Read Wancho Naga Jeremia 23 Bible Online

Jeremia 23 - Wancho Naga bible

Jeremia 23

¹Opange chix khünaknu amüt laxle chiakle sam ang tompuix, ibu apün-awangkyabu hanpakma JOWANPA kaxfün chemkuxma khomtsikya changüihex!

²Chix khünaknu to akox-akomle hu-mese pa, apün-awangle hüikya lompabu hanpakma, JOWANPA, Israel nok Zang-e akaxkya kax ija changle: “Hünzome ku khünaknu to chihu-chime; hünzome hwom chiakle asam ilaxle jwonle apao. Athax a kue, ija hünzom ochax mwot khokho ma hünzom to sikangün angkya changle.

³Kue chiakle sam ang tomkya haxtok tokya atale tüikya ku khünakbu kue asox-asüiüi, ilaxle kue hwom a hwom haxtok to chatle apüiüi. Hwom ang su-sabu huanuma tüiüi ilaxle khünak huak tüle pu-tsale changüi.

⁴Hwom to humele chang angkya apün-awang angkyabu kue kamüi. Athaxpi ku khünaknu otuechu za-zyenle hia chabüt-lasünle münchangüi, ilaxle kue hwom to tamchatle sik-münangün. JOWANPA, kue ija kax akaxdaoa.”

⁵JOWANPAe thüi: “Dawid sixli hwomkha angkya kue otsao wanghom tuita zün angkya hanpak nguile hüile. Ija wanghompa-e je füi apünüi ilaxle haxtok ma pangnu khato wüi changkya hia sukya mwot moküi.

⁶Chemtue chix wanghom ang changpuix, Judah angkya khünaknu chaza angkya chitüile ngoüi, ilaxle Israel khünaknu a mongsom ma ngoüi. Chix ang ‘JOWANPA kem Khosün’, le nyaküi.

⁷“JOWANPAe thüile: “Ijip nok tokya Israel khünaknu alaile apüikya Zang mün ma khünaknue tsaotsütle chichang angkya hanpak nguile ngole.

⁸Itülüi, shuakuxchi haxtok hia chixe chiakle asamkya chaxwan tokya ozün ma tüikya Zang owae Israel khünaknu zunle apüipuix, chix mün ma hwome tsaotsütle changüi. Ipongma hwom a hwom haxtok ma ngole tüiüi.”

⁹Ku mongtsang thule asyepdaoa, ilaxle ku abünle ngopu. JOWANPA khoma, chix otsao kaxhuakbu khoma, ku a jutok mix tuita ningle changle, owawae ju huanuma lingle kopkya mix ningle.

¹⁰Haxtok a JOWANPA to mongong chitüikya khünakbue awangle tüile; hwom chichangchizangle ngole ilaxle hwom tsak-zong chichangkya lom to twonle. JOWANPA thuakzom khoma haxtok a sople ilaxle müitsüt fum zile zanle.

¹¹JOWANPAe thüile: “Ajebu hia zompu-zangpabu ma Zang müntüi; kue hwom a Zangshwom-Hom jaoma ochax mwot mokle ngokya kue lople.

¹²Hwom lengokya lomtang a lomnün tamchu zangnak changpu; kue hwom chikho suale ati ang tomüi. Kue hwom hato thama-thomshix apüi angkya changpu; hwom to sikangün angkya hanpak nguile ngole. Ku, JOWANPAe ija kax akaxdaoa.

¹³Samaria angkya ajebu ochax kue ngündaoa: hwome Bal mün ma akaxdaoa ilaxle ku khünaknu ochei lom to dyenle paodaoa.

¹⁴Ikoxle ito kaikya mwotma mokkya Jerusalem angkya ajebu kue ngündaoa: hwome chinunchakkai ilaxle atse; othai mwot mok ang hwome khünaknu to asun, ikhoma ochax mwot mokkya abax angkya mix owachu chitüi. Ku zongma hwom pangwüi Sodom hia Gomorah nok füi tomwüi oma changle.

¹⁵“Ikhoma, Jerusalem angkya ajebu hanpakma, ija a JOWANPA kax changle: “Hwom ang kue khaxkya pün sax ang koxüi ilaxle zik-hing ling ang koxüi, chemthüikoxle haxtok pangkha towüi hwom zang chitüikya olom apukle changdaoa.”

¹⁶Jerusalem angkya khünaknu füi JOWANPA Khüthak Zang-e akax: “Ajebue akaxkya kax to na taxtha; hwome hünzom a othai monghom füi awang ang tomle. Hwome hünzom hama hwome akax daokya kax chichangle hwom mongjang mix wünle ngole.

¹⁷Kue akax daokya kax to mün-apapule angamkya khünaknu füi, hwome chizakle, hwome oma chemchu münapongpule akax ngo. Mongkhüile ngokya khünakbu ang chuwüi hwome thomshix-thama chemechu hwom to nun-maokya müntüipule akax.”

¹⁸Kue thüipu: “Ibu aje opupuechu JOWANPA huxsa mongtexbu müntsing. Hwom opupuechu kaxho atatle machang chichangba ija chix kaxho tsingle malax, chichangba chixe akaxkya to apale chichangba mongkoxle machang.

¹⁹Chix mongtsik a tuita zangchei changle, chichangchizangle tüikya khünaknu khangkho ma shingle hüi angkya,

²⁰ilaxle chixe mok ang ole mong ma texkya mwot pangwüi lünle machang tanto ija münashuk. Hüi angkya chaxwan zanghan ma chix khünaknue ija tsaothale tsingle kopüi.”

²¹JOWANPAe thüi: “Ibu ajebu a kue ahüikya chichang, ikoxlechu hwom lualua to hwom hüipu. Hwom ang kue kaxho chemchu chifa, ikoxlechu hwome ku mün ma zangwünpu.

²²Hwome ku huxsa tuthüt awanle chang koxba, hwome ku khünaknu hato ku kaxho apukse ilaxle ngole hüikya ochax zanglom hia ochax mwottho hwome danle toxdaose.

²³“Ku a jongtuta khama tata chichangle pangkha towüi tüikya Zang changpu.

²⁴Kue hwom ngün ang chitho angkya khato owachu azwon ang müntho. Ding hia hax ma pangnu khato ku ngole tüikya hünzome münawan hia?

²⁵Opange ku mün ma kaxthai zangwünle changpuix ilaxle kue hwom ang wünmang chito kaxho fapule ngaipuix, ibu ajebue chem akaxpuix kue tikle ngole.

²⁶Hwome alüile zingkya kaxthai zangwünbu füi aje 021 ibue ku khünaknu chemtukuxle lomnong chito azuiüihex?

²⁷Chemle hwom pupa hwome ku alak laxle Bal hato paopuix, ijaja lailaile hwome wünmang zangwünbu füi ku khünakbue ku alakle changüile hwome thütle.

²⁸Aje owae wünmang ngünlaxpuix, chixe ija a wünmang zazale akax angkya changle, ikoxle aje owae ku kaxho atatpuix, chixe a mongong tüikya füi ija ku kaxho apuk angkya wüi changpu. Saxtsa hia saxziak chem ma apyen angkya tüi?

²⁹Ku kaxho a wün lailaile tamchu longnubu thuple akhixkya jantu tuita lailaile changpu.

³⁰Ta-ta zangwün koplaxle ibu ku kaxho changpule apukkya ajebu zongto ku a zanpa tuita changle.

³¹Ma zangwün akax üntoxle ibu a ku makhange kopkya zangwünbu changpule akaxkya ajebu zongtochu ku zanpa tuita changpu.

³²JOWANPA, kue akaxkya zangwün to apalax! Kaxthai zangwüne awangle tüikya wünmang kax akaxkya ajebu zongto ku a zanpa tuita changle. Hwome ibu wünmang baozangbu wün ilaxle ibu hwom kaxthai zangwün hia tsaichong-kaxbongkya zangwünbu füi hwome ku khünaknu lomnong to zunle paole. Kue hwom chiapao chichangba pao angkya kaxtom chifa, ilaxle khünaknu zongto hwom a chemchu chichang. Ija kax, JOWANPA kue akaxdaoa.”

³³JOWANPAe ku ang thüi: “Jeremia, chemtue ku khünak tuita chichangba aje tuita chichangba zompu-zangpa tuitae nang ma, ‘JOWANPAe kaxho a chem?’ le jangatüiba, nange lan angkya a, ‘Hünzom a JOWANPA hanpakma hünlit tuita changle, ilaxle chix ha angkya hünzom a apao angkya changle’ le changüi.

³⁴Ku khünak owawae chichangba aje owawae chichangba owawa zompu-zangpae ngaxchu ‘JOWANPA hünlit’ kaxhuak twonle jangchang, kue hwom to tamchu hwom homkha to sikangün angkya changpu.

³⁵Itülüi, hwom pangwüie hwom zuikhui hia mamixbu ma, ‘JOWANPAe kaxlan chem fapu? JOWANPAe chemle thüipu?’ le atüi angkya changpu.

³⁶Idaile hwome otuechu, ‘JOWANPA hünlit’ kaxhuak a twon angkya jao münchang, chemthüikoxle hwom owawae ija twonle jangchang, kue ku kaxho a hwom hanpakma hünlit tomtata ang achangüi. Khünaknue JOWANPA, ozün ma tüikya hwom Zang kaxbu a nongnong-püilüile achangdaoa.

³⁷Jeremia, ajebu ma atüikox, ‘JOWANPAe hünzom ang kaxlan chem fapu? JOWANPAe chemle thüi?’

³⁸Ipongma hwome ku kaxtom kax ma chilax üntoxle ‘JOWANPA hünlit’ thüikya kaxhuak twonle jangchang, hwom hama akaxkox,

³⁹kue tütalax lechu hwom tswonüi ilaxle ku füi atsaile ochu to tswonle awütüi, ima hwom hia hwom tingnu, oja kue hwom ang tamchu hwom pupa hwom ang koxdaopuix, ija chuwüi womüi.

⁴⁰Kue hwom hato tsün-tsüne zakkop ilaxle hwome chialak tsuak angkya wünhai apüile koxüi.”