Read Wancho Naga Jeremia 25 Bible Online

Jeremia 25 - Wancho Naga bible

Jeremia 25

¹Josiah sasün Jehoiakim Judah ma wanghom ang ngokya zanglao ali lükya to, Judah khünaknu bama kue JOWANPA chito khange kaxho kop. (Ija a Babilon nok ma Nebukadnezar wanghom ang achangkya pongwang lükya zanglao changkya.)

²Kue Judah hia Jerusalem angkya khünaknu füi akax,

³“Zanglao tsaba azom hanpakma, Amon sasün Josiah Judah ma wanghom ang achangkya zanglao bünba azom tokhange anyix kople, JOWANPAe ku füi zangwünpu, ilaxle kue chix zangwün hünzom hama tai angkya tamchu chithai. Ikoxle hünzom na ojao chithapu.

⁴JOWANPAe chizakle chix da ajebu ahüile ngokox ngaxchu hünzome chiapa jao chichangba mong chikox jaopu.

⁵Hünzom chichangchizangle ngokya zanglom hia ochax mwotbu tokya mongchatle chang angkya hwome hünzom hama akaxpu; ile changkox tix wüi hünpu hünpa hwom ang othuithuima hwom kux hex-ole koxkya ija hünzom haxtok ma hünzom chemsua chisixle ngole hüitsuak angkya chang koxle.

⁶Hwome hünzom hama mama baozangbu to shwom-tole hia ibu thothale chichang angkya, ilaxle hünzome zingle alaikya chapabu to shwomle changkya makhange hünzome JOWANPA ang mongtsik chiadün angkya akaxpu. Hünzome JOWANPA kax ma laxle tüikoxba, chixe hünzom to sikangünle münchangse.

⁷Ikoxle JOWANPA chix jaoe hünzome chix kax ma münlaxpule angamkya kax akaxpu. Itülüi hünzome chapabu zingle shwomkya makhange chix ang mong atsikpu ilaxle hünzome alüile chix sikngün hünzom hato apüile laxlaxpu.

⁸“Ija khoma, hünzome ku kax to chiapale chang koxle, JOWANPA Khüthak Zang-e thüile,

⁹‘Kue noknusa hanpakma shuakux chitokya khünakbu ahüiüi ilaxle ku da hanpak ang Babilon nok wanghompa Nebukadnezar ahüiüi. Kue hwom a Judah hia ima tüile ngokya khünaknu tamchu tomzi nok pangnusa füi azan ang apüiüi. Kue ija jat-li hia tomzi nokbu pangwüi amütüi ilaxle othuithui hanpak ang olithule amatoxüi, ija a mikngün ma tuita khomtsikya hia abüt angkya oli changüi. Ija kax, JOWANPA kue akaxdaoa.

¹⁰Mongmüi tungle tamchu pwonla dongle hwom akhongkya ilaxle mongmüi ashukle tuiju-nasomle puakya zingzua, ibu pangwüi kue adangüi. Hwom ang hwom wüntikbu ma atsop angkya wünti chitüile changüi, ilaxle saxziak ojao chitüile changüi.

¹¹Ija haxtok pangkha wüi amale dantoxüi ilaxle ija a mikngün ma za-adünkya tuita changüi, ilaxle tomzi nokbue zanglao puzom-bün hanpak ang wanghompa Nebukadnezar thothale changüi,

¹²Ifüima kue hwom ochax khoma Babilon nok hia ija wanghompa to sikangünüi. Kue ija haxtok amaüi ilaxle othuithui hanpak ang pünle dantoxüi.

¹³Ija laipex ma zale tüikya thama-thomshix: kue Jeremia füi akax pongma, thomshix-thama ojapang füi jat-libu hato ahüi angkya aza-anale changpuix, ibu thama-thomshix pangnusa füi kue Babilon nok to sikangünüi.

¹⁴Babilon noke chem mokdaopuix ija pangwüi kue hwom hato achatle koxüi, ilaxle mama jat-libu tamchu chongkya-chongkya wanghombue hwom a da ang laxüi.’”

¹⁵JOWANPA, Israel nok Zang-e ku füi akax: “Ikhama ku mongtsike awangle wansa tuita tüile. Kue nang tomle apaole nok pangnu hato ija laxlaxle paokox, ilaxle hwom ang ija angkya alingkox.

¹⁶Kue hwom hato ahüi ngokya chax-zan khoma, chemtue hwom ija angkya lingle changüihex, hwom a shushüile tamchu kho-anguile changüi.”

¹⁷Ikhoma JOWANPA chak angkya ija wansa kue lax, JOWANPAe ku tsanle apaopao onok pangnu khato ija wansa angkya ling ang kox.

¹⁸Jerusalem hia Judah angkya tinglongbu pangnu, ija wanghombu hia lompabu chu pangwüi womle, ija angkya ling ang tom, ilaxle hwom a awütle toxkya kha, khomtsikya hia za-adünkya nui ang achang, ilaxle athax kople twonkya ningle khünaknue hwom mün a othuak-ozom ang twon

¹⁹Ija wansa angkya lingdaokya mamabu mün pangwüi ikhama tüile: Ijip nok wanghompa, chix nguakax-wangkho hwom hia lompabu; Ijip nok pangwüi tamchu Ijip nok ma tüikya mixnokbu pangwüi; Uz haxtok angkya wanghombu pangwüi; Filistia tingnu Ashkelon, Gaza, Ekron, ibu angkya wanghombu pangwüi tamchu Ashdod ma atale toxkyabu; Edom, Moab, hia Amon nok pangwüi; Tair hia Sidon angkya wanghombu pangwüi; Mediterenian haxtok angkya; Dedan, Tema, hia Buz tingnubu angkya wanghombu pangwüi; ma kho amoxle sexkya khünakbu pangwüi; Arabia nok angkya wanghombu pangwüi; sak-hax nok angkya wanghombu pangwüi; Zimri, Elam, hia Medi nok angkya wanghombu pangwüi; shuakux nok wanghombu pangwüi, tsailo hia nuisox, tuita füima tuitale. Zangfang ma tüikya onok pangnusae wüi ija wansa angkya ling. Akiale ija wansa angkya Babilon nok wanghompa-e lingüi.

²⁷Ipongma JOWANPAe ku füi akax: “Ku Israel nok JOWANPA Khüthak Zang-e, tokle hia fatle machang machangle tamchu hwom nguak laxle zo ang chithole machang machangle ling angkya kaxtom koxle le khünaknu hama wünkox, chemthüikoxle kue hwom hato ochax-ozan ahüile ngole.

²⁸Ikoxle hwome nang chak angkya wansa koplaxle ija angkya münlingpule angamle jangchang, JOWANPA Khüthak Zang-e hwom ang ling ang tom angkya jao changpule khünaknu hama apuakox.

²⁹Kue pünle ama angkya mwottho ku tingnu makhange jao owang wangle changüi. Hwom to sikngün chifa homtoxle alyetüihexle hwome thütpia? Ile otuechu münchang, hwom to sikangün angkya wüi changpu, chemthüikoxle zangfang angkya khünaknu noknusa hato kue ochax-ozan ahüi angkya changle. JOWANPA Khüthak Zang, kue ija kax akaxdaoa.

³⁰“Jeremia, nange kue akaxkax pangwüi apuk angkya changpu. Nang ibu khünaknu hama ija kax akax angkya wüi: “‘JOWANPAe zangding tokhange tseüi ilaxle zangkho tokhange zang atsaküi. Chixe chix khünaknu zan to kale tseüi; chix a grep ziak fyetkya khünak ngaokya ningle akhongüi. Chaxwannu angkya noknusae chix zing atatüi,

³¹ilaxle ija ozing a haxtua-zangnam alople kaüi. JOWANPA ang jat-libu füikya tsetwon-zangwün tüile. Chixe khünaknu pangwüi kaxtik ang sele apüiüi ilaxle chichang-chizangkya khünakbu mik amütüi. JOWANPAe ija kax akaxdaoa.’”

³²Thomshix-thama a onok tuita füima onok tuita hato hüi angkya, ilaxle haxtua-zangnam ochu to zangchei chongkya athütle tüikya kax Khüthak JOWANPAe akaxdaoa.

³³Ija nyix JOWANPAe mik-amütkya khünak mangbu chaxwan tok tüchi tua makhange atachi tua alople chiaküi. Owachu hwom mang münsop, ilaxle hwom a pao üntoxle akhünle münchang. Ibu a haxzao thokle athünkya ningle haxkha ma athünüi.

³⁴Soplax, hünzom lompabu, hünzom ku chunnyetmixbu, akhongle soplax! Mangsoplax ilaxle hax to atüilax. Hünzom hato dinghüt-khosom angkya hanpak nguile hüile, ilaxle hünzom a chunla müi tsoppupule tsopüi.

³⁵Hünzom ang paole azang angkya olom müntüiüi.

³⁶Hünzom a mongmaxle akhong soplax chemthüikoxle JOWANPAe chix mongtsik füi hünzom jat-li amüt ilaxle hünzom chaxwan a amale dantox.

³⁸JOWANPAe chix khünaknu chilaxle dantoxle mailang tuitae longlua danle toxkya ningle. Khompuatsikya zan ilaxle zadünkya JOWANPA mongtsike haxtok a tuita sak-hax ang achangle tox.