Read Wancho Naga Jeremia 24 Bible Online

Jeremia 24 - Wancho Naga bible

Jeremia 24

¹JOWANPAe ku hama fupsa ziak awangle sholaxle Zangshwom-Hom tunthoma tsong anyi aho. (Ija a Babilon wanghom Nebukadnezar-e Jehoiakim sasün, wanghompa Jehoiakin, Jerusalem angkya Babilon nok to zanda ang kople paokya füima changkya. Chix füi tomle Judah nok lompabu, zingzing mankya khünakbu tamchu mwot olom awanle mokkya khünakbu tüihukya.)

²Pongwang lükya tsong ma müikya fupsa pongwang ole jumkyabu shole tüikya; mama tsong ma a fupsa omabu shole tüikya, ibu a sax ang ojao chimüikya oma.

³Ipongma JOWANPAe ku füi akax: “Jeremia, nange chem ngünpu?” Kue lan: “Fupsabu. Müikyabu a huanuma müile, ilaxle omabu a huanuma male, sax ang jao münmüi.”

⁴Ikhoma JOWANPAe ku ang thüi:

⁵“Ku, JOWANPA, Israel nok Zang, kuepi Babilon nok to kople paodaokya khünakbu a ija müikya fupsabu ningle changpu, ilaxle kue hwom to chingcha füi hupu.

⁶Kue hwom to humele thomüi ilaxle ija haxtok to tamchatle ngui ang tomüi. Kue hwom a zingle amüiüi, pünle münamaüi; kue hwom küiüi ikoxle file münawütüi.

⁷Kue hwom ang ku a JOWANPA changpule awanse tsukya mongtsukya azaile koxüi. Ifüima hwom a ku khünaknu ang changüi, ilaxle ku a hwom Zang ang changüi, chemthüikoxle hwom a ku hato mongpak-fünthole chat angkya changle.

⁸“Ikoxle Judah nok wanghompa Zedekiah, chix akhople tüikya tingjit-nokwale ngokyabu, ilaxle Jerusalem angkya khünaknu opang ija haxtok ma ngole hüidaopuix chichangba Ijip nok to kapuix ibu bama: ku, JOWANPAe idu sax ang ojao chimüikya fupsabu to chemle hwonpuix ile hwom to hwonüi.

⁹Hwom hato kue chisumüikya thama-thomshix apüiüi oja thotho chaxwan tok angkya khünaknu nok wüi khomtsile changüihex. Khünaknue hwom chanyi-wanjaile changüi, ajao-ahaiüi, ilaxle kue hwom chiakle apaokya chaxwan pangkha towüi hwom mün a tuita othuak-ozom lom to twonüi.

¹⁰Kue hwom hato ochax-ozan, woknuak-tilan, ilaxle okak-olak, ibu apüiüi ilaxle hwom pupa hwom ang koxkya hwom haxtok ma hwom tuita chu chingole chang ang tomüi.”