-zadünkya oli ang achangdaoa, ilaxle pangnusae ikha othuithui hanpak ang awütdaoa. Hwom mik füi ngün ang kopkyabu thoto imakhange lekya khünakbu abütüi; abütkyae hwome khang awingüi.

¹⁷Hwom zanpabu tunthoma kue ku khünakbu afale apaoüi, ija a handünchi winjep to haxbu pile paokya ningle changüi. Kue hwom hato ku tok ahoüi; Thama hüile changkya zuma kue hwom to münfong.”

¹⁸Ifüima khünaknue thüi: “Jeremia hanpakma tütali tümok-hax! Kem ang adangle fa angkya hanpakma nguapabu, zün-sai angkya hanpakma jepabu, ilaxle Zang kaxho angkya hanpakma ajebu tüile ngo angkya changle. Kemepi chix ma kaxhux fehax ilaxle chix zangwün to apale taxngohax.”

¹⁹Ikhoma kue zangjop: “JOWANPA, ku kax to apahüi ilaxle ku zanpabue ku bama wünkya zangwün atatle kop-hüi.

²⁰Ku müikya khoma kue kop angkya a ochax hi? Ikoxle hwome ku adüt angkya tswomkha thodaoa. Ku nang hato nguilaxle hwom khose ang kue chemle akaxkya dai ija texle atak-hüi, ikoxle tix nange hwom to mongtsiktsik ma laxle münmoküi.

²¹Ikoxle athax, JOWANPA, hwom naosombu woknuak ma zi ang laxkox; hwom a zan ma max ang tomkox. Mixnu hwome ma kakopa hia naosom hwom amüt-asamle naxchang kox; mixpabu a okak-olak ma ilaxle tsünzün thom a zanhok male max ang tomkox.

²²Kaxkhün chemchu chitüi homtoxle hwom hom-hax tsui pao angkya khünak othom tuita ahüikox; hwom a chabüt-lasünle akhong ang tomkox. Hwome ku naxdüt ang tswomkha thodaoa ilaxle aman ang kam thale changdaoa.

²³Ikoxlechu, JOWANPA, hwome ku mik amüt ang atsing ngokya pangwüi tikle ngopu. Hwom chichangchizangle tüikya hia hwom ochaxbu hanpakma thailak taxtüi. Hwom to zane lüt ang tomkox ilaxle nang mongtsikle ngopongma hwom to chak mokkox.”