Read Wancho Naga Jeremia 2 Bible Online

Jeremia 2 - Wancho Naga bible

Jeremia 2

¹JOWANPAe ku ang

²Jerusalem ma tüikya pangnusa hato ija kaxho fa angkya akax: “Nang naosom pongma chemtukux mongong ma chiale le tüikya hex kue münalak, künyi aju-asomle chang tanto owangpongma nange ku to tüle mongkünkya dai; sak-hax akaile nange ku mantole azüi, thomo-manzaile chichangkya haxtok akaile a.

³Israel, nang a ku tata kux changle; nang a ku otsao tüi jaojao changhupu. Kue sikngün zothup ahüipu nang to chakmok janlangle changkyabu pangnu hato. JOWANPA, kue akaxdaoa.”

⁴JOWANPA kaxho to apalax, hünzom Jakop su-sa hwom, hünzom Israel jatlibue.

⁵JOWANPAe akaxle: “Hünzom putong hwome ku zongto tsaitox-kaxfe angkya chempang apüipuix? Hwome chem khoma ku hato tok ahopuix? Hwome laxli chitüikya chapabu to shwom ilaxle hwom alüile chilaxle ang achangle pao.

⁶Hwome ku tüi jaojao chitex. Ijip nok tokya hwom kue sünle apüihupu ilaxle sak-hax faokha akaile kue hwom azuipu: Sak hia sak haxbange awangle tüikya haxtok, zuazoxkya hia thomzün tüikya haxtok ojong khato owachu chingo ilaxle owa ngaxchu ahamle chichangkya haxtok.

⁷Kue hwom haxzao füikya haxtok to apüipu, ikhatokya puamün hia müikya oli saxlaxle naxchang koxle. Ikoxle hwom ku haxtok mix thomjo; kue hwom ang koxkya haxtok hwome akhu ang tom.

⁸Nguapabue chiatüi: ‘JOWANPA ojongkha?’, le Ku nguapabue ku chitik. Apün-awangkyabue ku zan to ka; ajebue Bal baozang mün ma zangwün ilaxle laxli chitüikya chapabu to shwom.

⁹“Ikhoma, JOWANPA, kue ku khünaknu zongto chatle chu zangwün tsetwonkya tüiüi. Kue hwomsu-hwomsa hwom ma tsaitox-kaxfele changüi.

¹⁰Hannopchi to Saipras shuazo to paolax, ilaxle khünak owawa handünchi Kedar haxtok to apaokox. Ininglükya otuechu tümachangtoxle hünzome ngün ang kopüi.

¹¹Hwom otsing tomtata chichang koxle ngaxchu, owa nokechu ma baozangbu lüile machang. Ikoxle ku khünakbue ku, hwom hato münchong apüile fakya Zang, chem lom ma ngaxchu hwom füi chiamüitho angkya baozang füi alüixle.

¹²Ikhoma kue khompua-zadünle zangding alox angkya kaxtom koxpu, abütle tamchu khosamle naxchang kox ang a,

¹³chemthüikoxle ku khünakbu ochax oli anyi lyendaoa: hwome ku hato, tsaothakya tümik hato tok ahodaoa, ilaxle hwome titungbu thole changdaoa, ti kople thom ang chimüikya titungbu a.

¹⁴“Israel nok a da tuita münchang; chix a da tuita hex-ole pux-paikya chichang. Chemkhomale chix zanpabue chix zan to kale ngopu?

¹⁵Hwome chix to mailangbu lailaile tsele; hwome chix haxtok a sak-hax ang achangdaoa, ilaxle chix tingnubu amale toxdaoa, komkaile ohua ang achangle dantoxdaoa.

¹⁶Changle, Memfi hia Tahpanhes khünakbue chix khangza thuple akangdaoa.

¹⁷Israel, nange alüile ija nang ding a nange apüilaxpu. JOWANPA, nang Zang ku nange awütle toxlaxpu, lomjang fole kue nang lom azüingale-a.

¹⁸Hünzome Nail shuanu angkya ti ling ang Ijip nok to julaxle olüi tükopüile thütlax pia? nok to paolaxle Eufrat shuanu angkya ti lingkya ma hünzome olüi tükopsaxüile texlax pia?

¹⁹Hünzom ochaxe hünzom towüi sikngün fa angkya changpu, ilaxle hünzome ku hato tok ahokyae hünzome wüi thajao kop angkya changpu. JOWANPA hünzom Zang ku awütle toxkya chemtukux khaxkya hex tamchu thaikya hex ija hünzome awanle laxüi, ilaxle hünzom mongong tüikya füi ku ma ngo ang chikople changüi. Ku, JOWANPA Khüthak Zang-e ija akaxdaoa.”

²⁰JOWANPA Khüthak Zang-e thüile: “Israel, nange ku tsak-zong kaiwüi awütpu; ku kax ma münlax tamchu ku to münshwomle nang angampu. Haxnukho pangkha towüi ilaxle pünnu tong hex athüithüi to puamün baozangbu to hünzome shwompu.

²¹Kue hünzom a sümüipu zu tuita ang küihupu püntsangbu kha angkya sümüipu otsang zünlaxle a. Ikoxle nang chem ang achangpuix hulax! Nang a laxli chitüile shanle maxünkya zu tuita ang achangdaoa.

²²Nang a sümüi pupu sabon füi sokoxle chu, kue nang thaikya janman ngün ang kople.

²³Nange alüile nang akhu ang matom, nange Bal to chemtuechu mashwomle chemle thüitsuak? Nange haxsha to chemle achaxpuix hulax; nange chem mokdaopuix hulax. Nang a danle aham thomkya ut tuita tüle zok-kham laxle,

²⁴sak-hax to thule fütkya ningle. She zok-khamle changpongma, ija owae abax ang thoüi? She füi ngose tsukya ola tuita ang khosam chemchu müntüi; atu-amai tu ma she a jento achwonle tüile.

²⁵Israel, nang cha hua ma taxngo, chichangba mix baozangbu achuale nang dingdua zan ang taxtom. Ikoxle nange thüitüi, ‘Ile münchang! Ku aküile chat ang müntho. Kue mixnokbu baozang füi mongakün daoa ilaxle kue hwom tangchua angkya wüi changle.’”

²⁶JOWANPAe thüile: “Kople changkya zuma ahuxmix to chingcha chitüile changkya ningle, hünzom Israel khünak to chingcha chitüile changüi—hünzom wanghom hwom ilaxle nguakax-wangkhobu, hünzom nguapabu hia ajebu pangnusa to a.

²⁷Hünzom pangwüi ang zak-akopüi—pün nang apa kux ilaxle long nang anu kuxle akaxkya hünzom pangnusa ang a. Hünzom ku hato hüihaxkux lüi ma ku hato tok ahole paokya khoma ija ile chang ang tomüi. Ikoxlechu chemtue hünzom sikngün-tuitaile changüihex, hünzome hüilaxle hünzom khosün angkya ku wüi lom.

²⁸“Hünzom hanpak ang zingle alaikya hünzom baozangbu omaün? Hünzom sikngün-tuitaile changpongma ibu ang azünhüile thüilax—hwome tsuak angkya oli jangchangba! Judah, hünzom ang tüile ngokya tingnu büta hünzom ang baozangbu tüihupu.

²⁹Hünzome kaxthup-ngaotün ngo angkya chem tüi? Hünzome ku ang omale büthüikoxle thüipu?

³⁰Kue hünzom to zothuple changpu, ikoxle hünzome müikya chemchu chimok; hünzome ku ang hünzom achangle zing ang chitom. Tüle shix-makya mailang tuita ningle, hünzome hünzom ajebu langle awütpu.

³¹Israel khünaknu, kue akaxle ngokya to apa koplax. Ku a hünzom zongto sak-hax tuita ningle, zangnaktukle tamchu khompua-zadünle tüidao pia? Ile chichangba, chemkhoma hünzom a hünzom küntsu monglua ma mok-mole ngoüihex, ku hato münchatpule angam?

³²Hünzom nok naocha tuitae she likwünbu alakcha, chichangba tuipa tuitae chix za-pua alakcha? Ikoxle ku khünakbuepi hanpak o-echithole ku alak-asam daoa.

³³Ma mongkünbu man chemle toüihex hünzome müile tsingle ngole. Chisumüikya mixchabue ngaxchu hünzom angkya ija awanle kop ang thoüi.

³⁴Hünzom nyizabu a chem chitsingkya mixshix hia zasa hwom aji füi akhik laxle tüile, ahuxmix hwom aji füi münchang. “Ikoxlechu ibu pangnu lüi to,

³⁵hünzome thüitüi, ‘Ku a oma chemchu chitikkya khünak; JOWANPA ang ku füi mongtsikya müntüi angpu.’ Ikoxle nange ochax lyenkya bama nang atsekya khoma JOWANPA kue nang to sikangünüi.

³⁶Mixnok baozangbu hato paokya makhange nang a thanai ang achangle awütdaoa. Asiria noke lailaile nang a Ijip noke chuwüi mong atho ang tomüi.

³⁷Nang zakkop ashukle Ijip nok tokya tok ahole paoüi. JOWANPA kue, nange mongongle tüikya ibu chilaxle awütdaoa; hwom makhange nange olüi chemchu münkoppu.”