Read Wancho Naga Jeremia 22 Bible Online

Jeremia 22 - Wancho Naga bible

Jeremia 22

¹Judah wanghom homlo, Dawid hosu hwom hato paolaxle wanghompa, chix nguakax-wangkhobu ilaxle Jerusalem angkya khünaknu hama JOWANPA kaxho apua angkya JOWANPAe ku füi akax:

³“JOWANPA, kue nang ang chem supuix tamchu otsing changpuix ija mok angkya nang ang kaxtom koxpu. Mixdyen mixlale ngokyabu chak tokya dyen-lale asam thomkyabu kho-awa kox. Ma zuikhui nokbu, khaxsabu, thanubu, ibu to chichangchizangle taxhwon; ilaxle ija otsao nui ma chemngax chichangkya mix mik max ang taxtom.

⁴Kue chemle kaxtom koxpuix ile nange jangmok thüiningle Dawid sasün hwom a wanghom ang changle wüi ngoüi. Ilaxle hwom hia hwom nguakax-wangkhobu tamchu hwom khünaknu, hwome ija wanghom homlo zünkaibu makhange man-kanlin hia mankhobu ma chizakle lele ngoüi.

⁵Ikoxle nange ku kaxtombu kax ma chilaxle jangchang, kue nang füi tsaosaxle thüipu, ija wanghom homlo a pünle amaüi. Ija kax, JOWANPA kue akaxdaoa.

⁶“Ku zongto, Judah nok wanghom homlo a Gilid haxtok hia Lebanon Haxnubu ningle osün müile tüile; ikoxlechu kue ikha a khünak owachu chingole awütkya onui tuita ang achangüi.

⁷Ija ama ang kue khünakbu ahüi ngopu. Hwome hwom wafaxbu pangwüi apüiüi, ija ma tüikya osün müikya sedar pünbu dakle anguaküi, ilaxle ibu wünkha to awütüi.

⁸“Ofüima mixnokbu huanuma ija makhange leüi ilaxle JOWANPAe büthüikoxle ija tingnu to ile mokpuixle atüiüi.

⁹Ija a, hünzome ku hünzom Zang füikya Tsaotsüt chilaxle awüt, ilaxle mama baozangbu to shwom-tole ibu thothale changkya khoma changpule hwome lanüi.”

¹⁰Judah angkya khünaknu, wanghompa Josiah mang taxsopngo; chix zikya mang taxsopngo. Ikoxle chix sasün Joahaz hanpakma zongbakle soplax; hwome chix a tamchiachat angkya hanpakma paole ngole, chixe puxkya haxtok tamchatle chingün angkya hanpakma.

¹¹JOWANPAe Josiah sasün Joahaz, owa hopa man ma Judah nok wanghom ang achangpuix, chix bama thüi: “Chix a tamchichat angkya hanpakma ikha angkya paodaoa.

¹²Chixe hwome chix kople paokya haxtok to ziüi, ilaxle chixe ija haxtok tamchatle otuechu münngün.”

¹³Chisukya olom tokhange ija hom zaile alaikya tamchu ija achenle zingkya mix; owae chix khünaknu ang muato mwot amokpuix ilaxle hwom ang hingchak mün chifale changpuix, chix a maxdaoa.

¹⁴“Ku hanpakma kue homnu chongkya zingüi, ija ma homdingkho to ataxle wünlixkya nui tüiüi”, le akaxkya khünak maxdaoa. Ikhoma chixe chix hom ma thangmikbu apüt, thong-ta ang sedar pün laxüi, ilaxle ija akhikle zingüi.

¹⁵Mama mixhombu füi sümüile, nange sedar pün füi hom zingle le nang tuita sümüipu wanghom ang achang ang chami? Hünpae chix tsün mongtex ma shale ngole hüidaoa. Chix a othuithuima sukya hia mamix chisüile tüikya, ilaxle chixe mokkya pangwüi lom ma chix ahak-aluale chang.

¹⁶Chixe zasabu hanpakma sukya kaxfün fa, ilaxle chix füi pangnu wüi müile le. JOWANPA tsingpu le ija ang tix nyakpu.

¹⁷Ikoxle nange nang hanpak zaza ajangkya ngünle; nange chemngax chichangkya khünakbu lang ilaxle zongzong ma laxle nang khünaknu thakma adale chang. JOWANPAe akaxdaoa.

¹⁸Ifüima, JOWANPAe Josiah sasün Jehoiakim, Judah nok wanghom bama akaxle thüi: “Chix zikya bama owachu münsop chichangba, ‘Khompua zadün, zuikhui, khompua zadün!’ le thüiüi. Chix hanpakma owachu mong münma chichangba, ‘Ku JOWANPA! Ku chongwangpa!’

¹⁹Mantsak tuita mangzuk achuakkya füi, chix a linle paoüi ilaxle Jerusalem zünkai akaile tswonle awütüi.”

²⁰Jerusalem angkya khünaknu, Lebanon to paokox ilaxle akhong kox, Bashan haxtok to paokox ilaxle sopkox; Moab haxnubu makhange nyakkox, chemthüikoxle nang üitho hwom pangwüi to anaodaoa.

²¹Nang ahak-aluale tüipongma JOWANPAe nang füi zangwünpu, ikoxle nange mün-apapule angam. Nange nang tsün-tsün ma ilele wüi mokle hüipu; nange JOWANPA kax ma otuechu chilaxpu.

²²Hünzom lompabu a zangwine pikle paodaoüi, nang üithobu a zandabu ang kople paodaoüi, hünzom tingnu a chingcha chitüile zakkop ang tomüi hünzome mokle hüikya ochaxbu khokho ma a.

²³Lebanon tokhange apüikya sedar thamkha to nang kho azangle ngo; ikoxle nang to tsütle kakkya zuma nang a chingcha ashukle changüi, mixnu tuita to nao ngün wok-kak kakkya ningle a.

²⁴JOWANPAe wanghompa Jehoiakin, Judah nok wanghompa Jehoiakim sasün füi akax: “Ku chemle khochisamkya khüzün Zang hex, ilaxle nang a ku tsaxchi chak ma shintop khoptüt ang ngokya chang koxlechu, kue nang file awütüi

²⁵ilaxle nang a nang zale ngokya khünakbu chak to koxüi, nang mik amüt-sele tsukya khünakbu chak to a. Kue nang a Babilon nok wanghompa Nebukadnezar hia chix süpahibu chak to koxle apaoüi.

²⁶Kue hünnu hünkhi to zanda ang pao angkya atsangüi. Hünkhi opupuchu ikha to chipuxkya haxtok to hünkhi a zanda ang kople pao ang tomüi, ilaxle hünkhi pangnyi wüi eto ziüi.

²⁷Hünzome ija haxtok tamchatle ngünsele sungüi, ikoxle hünzom ang otuechu chichatüi.”

²⁸Kue thüipu: “Wanghompa Jehoiakin a tuita ashix daokya tamchu owaechu chilaxle awüt daokya tikkux tuita ningle changdao pia? Ija khokho ma chix tamchu chixsu chixsa hwom pangwüi hwome awanle chingokya haxtok to zanda ang pao pia?”

²⁹O haxtok, haxtok, haxtok! JOWANPA zangwün to apalax:

³⁰“Ija mixsün a chix su-sa hwom amüt angkya le ahaidaoa, otuechu chitho-chilünkya mix ang achang angkya ahaidaoa. Dawid mantswon tuita ningle Judah haxtok ma apün angkya mix chix ang sixli tuita chu müntüiüi. Ija kax, JOWANPA, kue akaxdaoa.”